Ahẹ Ụgama 23 - IWE ỌNỊNỊ

Ohomorihi ee sere yi nị (Ahẹ Idevidi)

¹ Ẹnẹyịmavara ee sere mị anka oseratẹmẹ avọọ nị. Ẹ yị nyị ịsị ẹ vaa zwọ mị.

² Ộ mẹ mị ka maa hụtẹtẹ dị maa tụ́ ụhwọ́ ịzị avị ohwoohu hi. Ộ sị mị nọ ịnị enyi enee si hẹẹ-hẹẹ.

³ Dị ọ vara ẹhẹ amị ọwọọwa nị Ộ sị mị va tụra oze ịzẹyịza agụvị ụbanyị ẹngụ anị.

⁴ Màa daka a zị ụsẹ aha odivi ịnị ụmẹ odivi me yi vee hí angwa ka â nyị ịsa odivi ana vaa mẹ mị Mâ yẹ ka Ohomorihi vị ana yà pè mi Arubebe anị ọnịrị okutẹ anị eni eē sii sere mi ọ̀ sị ayị amị nẹtẹ.

⁵ Ohomorihi ộ kụ́ ịsa ozoza hi ẹtẹ ka maa rị ọ eyi ọnịvị amị nịnị. Ô si mi ọzọga anka ọza ọnị ọ́ sị ụbanyị yị, dị ọ sị angwẹ sisi mi ịrẹsụ nị. Dị ọ mẹ ka ako amị òo hi ka wà nị.

⁶ Ma yẹ kaakara ka ọyịza-ọyịza anị ọnịrị oyisì anị vaa saasa mi pooro ịnị ẹhẹ amị nị. Irehi Ẹnẹyịmavara ọ vaa vị eehi amị ịnị ẹhẹ amị pooro nị.