Ahẹ Ụgama 105 - IWE ỌNỊNỊ

Ohomorihi ọnịrị aza anị

¹ Waā kụ́ Ẹnẹyịmavara avọ, dị waā kà ịrẹkụkụ anị nịnị. Waā kà ịsa ọnị ọ mẹ yị aza nịnị.

² Waā jị ahẹ gono o, dị wa sịị kụ́ ọ avọ nịnị. Waā kà ịtọmatọpa ọnị ọ mẹ yị aza nịnị.

³ Waa jẹ nịnị ka wâ vị aza anị nịnị. Avaba aza ana aa hẹkẹ Ẹnẹyịmavara ẹ̀ẹ jẹ.

⁴ Wē nee tù Ẹnẹyịmavara kà ọ̀ gụ wụ nịnị ụvọ, dị waa hẹkẹ ẹnịnị pooro.

^5-6 Ẹwụ nịnị ezi Abụrahamị, ana vị ozi ahụ Ẹnẹyịmavara, ẹwụ nịnị ezi Ijekọvụ ọnị ọ nyị tamayị ụkọrọ ịvọpa irenyi-irenyi ẹnị Ẹnẹyịmavara mẹ ọnịrị ọ mẹmẹ jị ịvị yị ọnịvị nịnị.

⁷ Ẹnẹyịmavara ọ vị Ohomorihi ayị nị, ọda amị vị ọnị ọ mẹ yị avaba anẹhẹ.

⁸ Ộ tamayị ịrẹyị ọnị ọ kà tịtẹ ka ọnị vaa mẹ. Ịrẹyị ọnọọ o mē jesi pooro, Ịrẹyị ọnọọ vị ana jị jẹẹ yị ezi ịrẹma-ịrẹma ana vanaa vẹ.

⁹ Ịrẹyị ọnọọ vị ọnị ọ vịdị kà yị Abụrahamị, dị ọ rẹ hị́ eku anị yị Ayiziiki ka ọnị vaa mẹ̀ ẹ nị.

¹⁰ Ộ vana tenyi ahụ ịrẹyị ọnọọ jẹẹ yị Ijekọvụ dị ọ mẹ̀ ẹ ọda ka Anisirẹrị nịnị ka ẹ̀ si eyi pè e pooro zịna-zịna nị.

¹¹ Ộ kà a yị wa ka ẹnị ọnị vaa sị ẹtẹ Ikenanii yị nị, dị ahịka ẹnị ẹ kụkụ nyị ịzọọ nị.

¹² Anisirẹrị nịnị vịdị aa chee aanị, ẹ yị nyị ẹ yà,

¹³ dị ahịka vị ẹ yaa ngụ ẹkụraa zị nị. Ẹnịnị vị anaā hụụnị ẹtẹ ọnyị naa ngụ ịnị ẹtẹ ọsa.

¹⁴ Ohomorihi ọ yị zẹẹ ka ọza ọnyị ọza ọnyị ọ̀ mẹ ehuna yị wa. Ộ hụ ụvị ẹnịnị kà ohinọyị ọ̀nọ̀ ka

¹⁵ asị ẹ sị ụvọ kanyị aza anị. Ọ rẹ ka asị a nyị ịsị ẹ sị mẹ ọnịsẹ anị.

¹⁶ Ohomorihi ộ kụ́ ụngwẹ na ngụ ịnị ẹtẹ Anijipiti, di o du avaba ịsọyịrị ẹnịnị ha nị.

¹⁷ Ama Ohomorihi ộ vịdị raà tụ́ ọza ịnya dọ ọvịdị. Anisirẹrị nịnị. Ọza ọnọọ ọ rị Ijosẹẹhụ nị, ẹnị ẹ vịdị ná ọrịhị.

¹⁸ Ẹ mẹ̀ kụ́ ịchẹkẹchẹkẹ hi Ijosẹẹhụ ahụ, ẹ kụ́ ọ tụ̀ ụnava. Ẹnịnị vị ana rẹ sị enyusẹ tụ́ ọ ọbẹ.

¹⁹ Avọọ ẹ mẹ̀ mẹ Ijosẹẹhụ pooro dị ịrẹyị ọnị ọ kà tịtẹ sị sẹ nị. Ịrẹyị Ẹnẹyịmavara ộ sị zụ̀ ka Ijosẹẹhụ vị ana aa kà ịzẹyịza.

²⁰ Ohinọyị anẹkụra ọnọọ ộ tụ́ ka à na sị Ijosẹẹhụ dị à hụrẹ ẹ hụụnị ẹngwa.

²¹ Di ohinọyị ọnọọ sị Ijosẹẹhụ mẹ ọga irehi anị, dị ahịka Ijosẹẹhụ ọ kụkụ sị eyi pè avaba ogu ọnị ọ nyị nị.

