Ahẹ Isoromọnị 7 - IWE ỌNỊNỊ

Isoromọnị ô gono ose anị

¹ Tee! ọnẹẹ ọnọnị, wee zoza o. Ahụ awụ vavọọ tịtẹ ọyịza-ọyịza ịnị adava kẹnẹ. Usi awụ tịtẹ mọrọmọrọ kẹnẹ. Ọza ana a mẹ̀ ẹ ô ye eyi ụkọrọ ẹtẹẹrẹ o.

² Ịrajẹ awụ tịtẹ yooro ịpa ene eche ẹ̀ yị ma ta hụụnị anị avọọ. Ịrẹka awụ vị ana sị mẹẹ anka ihwiiti ọdụ ọnya ana á kụ ododo ọyịza-ọyịza kara avọọ.

³ Ịrẹva awụ vị ana sị mẹẹ anka ozi adẹgụnẹva ùnè avọọ. Mị ka vị ẹ́ sị mẹẹ anka ùnè oweyi ẹẹva avọọ nị.

⁴ Ọrọkọ awụ vị ana jẹẹ gaa ọyịza-ọyịza anka irehi ọgọdọ avọọ. Eyi awụ aa zá teere anka enyi ini imisi ẹkụra ana aā hị́ Ịhẹsịbọnị ọnị ọyị và ọpa tụra avọọ. Imisi ẹnẹẹ vị ana gụrị oze ọbanyị ẹkụra ọnọọ. Aahị awụ ô zoza pooro anka irehi ọgọdọ ana ya Ịrẹbanọnị ana va ẹkụra ana aā hị́ Ịdamasịkọsị chire.

⁵ Ịrẹsụ awụ vị ọnị ụ kụ̀rà jẹẹ gaa anka ataba Ịkamẹẹrị avọọ. Ẹyị ọnị u gú tụụ ịrẹsụ aa zá kẹnẹ. Ịzị ó zoza na za, ohinọyị òo ré e, vị ee hí ayị ẹngụ anị nị.

⁶ Tee! Wee zoza o. Ụ tịtẹ ọyịza-ọyịza kẹnẹ. Oyisì ọnị ụ sì ịrẹyị amị vị anaa sị́ ayị amịị hine pooro kẹnẹ.

⁷ Waa vá ọza anka ọsọchị avọọ. Ịrẹva awụ tịtẹ hyọrọ-hyọrọ anka asaka asẹ enee ví ịrẹsụ ọsọchị avọọ.

⁸ Maà hịrẹ ọsọchị ọnọnị dị ma na hụ̀ asẹ anị. Mèee ré ịrẹva awụ vị ẹ́ sị mẹẹ anka avụsụ ẹtụtụ ọchị igirepi avọọ nị. Wàa tụ́ ụhwẹ dị ọ dagụ anka ẹtụtụ ana aā hị́ apụrụ avọọ.

⁹ U me ku mị irenu, irenu awụ ô hine huni eyi eche ozoza. ana tangwa ee sìi vaa chi ini irenu ọza ọnị sì aanị. Di ee sìi vaa tụra onupa ọnịrị anyị anị nị.

Ozi ọnẹẹ ọnọọ kà

¹⁰ Ẹwụ ọnị mị sì ịrẹyị anị, awụ mị vị̀ nị, di eyi amị ọnị raa tụra wụ nị.

¹¹ Waa vẹ de, ẹwụ ọnị mị maanị sì ịrẹyị anị, jẹẹ ya hụụnị ẹkụra dị ya na sụ̀ ịnị avị.

¹² Vẹ ye jintu kwẹẹtẹ ẹnẹnẹ, di ya nọ ịzị ịvayịnị hi, dị ye ne ré èe si nyima ee nyị avị ọwọọwa. Vẹ ye ne ré ọchị ipomagiranati ọnịrị ọchị ana vọ àaa tụ̀ ododo. Ịzọọ mị vaa sị zụ wụ mmẹmẹ sì ịrẹyị awụ nị.

¹³ Avị ododo ana aā hí ịmanadireki aa dagụ. Ma raa kụ ẹtụtụ ọchị ozozoza hi ẹtẹ enoze yị ẹwụ ọnị mị maanị sì ịrẹyị anị, ọkụkụ ọnịrị ọwọọwa.