Ahẹ Ụgama 10 - IWE ỌNỊNỊ

 mẹ̀ aduwa ka Ohomorihi ọ̀ dọ ọnụyọrị tụ́

¹ Ẹnẹyịmavara, ịrẹyị o tù yị aanị nọ Navọ asị ụ sị ẹngụ tẹ Aarịhịnị navọ wa kà pè yị.

² Aza edivi vi ene ee wuu zị di e yee sì ọkụmịị zị ka ẹnị ẹ̀ chamayị yị wa Ịrẹpa ana aza edivi va vị ana rẹ vaa vara eyii za wa.

³ Aza edivi vi ene eē sì ịsa edivi di e re yee sii wo oto bẹẹ Ọnọhọha ẹnẹẹ aa kụ̀ Ẹnẹyịmavara ụhụ dị ẹ yaa sị ọ mẹ enyinyi nị.

⁴ Aza edivi vi ene ee wo otoo zị ẹ yị kà ka ẹnị ee sì Ohomorihi. Ẹ yị nyị ụmẹ ọnị ẹ hyakụ sị tamayị Ohomorihi ịnị ayị ẹnịnị.

⁵ Aza edivi nịnị ee re mẹ pooro kẹnẹ Ẹnịnị vị ana aa mẹ eyi, ẹ yị yẹ ka ụ vaa mẹ̀ ọkarẹyị yị ẹnị Èe re ọnịvị ẹnịnị di e yee wuu hi wa.

⁶ E yee ro o ịnị ayị ẹnịnị ka ẹ yị nyị ịsị ẹ vaa mẹ ẹnị Ẹ ka ẹ yị vaa nyị ịrẹyị pooro.

⁷ Irenu ẹnịnị ọ mā kà ọyịza paa Ẹnịnị vi ene eē cheeche, dị ẹ yaa mẹ ehunaa yị aza.

⁸ Aza edivi vị ana naa tẹẹ ee be onuruwa ịnị ẹkụra di e yee zi aza ẹnẹ ẹ̀ yị nyị ịsị ẹ mẹ̀ ka ẹnị ẹ̀ wụ̀ wa. Oniruwa vị ọnị e yee bè, ama aza edivi ẹnẹnị vị ene ee yii be wa.

⁹ Aza edivi ẹnẹẹ vị ana sị mẹẹ anka idu avọọ Ẹnịnị vị ana naa tẹ di e yee be aza ẹnị ẹ yẹ ka ẹ yị nyị ụkata Èe re ọkụmị nịnị dị ẹ ji kú wa.

¹⁰ Oniruwa vi ana và nẹtẹ, ụvọ aza edivi oni o kú wà.

¹¹ Ama di e yee ro o ka Ohomorihi ọ yị vaa tamayị Ẹ ka Ohomorihi ọ yị hyakụ vee re ẹnị pooro.

¹² Ẹnẹyịmavara, navọ wa kwẹẹtẹ wa sị ụya rị aza edivi ẹnẹnị! Navọ wa tamayị aza ana maanị aa rị ụya.

¹³ Aza edivi ẹnị aa sị Ohomorihi mẹ enyinyi ama dị ẹ ka Ohomorihi ọ yị vee họ̀ use.

¹⁴ Ohomorihi, wee re aza ana aa rị ụya di e hi ịnị ẹngụkata Mâ yẹ ka ụ vaa gụ wa ụvọ Ọnụyọrị nịnị vị ana sị ẹngụ ẹnịnị chire wụ ụvọ Ẹwụ a gụ ezi-oku nịnị ụvọ nị.

¹⁵ Ohomorihi, navọ wa dọ aza edivi ụkata. Sị ụya rị wa agụvị ịsa edivi ẹnẹ ẹ yaa mẹ. Sị ụya rị wa pooro dị ẹwụ ịnyẹmba o re ka ẹnịnị ẹ yị kụkụ mẹ̀ ebira odivi.

¹⁶ Ẹnẹyịmavara ọ vị Ohinọyị pooro zịna-zịna nị Aza ẹnị ẹ̀ yị hẹkẹ ẹ vi ene vee vú ẹtẹ hụrẹ ẹtẹ.

¹⁷ Ẹnẹyịmavara, mâ yẹ ka ụ vaa wụ́ ịpọda oniruwa nịnị, ụ rẹ vaa gụ wa ụvọ.

¹⁸ Ọnụyọrị ọnịrị ozi oku nịnị ene ee nowuu hị́ wụ ụ rẹ vaa ba wa owu. Vavọọ mẹ̀ ẹ agụvị asị ọzarẹyịrẹsụ rẹ kụkụ chire ẹtẹ angwa.