Ahẹ Ụgama 143 - IWE ỌNỊNỊ

Ẹnẹyịmavara, aarịhịnị gụ mị ụvọ (Ahẹ Idevidi)

¹ Ẹnẹyịmavara, navọ wa wụ́ ịpẹ ọnị maa dá Aarịhịnị vayị amị dị wa ba mị owu. Ẹwụ vị ana aā mẹ̀ ịsa ana vọrọ, dị ụ rẹẹ mẹ ịzẹyịza nị, navọ wa hụ agụvị avọọ wa va ba mi owu.

² Aarịhịnị asị ụ kà a ka waa mẹ̀ ọkarẹyị yị ẹmị ozi ahụ awụ, agụvị ka ẹ yị nyị ọza ana zụ jẹẹ ọvịdị awụ kà a ka ọnị ọ yị rị ịvị.

³ Ọnịvị amị aa dụ mị, ọ sị mị gụ hyẹdụ. O si oze gu hi mị tụ́ ịnị ịrahụ anka ọza ene wusu dị ayị anị hi hụrẹ ụmọrụmọ avọọ.

⁴ Ayị amị o kú du, ọ kụ́ mị tụ́.

⁵ Mâ tamayị ịyẹẹyẹ, di mee ro ịrẹyị ịsa ẹbanyị-ẹbanyị ọnị ụụ̄ sị ụkata awụụ mẹ nị.

⁶ Ẹnẹyịmavara, maa tụ́ ụvọọ yị wụ. Eyi awụ aa tụra mị anka eteesu mèe sì enyi ịnị ọhahị avọọ.

⁷ Ẹnẹyịmavara, navọ we juntu tụ́ mi ohi, ka eyi awụ ộ tụra mị pooro, o kú du mị eyi. Navọ asị ụ sị ẹngụ awụ tẹ yị mị ka à yị vị avọọ m me wusu.

⁸ Navọ maā tamayị ẹnẹnẹ-ẹnẹnẹ ka uū sì ịrẹyị ọza. Wâ yẹ ka ẹwụ mị sị ayị tụra nị. Navọ wa zụ̀ mị oze ana a vọrọ ka ma zị, agụvị ka ẹwụ m maa dá ịpẹẹ yi nị.

⁹ Ẹnẹyịmavara, ịda awụ mi zwe va tẹ̀ nọ, navọ wa dọ mi tụ́ hụụnị ụvọ ọnịvị amị.

¹⁰ Ẹwa vị Ohomorihi amị nị. Navọ ịsị wèe sì ka ma mẹ, ma yẹ. Navọ ò zee mi, dị waa zụ̀ mị oze ọnị mi vaa zi, di asị a nyị ịrẹyị.

¹¹ Ẹnẹyịmavara navọ wa hụ agụvị ụbanyị ẹngụ awụ wa dọ mi tụ́ di asị mi sú. Ẹwụ vi ana aā mẹ̀ ịsa ana vọrọ, navọ wa hụ ụvị avọọ wa dọ mị hụụnị akanya amị.

¹² Ẹwụ vi ene eē sì ịrẹyị ọza pooro. Agụvị avọọ navọ wa za avaba ọnịvị amị dị wa wụ̀ wa và ha. Wâ yẹ ka ẹmị vị ozi ahụ awụ.