Ahẹ Ụgama 41 - IWE ỌNỊNỊ

Aduwa ọza ẹnẹ ẹngụ aa zị (Ahẹ Idevidi ana yà ịnị ụvọ ọga ọjahẹ)

¹ Ẹngụ aza ana ahịka eē ro ịrẹyị onosiye ẹ̀ nyarị ịrẹsụ ọyịza Ụmẹ ẹnị ẹngụ aza ẹnẹẹ ẹ̀ẹ nyị akanya, Ẹnẹyịmavara vị ana aa dọ waa tụ́.

² Ẹnẹyịmavara vi ene vee sere wa, ọ yị vaa zẹẹ ka à nyị ịsị ẹ mẹ̀ wa Ọ rẹ vaa mẹ ka òo zee yị wa ịnị ẹtẹ ẹnị ẹ̀ yà Ọ yị vaa zẹẹ ka ọnịvị ẹnịnị ò re wa za.

³ Ẹngụ àa zị ẹngụ aza ana vavọọ nyị ariro yị onosiye Ẹnẹyịmavara vị ana vaa sị ẹngụ anịị ta dị ọ sị ọ kwẹẹtẹ hụụ ịrẹsụ ụkụ anị.

⁴ Mị ka Ẹnẹyịmavara, navọ kwogwo wa vayị amị dị wa mẹ mị ụkụ mâ yẹ ka ma raà mẹ̀ ịsa odivi ka wụ vẹ.

⁵ Ọnịvị amị nịnị vị ana aa kà ịrẹyị odivi amị Ẹ ka à kà ka ma hụra sú dị aamị ọ̀ ta hụụnị ẹhẹ.

⁶ Ẹnịnị ana ka vị ẹnị ee vee hee mi nị vị ana aa mẹ apẹ Ẹ̀ẹ vẹ, di e yee sì ịrẹyị odivi amị ẹnẹ va naa kà a ngụ ẹhẹẹ zị.

⁷ Avaba ẹnị ana aa kụ́ ayị amị vi ene ee weree kà ịrẹyị amịị yị ẹngụ Ịrẹyị ene divi hu e yee ro o tụra mị nị.

⁸ Ẹ ka ụkụ odivi ọ za mị aanị nị Ẹ rẹ ka mẹ mā vana kụkụ zụ kwẹẹtẹ hụrẹ ịzị mị yà.

⁹ Ọta amị ọnị mị nyayịnẹ sị ịnẹ yị, ẹnị ẹnịrịị dudu aa rị ịsa ọnị gẹdẹ-gẹdẹ ọ kwẹẹtẹ tù mi nị.

¹⁰ Ẹnẹyịmavara, navọ wa vayị amị navọ wa sị mị kwẹẹtẹ di me si wa atọ.

¹¹ Wàa raà sị mị kwẹẹtẹ, dị ọnịvị ẹ̀ yị rẹ vaa nyị ehuna amị nị, dị mị yẹ ka wê sì ịrẹyị amị.

¹² Mâ yẹ ka ụ vaa gụ mị ụvọ agụvị ka mẹ yị mẹ akụvị Mâ rẹ yẹ ka ụ vaa navọ ka ma yà ịda awụ pooro zịna-zịna.

¹³ Ẹnẹyịmavara, ana vị Ohomorihi Anisirẹrị, ẹwụ a vaa kụ́ avọ pooro zịna-zịna nị Aamị, mị ka aamị.