Ahẹ Ụgama 140 - IWE ỌNỊNỊ

Ohomorihi, navọ we sere mị (Ahẹ Idevidi ana yà ịnị ụvọ ọga ọjahẹ)

¹ Ẹnẹyịmavara, navọ wa dọ mị tụ́ hụụnị ụvọ aza edivi. Asị ụ navọ ka aza ene ee sì ka ọnị ẹ̀ wụ̀ ọza ẹ̀ zụ mẹ mị ịrẹyị.

² Aza ẹnẹẹ vi ene eē ro ịrẹyị odivi ịnị ayị ẹnịnị. Eyinị-eyinị ẹ sii chị ịrẹkụ tịtẹ nị.

³ Ịrẹyị irenu ẹnịnị ọ zụ wụ̀ ọza anka ẹ́wụ́ odivi avọọ. Vị ịrẹyị ẹnẹ ẹẹ̄ kà sị mẹẹ ẹchịpa ẹwụ odivi avọọ ịnị ẹngụ ọza nị.

⁴ Ẹnẹyịmavara, asị ụ navọ ka aza edivi è re oze mẹ mị ịrẹyị. Aarịhịnị asị ụ zẹẹ ka aza ene ee sì ka ẹnị ẹ̀ wụ̀ ọza ẹ zụ kanyị mị Aza ẹnẹẹ vi ene ee sì ka ẹnị ẹ̀ gụ mị hyẹdụ.

⁵ Aza ana aa mẹ eyii zi ẹ sị ịrẹpa và ee zi mị. Ẹ raà và ịrẹpa hi oze zi mi ka ẹnị ẹ̀ sị za mị.

⁶ Ẹnẹyịmavara, mị ka ẹwa vị Ohomorihi amị nị. Navọ wa vayị amị dị wa ba mị owu.

⁷ Ẹnẹyịmavara ana vị ohinọyị ene hu keekere, ẹwa vị ọnụkata ana aā dọ mịị tụ́ nị. Ẹwa dọ mị tụ́ ka asị a nyị ịsị ẹ mẹ̀ mị ịnị ụmẹ ịrẹkụ ọnọọ nị.

⁸ Ẹnẹyịmavara, ịsa ana aza edivi ee ro avọọ, asị ụ sị yị wa mẹ. Asị ụ zẹẹ ka ẹ̀ zụ mẹ ịsị e yee ro, ka à yị vị avọọ e ve wo oto.

⁹ Asị ụ navọ ka ọnịvị amị ana kara mi è hu mi ẹtẹ. Navọ ahịka ẹnị ẹ rẹ varẹma sị ịrẹsụ kụ́ ịsa odivi ẹnị ẹ sị irenu ẹnịnị kà nị.

¹⁰ Navọ ịra ọ̀ gara kú wa. Navọ è ne wa ngụ ịnị ahata dị asị ẹ kụkụ zụ kwẹẹtẹ.

¹¹ Asị ụ zẹẹ ka ò zoza yị aza ana aa dà irechee kú ọza. Navọ ahịka odivi-odivi ò ve tù aza ene ee sì ka ẹnị ẹ̀ wụ̀ ọza nị, dị ahịka odivi ọnọọ ọ wụ̀ wa nị.

¹² Ẹnẹyịmavara, mâ yẹ ka ụ vaa dọ ịrazị onosiye ọnịrị oniruwa nịnịị zị.

¹³ Mâ yẹ ka aza ana aa mẹ̀ ịsa ana vọrọ vị ana vaa kụ́ wụ avọ, dị ẹ ra ịda awụ.