Ahẹ Ụgama 102 - IWE ỌNỊNỊ

Ịpọda ọza ọnị ụya aa rị

¹ Ẹnẹyịmavara, navọ wa wụ́ ịpẹ ọnị maa dá. Navọ kwogwo wa wụ́ owu ọnị maa na ka wa ba mi owu.

² Navọ asị ụ hụrẹ mị ụvọ, màa yà ịnị ẹngụkata. Navọ kwogwo màa hị́ wụ we jintu tụ́ mi ohi.

³ Nyị ẹhẹ amị yà, ịsọnị-ịsọnị dị ộ ta anka eguhi avọọ. Avaba ẹngụ amị ọ sị jịnẹ ịra.

⁴ Ê tụ́ mi pooro, mị kụkụ tịtẹ anka avị ana sị wụ avọọ, mẹ yị hyakụ kụkụ zụ rị ịsa.

⁵ M mè nowu pooro, mâ ta kwọrọ na za agịga.

⁶ Mị kụkụ sị mẹẹ anka inomi odivi ana aa ngụ ini eburuu zị avọọ nị.

⁷ Mị kụkụ hụtụ anka inomi ịrịnya anaā yà ịrẹsụ irehi avọọ.

⁸ Ọnịnị amị vị ana aa kụ̀ mị ụhụ pooro kẹnẹ. Ẹnị ana aa mẹ mị isiya vị anaā kà a yị ọza ka o du ọ kù anka a mè du mi kù.

^9-10 Ụ mẹ̀ kụ́ ayị hi mi pooro wê chema mị wê ne mi ta. Dị mị kụkụ aa ká atịtọọ rị, di mee hú ẹgọ ọnịrị enyi nị.

¹¹ Ẹhẹ amị vị ana yà chee anka ụmọmọ ọnị ọzaā re oruva avọọ, ịsọnị-ịsọnị dị ộ ta anka avị avọọ.

¹² Ẹnẹyịmavara ẹwa vị ohinọyị pooro zịna-zịna nị, aza vị ana vaa tamayị awụ pooro zịna-zịna.

¹³ Mâ yẹ ka ụ vaa kwẹẹtẹ dị wa vayị Anịzayọnị ụmẹ ọnị ụ nyị ka wa sị vayị anị òo si tụ́.

¹⁴ Ezi ahụ awụ vị ana nyayịnẹ sì ịrẹyị Anịzayọnị. Ọ̀ọ daka zee e eyi ọ sị jị eburu, ẹnịnị vị ana aa vịị vayị Anịzayọnị

¹⁵ Avaba anẹhẹ vee hí angwa Ẹnẹyịmavara, dị avaba ohinọyị anẹhẹ aa sị ụbanyịị yọ.

¹⁶ Ẹnẹyịmavara o reè tenyi dà, ọ vaa sị zụ̀ ka ọnị ộ nyị ụbanyị.

¹⁷ Ọ vaa wụ́ ịpẹ oni oniruwa nịnị aa dá, ọ yị vaa si eyii wụ̀ wa.

¹⁸ Maanị chẹrẹ ẹ tịtẹ nịnị yị ezirẹma, di aza ọnị ọza ọ̀ yị ma ẹ̀ va zụ kụ́ Ẹnẹyịmavara.

^19-20 Chẹrẹ ẹ ka Ẹnẹyịmavara mẹ̀ yà ini eehi anị ẹbẹẹba ộ kana eyi vachi. Ọ̀ mẹ̀ kana eyi vachi di o re ẹhẹ, ộ wụ́ aza ana a za hi ini ẹngwa mèe nowu. Dị ọ kụ́ avaba aza ẹnẹẹ ana a raà mẹ̀ ọkarẹyị isu yị hụụnị ẹngwa nị.

²¹ A vaa kà ịrẹkụkụ Ẹnẹyịmavara yị Anịzayọnị, dị Anijerusarẹmị aa kụ́ ọ avọ.

²² Anẹkụra ọza ẹ̀ẹ maanị sị wara gụ dị ẹ yaa tanaa tụra ẹtẹẹ yọ nị.

²³ Ịjị mị ta jẹẹ ịnị ụmẹ, Ẹnẹyịmavara ộ dọ mị ụkata anị, dị ọza ẹhẹ amị dị ọ dà a ẹjịjị nị.

²⁴ Dị mị va ka Ohomorihi amị, asị ụ yị sị mị hụụnị ẹhẹ dê, wáā yẹ ka ẹwụ vị ana yà ịzọọ pooro zịna-zịna

²⁵ Dị mị rẹ ka hụrẹ ụmọrụmọ ọnị ọ sị ẹhẹ ọnọnị jẹẹ hị́, ọnị ọ rẹ mẹ ẹbẹẹba nị.

^26-27 Ẹhẹ ọnịrị ihinẹba vee bo anka awuru avọọ, dị ọ vara wa dị ẹ ta, ama ọnị Ohomorihi vị ana vaa yà ịzọọ pooro.

²⁸ Ezi eyi vee hi ịda awụ di wee sere wa, dị ụ mẹ ka ezi ẹnịnị ẹ nyị ahụ jẹẹ ịda awụ.