Ahẹ Ụgama 139 - IWE ỌNỊNỊ

Ẹ nyị ịsị Ohomorihi ọ̀ yị yẹ (Ahẹ Idevidi ana yà ịnị ụvọ ọga ọjahẹ)

¹ Ẹnẹyịmavara, wa raà zama mi re, wa yẹ mị

² Wâ yẹ avaba ịsa ọnị maa mẹ̀. Ụ mẹ̀ yị yà ẹnẹẹnẹ, wâ yẹ ịsị mee ro.

³ Màa mẹ̀ ụkọrọ, màa tụ́ ụhwọ kẹnẹ wee re mị, nyị ịsị maa mẹ̀ oni wè yi re.

⁴ Ẹnẹyịmavara, dị ma hyakụ va kà ịrẹyị ọchị ọnya jịnẹ, wa sị avaba anị yẹ.

⁵ Vị ụ maanị kara mi okiri-okiri, dị waa sị ụkata awụụ dọ mịị tụ́ nị.

⁶ Mèe ro o pooro ka ụ mẹmẹ maanị yẹ mị, vi ee hii tụ́ mi eyi nị, mẹ yị yẹ ọ mẹmẹ vavọọ yà.

⁷ Ịzị mị zụ nọ ka asị u re mi, mị ka ịzị mi zụ zwe na tẹ̀, ọnị ụ wẹ̀ yị vaa yà ịzọọ?

⁸ Mèe zwe hịrẹ nọ ini ihinẹba, ụ yà ịzọọ. Màa va nọ iruvo ẹtẹ na yà, ụ rẹ yị yà ịzọọ.

⁹ Màa daka va nyị avaka di mi hira, dị mị na huu na yà akẹnẹ òkū nị,

¹⁰ ịzọọ vị ọnị mi re vee tù wu, dị waa zụ̀ mi oze. Ẹwa yà ịzọọ dị waa gụ mị ụvọ nị.

¹¹ Jẹẹ ma rẹ va kà a ka etohozi ọ̀ va kụ́ mị, à vị ka ẹtohweyi ọ̀ vara ịrahụ kú mị dị asị e re mi.

¹² Ama ẹtẹ ọnị o mē hozi oni eyi awụ. Etohozi vi ene hweyi anka ọọdụ avọọ yị ẹwụ. Ọnya-ọnya ẹnịnị vị ịnị eyi awụ nị.

¹³ Ẹwa mẹ avaba ahị ẹngụ amị, dị ụ sị mị tụ́ ịnị ịnẹ ọnyị amị nị.

¹⁴ Maa kụ́ wụ avọ agụvị ka mèe re ụ mẹmẹ mẹ mị pooro, angwa vi ene eē hí mị. Mâ yẹ ịnị ayị amị ka ịsa ọnị ụụ̄ mẹ vị ene eē hí ọza irenu.

¹⁵ A màa mẹ ẹchụkụ amị, dị a tangwa vavọọ kụ́ wa gẹ ẹngụ tụ́ ịnị ịnẹ ọnyị amị, ẹ yị nyị ọnị wẹ̀ yị yẹ ịnị anị. Wê re mị m mẹ̀ tangwa yà ịzọọ dị maa hụ.

¹⁶ Ịjị wèe yị hyakụ mẹ ọchị ẹngụ amị eyi awụ vi ene èe ne re mị. Avaba ẹkụhị ọnị mị vaa mẹ ịnị ẹhẹ vị ọnị ụ chẹrẹ tụ́ ini iwe awụ dị a hyakụ va ma mị.

¹⁷ Ohomorihi, màa zama aro awụ pooro, vi oō hí mi eyi nị. Aro awụ ộ dẹngụ ẹnẹmẹhị.

¹⁸ Màa ka maa za wa ịrịka, ệ rụrụ huna ààrẹ. Ịjị màa ha, ịda awụ mị yị yà nị.

¹⁹ Ohomorihi, àa yẹ wa za aza edivi dị wa wụ̀ wa và ha. Ẹwụ nịnị ene ee sì ọza ka wa wụ̀ ọ, jịnẹ hụrẹ mị eyi nịnị.

²⁰ Ẹ yaa kà ịrẹyịị awụ ana sị zụ̀ ka ịsị ẹ nyị tụ́ ịnị ayị e yi zoza. Ọnịvị awụ aa hí ịrẹha awụ kẹnẹ-kẹnẹ.

²¹ Ẹnẹyịmavara, aza ana nyị ịhyẹrẹ awụ vị ọnị mị nyị ịhyẹrẹ anị, Aza ana kwẹẹtẹ tù wu, vị ọnị ịhyẹrẹ ẹnịnị aa nyị mị.

²² Mị ka mị nyayịnẹ nyị ịhyẹrẹ ẹnịnị, dị mị za wa ọnịvị amị nị.

²³ Ohomorihi, zama mi re, dị wa yẹ ayị amị. Mị ka wa zama mi re dị wa yẹ ịsị mee ro.

²⁴ Mị ka wa zama a, mèe re ịsa odivi ịnị ayị amị. Navọ wa sị mi và tụra oze awụ ana jẹẹ pooro zịna-zịna.