Ahẹ Ụgama 103 - IWE ỌNỊNỊ

Ịzị Ohomorihi mẹhị sì ịrẹyị ọza ne tù

¹ Vị a vọrọ ka maā sị avaba ayị amịị kụ́ Ẹnẹyịmavara nị, â vọrọ ka maa kụ́ ọ avọ.

² Â vọrọ ka maa kụ́ Ẹnẹyịmavara, dị maa tamayị avaba ịsa ọnị ọ mẹ mị.

³ Ọnị ọ và hụụnị avaba ebira odivi ọnị mị mẹ yị mị, dị ọ mẹ avaba ịhị ana za mị nị.

⁴ Ọnị ọ dọ mị tụ́ ka asị mi sú, di o sì ịrẹyị amị dị aa vayị amị nị.

⁵ Ịsa ozoza oni mee sì vị ọnị ọ kụ́ mị dị ọ hụ̄ mị, dị mị kụkụ yà anka ozweyi avọọ, dị mị rẹ nyị ụkata anka ukokoro nị.

⁶ Ẹnẹyịmavara ọ ma mẹ eyida, ọọ̄ mẹ̀ ịsa ana vọrọọ yị aza ana aza aa mẹ ehunaa yị.

⁷ Ọnị ọ sị ịsa ọnị ọ vaa mẹẹ zụ̀ Imosiisi, dị ọ rẹ sị ụkọrọ anị zụ̀ Anisirẹrị nị.

⁸ Ẹnẹyịmavara vị anaā vayị ọza ẹtẹẹtẹrẹ, ọ mā hụra kụ́ ayị, ama oō sì ịrẹyị ọza ẹtẹẹtẹrẹ.

⁹ Ọ mā tụ́ ọza ohuvọ kù, ọ mā rẹ kụ́ ayị gọdọ.

¹⁰ Ọ mā kà a ka ọnị aa mẹ ebiraa hi yi anka ebira odivi ẹnị ẹ yaa mẹ. Ọ yị kà ka ọnị aa sị ịvị ayịị sị yị ụta.

¹¹ We re ịzị ihinẹba noze rịrị ẹhẹ dẹngụ ne tù, avọọ o mè sì ịrẹyị ọza ene hí angwa anị nị.

¹² Anka ịzị ọyị zịị hụrẹ mẹ̀ noze rịrị ịzị ọ zịị naa ngụ ẹtẹ, avọọ Ẹnẹyịmavara mẹ̀ sị ebira odivi ayị noze rịrị ẹyị nị.

¹³ Anka ada ozi mẹ̀ẹ vayị ozi anị avọọ, avọọ Ẹnẹyịmavara mẹ̀ẹ vayị ọza ene hí angwa anị nị.

¹⁴ Ẹnẹyịmavara ộ yẹ ọ mẹmẹ mẹ yị, Ộ yẹ ka ezi kẹnẹ ị vị nị.

¹⁵ Ẹhẹ ọza vị ana si mẹẹ anka ododo ịnị avị avọọ. Ịsọnị-ịsọnị dị ọ yara hi ẹtẹ,

¹⁶ dị ahị maanị tụ́ kú ọ, dị ọ rẹ ta. Dị ayị wụsẹ hi ka â nyị ịzị ẹ vịdị vavọọ nyị ododo.

¹⁷ Ama Ẹnẹyịmavara vi eneē sì ịrẹyị aza eneē hí angwa anị pooro zịna-zịna. Ịsa ana vọrọ ọọ̄ mẹ yị ezi ẹnịnị ịrẹma-ịrẹma nị.

¹⁸ Avọọ ọ mẹ̀ vaa mẹ yị aza ana jẹẹ pè ịrẹyị anị, dị e tamayị ka ẹnị aa saasa ọda ọnị mẹ nị.

¹⁹ Ẹnẹyịmavara ọ raà rị ohinọyị tụ́ ẹbẹẹba ọnị aa mẹ ohinọyịị tụra avaba anẹhẹ nị.

²⁰ Ẹwụ nịnị anggẹẹrị anị ana nyị ụkata ana aa mẹ̀ ịsa ọnị ọ kà waā ga ọ nịnị.

²¹ Avaba, ẹwụ nịnị ene hi ẹbẹẹba ana vi ezi ahụ Ẹnẹyịmavara, dị waa mẹ̀ ịsa oni o sì, waa kụ́ ọ nịnị.

²² Ẹwụ nịnị avaba ịsa ẹnị Ẹnẹyịmavara mẹ hi ịzị ọ rị ohinọyị tụ́, waā kụ́ ọ nịnị, vị a vọrọ ka maā kụ́ Ẹnẹyịmavara avọ nị.