Ahẹ Ụgama 5 - IWE ỌNỊNỊ

Ohomorihi navọ wa gụ mị ụvọ (Ahẹ Idevidi oni o hú okokoro tụ́ ana yà ịnị ụvọ ọjahẹ)

¹ Ẹnẹyịmavara, navọ kwogwo wa wụ́ ịpọda amị. Navọ we pè mi re tụ́ ịnị ịrẹyị oni mee ro ịnị ayị amị.

² Ẹwụ Ohomorihi amị ana vị ohinọyị amị ẹwụ mi nowu va za nọ, navọ wa gụ mị ụvọ. Aarịhịnị ẹwụ kẹnẹ m maa dá ịpẹ yị nị.

³ Ẹnẹnẹ, Ẹnẹyịmavara, ẹwụ ẹmị vaa hị́ nị. Ẹwụ mị vaa kụ́ ịrẹyị ịnị ẹngụ amị ve tù nị. Màa vavọọ vẹ, dị mị jẹẹ, di mee zi wu eyi.

⁴ Ẹwụ Ohomorihi mâ yẹ ka we yi sì ebira odivi. Ẹwụrị aza edivi ẹ yị vaa yà aha ọnya.

⁵ Aza ana aa sị ẹngụ tụ ẹba ẹ yi zụ jẹẹ ọvịdị awụ. Wâ nyị ịhyẹrẹ avaba aza ana aa mẹ̀ ebira odivi.

⁶ Avaba onireche vị ọnị ụ vaa wụ̀ ha Enevene ana aa wụ̀ ọza vị ọnị ụ nyị isi anị.

⁷ Ama ẹwụ vị ana nyayịnẹ vayị amị ẹtẹẹtẹrẹ, avọọ ẹmị vaa vẹ ini eehi awụ. Mị vaa sị ụbanyị yị wụ di mi và kụ́ ẹtẹ, dị maa kụ́ wụ ini Irehi Ọnịnị awụ.

⁸ Ẹnẹyịmavara, wéē re ka ọnịvị ẹ sị rụrụ baaba. Navọ ịsị wèe sì ka ma mẹ wa sị zụ̀ mị dị maa mẹ̀ ẹ. Oze ọnị ụ wàa ka ma zị ụ sị zụ̀ mị dị ma và tụra a.

⁹ Ẹ yị nyị ịrẹyị ikonya ọnị ọnịvị amị kà ana aā vị ịzẹyịza. Ịsị e yee sì kẹnẹ ọ vị ka ẹnị ẹ̀ wụ̀ ọza nị. Ịrẹyị ẹnị ẹ yaa kà ọ zụ wụ̀ ọza. Dị ẹ yaa kụ́ ịrarẹ hworo-hworo agụvị e zụ si vene ọza.

¹⁰ Ohomorihi navọ wa jị ịvị yị wa. Navọ ahịka ịsa odivi ene e yee ro ọ vara eyi gụ wa hyẹdụ nị. Dụ wa hụụ ịdị awụ agụvị ka ẹ raà mẹ̀ ebira odivi hi wu baaba avọọ ẹ mẹ̀ raa kụ̀ụ hịrẹ wụ nị.

¹¹ Ama navọ aza ana va tẹ ịda awụ ẹ̀ jẹ ịrajẹ. Navọ ịnẹ ẹnịnị òo hine dị ẹ̀ẹ jị ahẹ. Navọ we sere wa eyi ụvọnị-ụvọnị. Navọ wa mẹ ka aza ene sì ịrẹyị awụ ẹ̀ẹ jẹ.

¹² Ẹnẹyịmavara, mâ yẹ kaakara ka ụ vaa mẹ ka ò zee yị aza ana aa mẹ̀ ebira oni u sì. Wâ mẹ ka ò zee yị wa eyi ụvọnị-ụvọnị wẹ yị zẹẹ ka à nyị ịsa odivi ana kanyị wa.