Ahẹ Ụgama 19 - IWE ỌNỊNỊ

Ịsa oni Ohomorihi mẹ ệ sị ụbanyị anị zụ̀ (Ahẹ Idevidi ana yị ini ụvọ ọga ọjahẹ)

¹ Avaba ihinẹba aa sịị zụ̀ ka ụbanyị Ohomorihi ộ dẹngụ Aa mẹ ka avaba aza è re ụkọrọ oni Ohomorihi sị ụvọ anị mẹ.

² Eyi ana nị̄, vi ana aa nọ ọ booro-booro Ịrahụ ene hi aa sị ịrẹyọyẹ anịị zụ̀

³ Ịzẹyịza ẹ yị há irenu ịrẹyị ọnyị-ọnyị Ọza ọ yị wụ́ ọngwẹ ẹnịnị vụrụ-vụrụ

⁴ Ama ịrẹyị ẹnịnị ê tù ịzị ẹhẹ tù Mị ka avaba ẹhẹ ệ wụ́ ọ ịsa ẹnị ẹ yaa kà

⁵ Ọyị mẹ jịnẹẹ hụụnị aku anị vẹ, inohine anị ộ banyị Ọ si me anka ọmụha ana jẹ ka echi ọyị zwe o si tù.

⁶ Ọ mẹ̀ hụrẹ hụrị eyi ọnyara dị ọ na ngụ ẹtẹ tụ́ eyi ọsa nị. Avaba ịsa ana yà oze anị, ọnị oō há kú nị.

⁷ Ọda Ẹnẹyịmavara ộ gụ ọ zụ sị ụkata ọza vị ọwọọwa Ọda Ẹnẹyịmavara ộ nị̄, ẹ yị nyị ireche ịnị anị.

⁸ Avaba ọda anị vị ana vọrọ, ọza ana sị eyi pe è, ẹ vaa jẹ Ọda Ẹnẹyịmavara ộ gụ, ọ zụ sị eyi ọza hweyi.

⁹ Waa sị ụbanyị yị Ẹnẹyịmavara, ịsị e zoza ọ vị ọnọọ nị. Ụbanyị Ẹnẹyịmavara eni e zụ zizi ọ ịnị ẹhẹ kẹ!

¹⁰ Ọkarẹyị Ẹnẹyịmavara ô zoza huna igooru A yi nyị igooru ịnị ẹhẹ eni e zụ si juwe anị. Avọọ ọ mẹ̀ re hine hu ẹhụ nị, ẹhụ ene ee sì ini ụpaha.

¹¹ Ọkarẹyị awụ aa kà aza ọnọ, ọza ana wụ́ chire vee re ọgụ ọbanyị.

¹² Ọza ọnị ụvọta ọ mā yẹ akụvị ẹngụ anị, Akụvị oni mee weree mẹ, Ẹnẹyịmavara dọ mi tụ́ ịnị anị.

¹³ Ịsị mị yẹ ka ô divi, navọ asị mị nyayịnẹ mẹ̀ ọnị Ịsa ene divi navọ asị e zụ hú mị ẹtẹ Wàa vavọọ mẹ, ẹhẹ amị ọ yị vaa nyị akụvị Dị ụ sị dọ mị ha hụụnị ebira akụvị-akụvị.

¹⁴ Ẹnẹyịmavara, ịda awụ mị vaka tụ́ nị Navọ wa dọ ịrẹyị ọnị maa kà ọnịrị ịrẹyị ọnị mee ro.