Ahẹ Isoromọnị 8 - IWE ỌNỊNỊ

Ozi ọnẹẹ ọnọọ kà

¹ Àa yẹ ahịka ẹnẹbẹnị amị ụ vị̀ nị; dị ahịka ịrẹva ọnyị amị u hú nị. Màa yaanị gẹrẹ wụ oze, dị mi kú u irenu nị, ẹ́ yị nyị ọza anaa sị́ ayị nọ ịnị anị.

² Maa sị wụ nọ ịnị eehi ọnyị amị, dị wa na kọ yị mị á memee sì ẹngụ. Mị vaa sì eyi eche ene hinee ọnịrị enyi ẹtụtụ ọchị ipomegiraneti ana á kama yị wụ.

³ Si ụvọha pe mi ịrẹsụ, dị wa sị ụvọrị awụ zá mị kú ayị.

⁴ Hị́ eku mi nịnị ẹwụ nịnị anyẹnẹẹ Anijerusarẹmị, ka wẹ yị vaa kwọ vee zigi yi nịnị yàa mẹrị ẹngụ.

Ahẹ Ọhụhịnọnyị Anẹẹ Anijerusarẹmị

⁵ Ẹnẹ maanị jị ụvọ chire ọza ọnị ó sì ịrẹyị anị hụụnị ụnọmị aa vẹ aanị? Mâ ha wụ hụnị ara iruvo ọchị apụrụ. Ịzọọ ọnyị awụ yá barẹẹ awụ di ọ́ ma wu nị.

Ozi ọnẹẹ ọnọọ kà

⁶ Navọ ịrẹyị amị ọ̀ yà ịnị ayị awụ pooro, sị ụvọ za ẹmị ịnya kẹnẹ, agụvị ka ịrẹyị ọza ọyị sì ô nyị ụkata anka iswọọza. Avọọ ụhị ọyị kụ̀ ọnị mẹ̀ re divi nị. Ọ̀ọ da ịra, vị ộ za wụụrụ anka ịra ọdẹngụ avọọ nị.

⁷ Enyi ọ̀ọ rụrụ pooro, é yi zụ mi ịra oyisì ọnị ọza ọ nyị yị ọza. Ọhaara enyi ẹ́ yị zụ kụ́ ọ kwooze. Ọza ọ̀ọ ka ọnị aa sị avaba ogu anị yị aza ka è sì ịrẹyị anị, ịyẹyẹ kẹnẹ aa sị ẹngụ anịị mẹ̀ nị.

Ọhụva ana vị Ọnẹẹ

⁸ Yaa nyị ọyịnyara ọnẹẹ ọnyara, ozweyi ọ́ vị nị. Ệ yị ha ịrẹva. Sị́ yị vaa mẹẹ yị ọ ịhị ọnọrụ ọ̀ọ va zị ụsẹ anị kẹ?

⁹ Ọ̀ọ sị ụvọ za ẹngụ anị, dị ẹ̀ yị mẹ kẹnẹ-kẹnẹ nị, Ị vaa sị ọmọ mẹ̀ ẹ ọvị. Ama àa mẹ kẹnẹ-kẹnẹ dị ẹ yị sị ụvọ za ẹngụ anị nị, i vee sere e anka a mẹẹ̄ sị ọchị isida mẹ ukere gù oze avọọ nị.

Ozi ọnẹẹ ọnọọ kà

¹⁰ Ọvọ mị vị nị, ịrẹva amị vị ana jẹẹ jẹjẹrẹjẹ anka irehi ọgọdọ avọọ. Ọza ene sì ịrẹyị amị ộ yẹ́ ka, màa sị vị anị.

Ozi Ọnọrụ ọnọọ kà

¹¹ Isoromọnị ộ nyị ụbazị ene é chịrẹ ịvayịnị hi tụ ịzị aā hị́ Ịbaarị-Ịhamọnị. Â nyị ana aarẹ nịnị ọnị ọ́ sị mẹ yị ịzọọ. Ọzọza vị ọnị ọ ka ò vee sí ụta achuchu ẹẹhị-ẹẹhịị yị ọnị.

¹² Isoromọnị ọ́ zụ nyị achuchu ẹẹhị-ẹẹhị, dị ana aarẹ ẹnẹnị nyị achuchu ọnya-ọnya ẹnịnị. Ẹma nyị ụbazị ịvayịnị amị nị.

¹³ Yà ịnị ụbazị wa kà ịrẹyị dị ma wụ, ẹwụ ọnị mi sì ịrẹyị anị. Ọpọọpa amị ee zí ka ẹnị ẹ̀ wụ́ ịrẹyị awụ o.

Ozi ọnẹẹ ọnọọ kà

¹⁴ Ẹwụ ọnị mị maanị sì ịrẹyị anị, wa ka mịị vẹ, anka ozi ùnè avọọ. Wa vẹ anka ùnè ana si hụ tụ ịnị ataba ịzị a kụ́ avị ịsẹpẹ hi avọọ.