²² Ijosẹẹhụ ọ kụkụ aa sị ịsaa zụ̀ ezi ohinọyị, dị aa kọ azọkụ nịnị ịrẹyọyẹ nị.

²³ Di Ijekọvụ va na Ijipiti, dị ọ na vị ọzọga tụ́ Ihami nị.

²⁴ Ẹnẹyịmavara ộ mẹ̀ ka aza anị ọ̀ rụrụ ẹtẹẹtẹrẹ, ệ hyakụ sị ụkata nyị huna ọnịvị ẹnịnị.

²⁵ Ohomorihi ộ mẹ̀ ka Anijipiti ẹ̀ kụkụụ kụ́ ayị Anisirẹrị, dị ẹ hyakụ ee vene wa bẹẹ nị.

²⁶ Di Ohomorihi va tụ́ Imosiisi ozi ahụ anị ọnịrị Eerọnị ọnị nyị,

²⁷ dị ẹ na mẹ̀ ụkọrọ ịvọpa ẹbanyị-ẹbanyị ịda Anijipiti nịnị ịnị ẹtẹ Ihami nị.

²⁸ Ohomorihi ộ mẹ̀ ka etohozi ò chi kú ẹtẹ ẹnịnị, ẹnịnị ẹ yị zụ họ̀ ọ use.

²⁹ Ohomorihi ộ rẹ vara avaba enyi ẹnịnị, di ivovo ene hi ịnị anị sú và ha nị.

³⁰ Iruvu ọ va chaka hi ịnị ẹtẹ Anijipiti, dị ẹ hyakụ aa hịrẹ ịbẹẹdị ohinọyị ẹnịnị bẹẹ nị.

³¹ Ohomorihi ộ mẹ̀ ọda, di isi nịnị kọ̀mi vẹ ịnị ẹtẹ Ijipiti, di ikukurumi gwẹtẹ kẹnẹ nị.

³² Ohomorihi ọ rẹ mẹ ka orihi ana aa zụ̀ ọ̀ vara ata ihinẹba, dị apaana ihinẹba aa há ịnị avaba ẹtẹ ẹnịnị nị.

³³ Ọchị ịvayịnị ọnịrị ihwigi vị ana apaana ihinẹba du ha neberi ọchị ana vọ ene hi ịnị ẹkụra ẹnịnị.

³⁴ Di Ohomorihi rẹ kà ịrẹyị, dị akụvarịva ọnịrị ịchacha chaka hi ịnị ẹtẹ ọnọọ nị.

³⁵ Dị ẹ za avaba avị ohwoohu ene hi ịnị ẹtẹ ọnọọ, dị ẹ rị ọ za ẹtẹ nị. Ịsa ịnị aarẹ vị ẹnị ẹ rị saka-saka.

³⁶ Di Ohomorihi va za avaba ozi ịpaapa Anijipiti dị ọ wụ̀ wa nị dị ọ wụ̀ wa nị. Avaba ozi ịpaapa ẹnịnị ọ wụ nị.

³⁷ Dị ọ kụ́ Anisirẹrị jịnẹ, dị ọ hara igooru ọnịrị ẹkẹhị nị, nyị ikonya ẹnịnị ẹnị ẹngụ zị.

³⁸ Angwa Anisirẹrị vi ene ee hi Anijipiti, agụvị avọọ Anijipiti vị ana aa jẹ ka Anisirẹrị ệ vụrị si hu.

³⁹ Di Ohomorihi gana eguhi kú Anisirẹrị, dị ọ sị ịra yị wa ka è sii re ẹtẹ nị.

⁴⁰ Anisirẹrị ka ẹnị aa rị uye, di Ohomorihi kụ́ irekwose va yị wa nị. Ộ sị ịsọyịrị ihinẹba va yị wa ệ rị, ịnẹ ộ há wa.

⁴¹ Ohomorihi ộ há ịrẹta irenu, dị enyi aa káa jịnẹ, di ee sì anka okuha avọọ ịnị ụnọmị nị.

⁴² Ohomorihi ộ vavọọ mẹ agụvị ka ộ tamayị ịrẹyị ọnị ọ kà yị Abụrahamị ozi ahụ anị ka ọnị vaa mẹ.

⁴³ Ohomorihi mẹ̀ kụ́ aza anị oni ọ sị nyị jịnẹ hụrẹ Ijipiti, ẹnịnị vị ana aa jẹ di e yee nowu.

⁴⁴ Ohomorihi ộ sị ẹtẹ anẹkụra ọsa yị wa, dị ahịka ẹnị ẹ vana kụ́ ogu ana aza ẹnẹsa re osiye anị nị.

⁴⁵ Ohomorihi ộ vavọọ mẹ agụvị aza anị ẹ̀ zụ sị eyi pè ọda anị, dị ẹ̀ẹ saasa a. À vẹ vị yaa kụ́ Ẹnẹyịmavara.