Ahẹ Ụgama 57 - IWE ỌNỊNỊ

Ohomorihi, navọ wa gụ mị ụvọ

¹ Ohomorihi, aarịhịnị kwogwo navọ wa vayị amị Wâ yẹ ka ẹwụ mi zwe va vaka nị Ịda awụ m maa vakaa tụ́ pooro dị avaba ẹtẹ ana aa sụ́ kúkùkù ọ̀ ta nị.

² Mê nowu na za Ohomorihi ana nẹba hu keekere Ọnị aa mẹ avaba ịsị aa rị mị ụyaa mị nị.

³ Ohomorihi vaa hụrẹ ini ihinẹba vẹ, dị ọ va dọ mị tụ́ Avaba aza ana kwẹẹtẹ tù mị vị ọnị ọ vaa mẹ ụhịị nyị Ohomorihi vi ene vee sì ịrẹyị amị pooro, ọ yị vee vene mị.

⁴ Aza ana kara mị vị ana yà anka idu avọọ Ẹnịnị vi uye odivi ana aā na ọzaa rị Ẹ zụ sị ịrẹyị irenu ẹnịnị wụ̀ ọza obobooro anka ụhwọ Ịrẹyị ẹnịnị ọ zụ wụ̀ ọza anka ọpa ọnịrị ọha mẹ̀ẹ wụ̀ ọza avọọ.

⁵ Ohomorihi ẹwa nyị ụbanyị hu keekere ini ihinẹba nị Navọ avaba anẹhẹ è re ụbanyị awụ.

⁶ Ọnịvị amị ee bè mi ka ẹnị ẹ̀ za mị Ayị amị o si du ẹtẹẹtẹrẹ Ọnịvị ẹ raà chị ụsị ka me zina ngụ ọ Ama dị ahịka ẹnị ụvọta ẹ rẹ varẹma horo ngụ ụsị ọnọọ nị.

⁷ Ohomorihi, ayị amị vị ana maanị jẹẹ geri-geri, me yi hí angwa Mi vee hu ịsa, dị maa jị ahẹ kụ́ wụ avọ.

⁸ Ẹnẹnẹ viri-viri vị ọnị maa kwẹẹtẹ Maa kwẹẹtẹ dị ma sị agidibò amị.

⁹ Màa sị ọ dị maa sịị kụ́ wụ avọ, Ẹnẹyịmavara, ini eyi avaba aza Mị vaa jị ahẹ kụ́ wụ ịnị akakana ịnọyị.

¹⁰ Wê sì ịrẹyị ọza pooro, avọọ ụ mẹ̀ rẹ nyị ịzẹyịza nị nyị ịsị ọza sii juwe anị.

¹¹ Ohomorihi, ẹwa nyị ụbanyị hu keekere ini ihinẹba nị Navọ avaba anẹhẹ è re ụbanyị awụ.