Ahẹ Ụgama 21 - IWE ỌNỊNỊ

Ohinọyị ộ kụ́ avọ ka Ohomorihi ộ mẹ̀ ka ọnị ọ̀ nyị ehuna (Ahẹ ọnị Idevidi jị ana ya ịnị ụvọ ọga ọjahẹ)

¹ Ẹnẹyịmavara, ịnẹ ohinọyị ee hine kẹnẹ agụvị ka wâ sị ụkata yọ Ụ́ mẹ̀ mẹ ka ọ̀ nyị ehuna ọnịvị anị, dị aa jẹ kẹnẹ nị.

² Ohomorihi avaba ịsị ohinọyị ee sì vị ọnị ụ sị yọ mị ka avaba ịsị ọ ka wa sị yị ọnị vị ọnị ụ sị yọ ẹ yị nyị ikonya ana vọ ẹtẹ.

³ Wâ kụ́ ogu ozoza-ozoza va yọ dị ụ sị amu ohinọyị ana a sị igooru obooro mẹ di u si kú ọ ịrẹsụ nị.

⁴ Ohinọyị ộ pà ka wa sị ụhwẹ ọgọdọ yị ọnị ịzẹyịza dị ụ sị yọ nị Wâ sị ụhwẹ ọgọdọọ yọ ka ọ̀ yàra pooro zịna-zịna.

⁵ Ụ mẹ̀ gụ ọ ụvọ, dị ọ rẹ nyị ụbanyị hu avọọ nị. Wa raà mẹ ka ọ̀ ngụrẹyị, dị ọ̀ nyị ụbanyị.

⁶ Wa raà mẹ ka ò zee yọ pooro zịna-zịna Ohinọyị ộ yẹ ka ịda awụ ọnị yà nị agụvị avọọ dị ịnẹ anị ee hine kẹnẹ nị.

⁷ Ohinọyị vị ana sị ayị tụra Ẹnẹyịmavara Ộ yẹ ka Ẹnẹyịmavara vi ene eē sì ịrẹyị ọza pooro agụvị avọọ dị angwa ò yi hí ọ nị.

⁸ Ohomorihi, ụ vaa tana ụvọọ za ọnịvị awụ ụ vaa sị ụkata awụụ pa ịvaa yị wa.

⁹ Ịhị wàa vẹ, ụ vaa mẹ ka ẹngụ ọnịvị awụ ọ̀ kà ịra anka èe rere ne ọza ngụ ịra avọọ. Ẹwụ Ẹnẹyịmavara vaa sị ọyịkụ-ọyịkụ dị ụ sị wụ̀ wa dị ụ rị wa ịra và ha.

¹⁰ Ịsị aa hị́ ịpa ẹnịnị vị oni u vee vú ẹtẹ hụụnị ẹhẹ ọza o mē vene re obooro ẹnịnị ịnị ẹhẹ pàá.

¹¹ Ẹnịnị vaa gẹ eyi, di e yee sì oze ka ẹnị ẹ̀ mẹ wụ́ ịrẹyị odivi ama ẹnịnị ẹ yị va zụụ mẹ̀ ẹ.

¹² Ịjị wèe ne wa ọpa ẹnịnị vaa va ịrẹma tụ́, di e yee zwe.

¹³ Ẹnẹyịmavara, yaa kụ́ wụ avọ agụvị ka wâ nyị ụkata Ụkata awụ ọnọọ vị ịrẹyị ọnị ị vaa sị jị ahẹ gono wụ.