Ahẹ Ụgama 118 - IWE ỌNỊNỊ

Ọza oni Ohomorihi si ehuna yị ộ kụ́ ọ avọ

¹ Waa kụ́ Ẹnẹyịmavara avọ, agụvị ka ịsa ene zoza ọọ̄ mẹ nị. Avọọ ọ́ mẹ̀ ree sì ịrẹyị ọza pooro nị.

² Anisirẹrị ẹ̀ẹ vavọọ kà a ka vi óō sì ịrẹyị ọza pooro nị.

³ Aneehi Eerọnị ẹnị ẹ̀ rẹẹ kà a ka vi óō sì ịrẹyị ọza pooro nị.

⁴ Avaba aza ana nyị angwahi Ẹnẹyịmavara ẹnị ẹ̀ rẹẹ kà a ka vi óō sì ịrẹyị ọza pooro nị.

⁵ Ịjị ẹngụ amị kata, me nowu na za Ẹnẹyịmavara. Ộ ba mi owu, dị ọ dọ mị hụrẹ ụvọ ọnịvị nị.

⁶ Ẹnẹyịmavara vị ana jẹẹ mị ịrẹma, agụvị avọọ me yi vee hí angwa. Mâ yẹ ka ẹ yị nyị ịsị ọza zụ sị mẹ mị.

⁷ Ẹnẹyịmavara vị ana jẹẹ mị ịrẹma dị aa gụ mị ụvọ. Ẹma vaa nyị ẹbẹẹba ọnịvị amị nị.

⁸ Ọza òo zwe na tẹ̀ ịda Ẹnẹyịmavara, ọnị ọ dà hi hu ka ọ̀ na sị ayị tụra ọza nị.

⁹ Mị ka ọza òo zwe na tẹ̀ ịda Ẹnẹyịmavara ọnị ọ da hi hu ka ọ̀ na sị ayị tụra aza ẹbanyị nị.

¹⁰ Avaba anẹhẹ ệ kwẹẹtẹ tù mi okiri-okiri, ama Ẹnẹyịmavara ọ̀ sị ụkata mị ka ma wụ̀ wa va ha.

¹¹ Mị ka okiri-okiri ẹ kara mị nị ama Ẹnẹyịmavara ộ sị ụkata mị ka ma wụ̀ wa va ha.

¹² Ọnịvị amị ẹnẹẹ vị ana gụ kara mị nyụụ anka ẹhụ avọọ. Avọọ e mè re sú va ha ịsọnị-ịsọnị anka ịra mẹ̀ẹ rị ikeyi avọọ nị. Ẹnẹyịmavara ộ sị ụkata mị ka ma wụ̀ wa va ha.

¹³ A mẹ̀ tụ́ mị ụvọ nọ ịrẹma, o sị vọ chee ma sị hyẹdụ, ama Ẹnẹyịmavara ọ raa gụ mị ụvọ.

¹⁴ Ẹnẹyịmavara ọ raà mẹ ka ma nyị ụkata, ọnị mị vaa jị ahẹ gono nị. Ọnị aa dọ mịị há nị.

¹⁵ Aza ana aa mẹ̀ ebira ana vọrọ vị ẹnẹ vee nowu dị ẹ yaa jẹ ịrajẹ ka ẹnị ẹ sị ehuna nyị. Dị ọ ka Ẹnẹyịmavara ọ raà sị ụkata anị mẹ ịtọmatọpa.

¹⁶ Ọ raà sị ụkata anị mẹ ka ye huna ọnịvị ayị. Ọ zụ kụ̀ ịrẹkụ ẹnẹmẹhị.

¹⁷ Mẹ yị vee sú, aanị m màa yà ẹhẹ dị maa kà ịrẹyị ịsa ọnị Ẹnẹyịmavara mẹ nị.

¹⁸ Ẹnẹyịmavara ộ tana ụvọ za mị ẹtẹẹtẹrẹ, ama ọ rẹ vaa zẹẹ ka me sú.

¹⁹ Nā oze ịzị aza ana aā mẹ̀ ebira ana vọrọọ zịị ngụ eehi mị, dị ma ngụ eehi dị ma na kụ́ Ẹnẹyịmavara avọ.

²⁰ Oze ana na ngụ ịzị Ẹnẹyịmavara yà yị, aza ana aā mẹ̀ ebira ana vọrọ ẹ zụ zị avọọ ngụ eehi.

²¹ Ẹnẹyịmavara, mị vaa kụ́ wụ avọ. We reè tụ́ mi ohi, wa sị mị dọ tụ́.

²² Ịrẹta ana aza anaa tụra irehi yi tịtẹ ka ẹ yị nyị ịsị ọ rụra mẹ ọ vana vị ọzẹnya irehi nị.

²³ Ẹnẹyịmavara ọ vavọọ mẹ nị, ịrẹyị ịtọmatọpa ọ vị ini eyi ayị nị.

²⁴ Ẹnẹyịmavara ọ maanị mẹ ka ya nyị ehuna ajịnị nị, à vẹ vị yaa jẹ dị yaa mẹrị ajịnị.

²⁵ Ẹnẹyịmavara navọ wa dọ yị tụ́, navọ di ye re mẹ.

²⁶ Ọza ẹnị Ẹnẹyịmavara tụ́ aa vẹ aanị vi oni o vee zee yị. Ẹyị hi ini eehi Ẹnẹyịmavara, yaa kà a ka ò zee wu.

²⁷ Ẹnẹyịmavara ọ vi Ohomorihi nị. Ọ raà mẹ ka ò zoza yị. Jị avị rị ụvọ, dị waa jẹ ịrajẹ nịnị, dị waa nyị ẹzẹẹ kara aha ịsọvọ nịnị.

²⁸ Ẹwa vi Ohomorihi amị nị, mị vaa kụ́ wụ avọ, mị ka ẹwa vị Ohomorihi amị nị, maa sị ụbanyịị wụ.

²⁹ Waa kụ́ Ẹnẹyịmavara avọ nịnị agụvị ka ịsa ene zoza ọọ̄ mẹ nị, avọọ ò mè ree sì ịrẹyị ọza pooro nị.