2 Ohinọyị 8 - IWE ỌNỊNỊ

 sị ẹtẹ ọnẹẹ Anisunami varẹma yọ

¹ Erisa ộ vịdị kà a yị ọnẹẹ ọnị ozi anị su, dị ọ́ ha a varẹma yọ ka, ọnịrị avaba aza anị ẹ̀ kwẹẹtẹ ẹ̀ na ra ịzị ẹ̀ẹ zụ na ra; agụvị ka Ẹnẹyịmavara ọ́ raà kà a ka ụngwẹ vaa kụ̀ ẹkụra ọnọnị. Ọ kà ịrayị ịhịmba ụngwẹ ọnọọ vaa kụ̀ nị.

² Ịzẹyịza ọnẹẹ ọnọọ ộ kwẹẹtẹ, dị ọ na mẹ anka ịrẹyị ọnị ọza Ohomorihi kà yọ nị. Ọnịrị anineehi anị ệ na ra ịnị ẹtẹ Anihwirisiti nịnị ịrayị ịhịmba.

³ Ịjị ịrayị ịhịmba ọnọọ sị gụ, ọnẹẹ ọnọọ ộ va hụrị ẹkụra Anihwirisiti nịnị vẹ. Ô ne tu ohinọyị ka aarịhịnị à sị irehi anị ọnịrị ẹtẹ varẹma yị ọnị.

⁴ Dị o ne tu ka ohinọyị ee pe Igehazi, ozi ahụ Erisa kà ịrẹyị nị. Ọ kà Igehazi ọ̀ kà a yị ọnị avaba ụkọrọ ohyozirenu ọnị Erisa mẹ.

⁵ Igehazi maa yịị kà a yị ohinọyị Erisa mẹmẹ ha ozi ene su kwẹẹtẹ, dị ọnẹẹ oni ozi anị su, dị á ha a vavẹ aanị vana vaa da ịpẹ ịrẹyị irehi anị ọnịrị ẹtẹ anịị yị ohinọyị nị. Dị Igehazi ka, taarụ ohinọyị, ọnẹẹ ọnị ọ naa kà ịrẹyị anị yị; ozi anị ana a ha hụụnị isu rẹẹ̀ yị.

⁶ Ohinọyị ộ họ̀ ọnẹẹ ọnọnị usirẹyị ozi anị, dị ọnẹẹ ọnọnị kà a yọ ịsị ẹ mẹ nị. Dị ohinọyị nyị ọnya ịnị ọdọvịdị anị ka ọ̀ na sị avaba ịsị ẹẹ vị ọnẹẹ ọnọnị varẹma yọ nị. Ọ kà è si ọ ụta avaba ịsa ana a mẹ ịnị ẹtẹ hụrị ịrayị ịhịmba ọnị ọ́ hụrẹ hụụ ịzọọ.

Ịrẹyị Erisa ọnịrị Ịbẹnịhadadị, ohinọyị Isiriya

⁷ Â nyị ẹkụhị ọnya, dị Erisa nọ Ịdamasịkọsị nị, ụmẹ ọnọọ ẹngụ â zị Ịbẹnịhadadị, ohinọyị Anisiriya nịnị. Ịjị ana kà a yị ohinọyị ka ọza Ohomorihi ộ vẹ,

⁸ dị ọ kà a yị ọnọrụ ọnya ana aā hị́ Ihazayẹrị ka; ọ̀ sị ẹyịza rị ụvọ di ò ne tu ọza Ohomorihi nị. Ọ kà ọ̀ da ịpẹ yọ ka ọ̀ họ̀ Ohomorihi ka ọnị wáá vaa rị ẹngụ anaa zị ọnị aanị?

⁹ Ịzẹyịza dị Ihazayẹrị kune ịsa ozoza-ozoza Anịdamasịkọsị tụra ịnyaakụmị ẹbẹẹva, dị o ne tu Erisa nị. Ịjị Ihazayẹrị ne si tu ọ, dị ọ ka, “Ozi ewu Ịbẹnịhadadị, ohinọyị Ísiriya ọ tụ ọnị vẹ nị. Ọ kà ọnị va họ̀ wụ use ka, aarịhịnị ọnị wáá vaa rị ẹngụ anaa zị ọnị aanị.”

