Ahẹ Ụgama 30 - IWE ỌNỊNỊ

Ohomorihi avọ (Ahẹ Idevidi ana a jị a mẹ̀ nā irehi Ohomorihi)

¹ Ẹnẹyịmavara ẹwụ mị vaa sị ụbanyịị yị nị agụvị ka wa sị mị dọ tụ́ Wẹ rẹ vaa navọ ka ọnịvị amị è huna mị dị ẹ̀ vaa jẹ.

² Ẹnẹyịmavara ana vị Ohomorihi amị mê nowu va za wụ ka wa ba mi owu ịzẹyịza di u ba mi owu, dị ụ mẹ mị ụkụ nị.

³ Wẹ rẹ vaa zẹẹ ka me sú ụ ka asị mị sị eteesu vara ịta kú ẹngụ.

⁴ Ẹwụ nịnị aza ana sị ayị yọ, waa jị ahẹ kụ́ ọ Waa jị ahẹ nịnị, we siī gono ò!

⁵ Ọ mā kụ́ ayị gọdọ ama vị ọọ̄ mẹ ọyịzaa yị ọza pooro ịnị ẹhẹ nị Ọza ọ zụ jị òrèrè ịrahụ, ama eyi ọ̀ọ naa nị dị ịnẹ anị kuku ee hine.

⁶ Ịjị ẹngụ amị rọ mê ro ka ẹ yị nyị ịsị ẹẹ̄ vẹ.

⁷ Ẹnẹyịmavara, ịjị ọnọọ vị ọnị ụ sị mị jẹẹ nganganga anka ataba ana kara ẹkụra avọọ. Ama ịjị ụ va và eyi hụrẹ mị ẹngụ angwahi ộ ka mị vẹ.

⁸ Dị mị va ta wụ ubo nọ, Ẹnẹyịmavara Di mi nowu va za wụ ka wa vayị amị nị.

⁹ Ẹnẹyịmavara, mèe sú ye re ọgụ ọnị waa rị ịnị anị? Mị ka àa raà sị mi chire ẹtẹ, sị mị kụkụ zụ mẹẹ wụ? Wáā yẹ ka ọza ene su ọ yị zụ kwẹẹtẹ dị ọ̀ọ kụ́ avọ? Ẹnịnị ẹ yị zụ aa kà a zụ̀ aza ụ mẹmẹẹ mẹ ịzẹyịza.

¹⁰ Ẹnẹyịmavara, aarịhịnị navọ wa wụ́ ịpọda amị dị wa vayị amị navọ wa gụ mị ụvọ.

¹¹ Ẹmị vị ana ayị anị vịdị du, wa raà mẹ ka ayị amị ọ kukuu hine, dị maā nyị ẹzẹ Ụ ka asị mi kuku sụ ùnè, ama maa jẹ,

¹² dị ma kụkụụ sị avaba ayị amịị jị ahẹ ga wụ pooro-pooro Ẹnẹyịmavara ana vị Ohomorihi amị, ẹwụ mị vaa kụ́ avọ pooro nị.