Ahẹ Isoromọnị 5 - IWE ỌNỊNỊ

Ozi Ọnọrụ ọnọọ kà

¹ Ma raà ngụ ịnị ụbazị amị, ose mi anaā sịị ayị amịị hine. Maa kụ avị irenyi-irenyi ana a sịị̄ mẹ̀ ịsaa hine ọnịrị ịmaya amị gụ. Maa rị ẹhụ amị ọnịrị ụpaha anị. Mee hú eche ọnịrị ịrẹva ụnọ amị. Ẹwụ nịnị ọnị mị sì ịrẹyị anị, rị ịsa, di wee hú nịnị; waa mẹrị nịnị kẹnẹ.

Ezi Anẹẹ Anijerusarẹmị Ahẹ ọhụna Ozi ọnẹẹ ọnọọ kà

² M maa sụ̀ ara, mâ ra ụra ka ọza ọnị mị maanị sì ịrẹyị anị aa sị ụvọọ ka oze nị. Na oze mi de, ẹwụ ọnị mị maanị sị̀ ịrẹyị anị, anaā sịị mị ayịị hine, ẹwụ ọnị mee zi eyi. Eguhi me chire ku mi, ịrẹsụ amị o si horo. Ẹyị ịnị ịrẹsụ amị vị o yi hunẹnẹ.

Ozi Ọnọrụ ọnọọ kà Ozi ọnẹẹ ọnọọ kà

³ Ma raà ngwa ẹnya amị hi ẹtẹ; Sị ẹ vẹ dị maa varẹma kụ ọ hi ẹngụ? Ma raà nyịna ahụ amị; Sị ẹ vẹ dị maa varẹma dọ ọ ọtị?

⁴ Ọza ọnị mị maanị sì ịrẹyị anị mẹ̀ jị ụvọ ngụ ịnị uhwohwo oze, dị ayị mị nyayịnẹ ee hine ka ọ sị gụrị ẹmị nị.

⁵ Ịjị mị kwẹẹtẹ ka ma na oze yị ọ, dị eturare enyeenyi a tọ́ hụụnị ụvọ amị mmẹ sị ụvọ za ụkọkọrọ oze nị.

⁶ Mâ na oze yị ọza ọnị mị maanị sì ịrẹyị anị, ama ó si hu. Aayẹ ma wụ̀ ka aa kà ịrẹyị. Mê sì ọ zịịzị, ama mé yi ré e. Mâ hị́ ọ, ama é yi tụ́ ohi.

⁷ Oserẹtẹ nịnị anaa ngụ ẹkụraa zị ê ré mi, ê tụ́ mi, ệ tọ̀ mị ụnava, dị ẹnị ana vaka ugene ee sere ẹtẹ dọ mị ịta nị.

⁸ Mâ dá ịpẹ yị ẹwụ nịnị anyẹnẹẹ Anijerusarẹmị ka, wèe ré ọza ọnị mị maanị sì ịrẹyị anị ụ kà a mị nịnị. Mme sì ịrẹyị anị pooro, ọ́ sị vara ẹngụ aa zị mị.

Anẹẹ Anijerusarẹmị

⁹ Ewee zoza hu avaba anyẹnẹẹ ana vọ nị, sị́ ọza ọnị ụ maanị sì ịrẹyị anị aanị sí huna aza ana vọ kẹ? Sị́ ẹ yà ịnị ẹngụ anị ọnị ọza ẹ̀ẹẹ yị re da ọnị ụ hụvị anị maanị aa dá ịpẹẹ yị?

Ozi ọnẹẹ ọnọọ kà

¹⁰ Ọza ọnị mị maanị sì ịrẹyị anị aanị oo zoza ẹtẹẹtẹrẹ, dị ọ́ nyị ụkata nị. Ọza irenyi ọ́ vị ịnị akakana ọnọrụ otomiroku nị.

¹¹ Eyirẹsụ anị vị anaa zẹtẹ anka igooru ozoza avọọ. Ẹyịrẹsụ anị aa wụụrụ anị. Ẹyị anị ộ mine anka inomi ana aā hị́ ọrụ avọọ.

¹² Onyeyi anị ô zoza pooro anka onyeyi arivadi ene kú ụtọ okuha; vị́ ọ́ sị mẹẹ anka arivadi anaa vwẹtẹ sẹnẹ-sẹnẹ ụtọ okuha avọọ nị.

¹³ Abamị anị ô zoza pooro anka ụbazị ene é chire avị ozozoza hi, dị áa dagụ kwẹ̀ẹ̀. Irenu anị o zoza anka ododo ana aā Iriri avọọ, dị ọ́ dá eturare enyeenyi sìsi ọ nị.

¹⁴ Ọchụvọ anị sị mẹẹ anka okutẹ ana sị igooru mẹ mọọmọrọ avọọ; di o tò ochirigege hi ụvọ nị. Ẹngụ anị vị ana swa anka ẹhọ̀mị ọdọba ana á sị ịrẹta ọkatarihi ana aā hị́ ịsahwaya mẹ ọvị avọọ.

¹⁵ Ahụ anị ẹyịva ẹẹ vọrọ pooro anka ọhẹ ana á sị ịrẹta ọkatarihi ana aā hị́ arabasita mẹ, di é si hí ịrẹsụ igooru avọọ. Wèe ré e kẹnẹ ụ́ waa kà a ka ataba Ịrẹbanọnị ọnị ọchị Isida hi ịnị anịị yọ nị.

¹⁶ Ịrẹyị irenu anị o hine hu nị. Ịsavịsavị anị vị anaa vá amị. Ẹwụ nịnị anyẹnẹẹ Anijerusarẹmị aanị ọza ọnị mị maanị sì ịrẹyị anị mẹ ya nị ọ.