¹⁰ Erisa ô tụ́ ohi ka, “Ẹnẹyịmavara ộ sị zụ ọnị ka vị́ o vee su nị; ama ọ̀ na kà a yị ohinọyị ka ọ vaa rị ẹngụ anaa zị ọ aanị.”

¹¹ Erisa ộ va eyi ka a, di ee re e goro-goro nị. Ô re e pooro, dị ụhị kụkụ aa nyị Ihazayẹrị nị. Ụpẹ ọnya kẹnẹ, dị Erisa nyima aa jị òrèrè nị.

¹² Ihazayẹrị ộ họ̀ Erisa ka, sị ẹ vẹ dị ee sụ ùnè? Di Erisa ka, agụvị ka ọnị ộ yẹ ka ịsa ọ vaa sị Anisirẹrị nịnị mẹ, e yi vee zoza ọ ka vị́ ọ vaa rị ịzị Anisirẹrị nịnịị tẹẹ hi ịra, dị ọ wụ ezwọọmụha ẹnịnị ha nị. Ezweyi-ezweyi ẹnịnị vị ọnị ọ vaa sẹ̀ wa rugu-rugu. Ọnịrẹẹ ẹnịnị vị ọnị ọ vaa há ịnẹ, dị ọ wụ̀ wa.

¹³ Di Ihazayẹrị ka, ẹnẹ vị ọnị ana zụ maanị mẹ ụkata? Dị Erisa ka, Ẹnẹyịmavara ọ́ raà sị zụ ọnị ka Ihazayẹrị ọ vaa dọ ohinọyị Ísiriya ịrẹsụ nị.

¹⁴ Ihazayẹrị ộ varẹma ne tu ọga anị Ịbẹnịhadadị, dị ọga anị họ̀ ọ use ka, “Erisa mẹ̀ kà kẹ?” Dị Ihazayẹrị ka, “Ộ kà a yị mị ka ẹngụ awụ vaa nịya nị”.

¹⁵ Ama eyinẹhẹ anị Ihazayẹrị ộ sị ịta ọratụpọ ana aā tụụ ku ịvẹẹdị, dị ọ jị ọ ngụ enyi nị, dị ọ và a ku ohinọyị ẹngụ, di ohinọyị su nị. Ohinọyị ộ wusu, dị Ihazayẹrị dọ ọ ịrẹsụ, dị ọ kụkụ vị ohinọyị nị.

Ijehorami ộ rị ohinọyị Íjuda

¹⁶ Â nyị ozi Ahabị, ohinọyị Ísirẹrị ana aā hị́ Ijorami. Ịnị ana tụ ọ ịrayị ọhụhị ọnị Ijorami ọnọnị rị ohinọyị Ísirẹrị, Ijehorami, ozi Ijehosahwati ohinọyị Íjuda ộ rị ohinọyị Ijuda.

¹⁷ Ozi ịrayị ohurẹẹwụ tụra ẹẹva ọ vị dị ọ rị ohinọyị nị. Ộ mẹ ohinọyị ịrayị ịhịnta Ijerusarẹmị.

¹⁸ Ose anị vị ozi Ahabị. Ộ hama ebira odivi ohinọyị Anisirẹrị nịnị ana vọ anka ovwoovu Ahabị. Ộ rị ịvị Ẹnẹyịmavara.

¹⁹ Ama Ẹnẹyịmavara e yi sì ka ọnị ò vu Ijuda ẹtẹ, agụvị ka ộ vịdị si oto wo yị ozi ahụ anị Idevidi ka ịpa ezi anị ẹ vaa rị ohinọyị Ijuda pooro nị.

²⁰ Ịnị ụmẹ ọnị Ijehorami sị vị ohinọyị, Anedomi nịnị ệ kụ̀ hịrẹ Anijuda nịnị, dị ẹnịnị na nyị ohinọyị ẹnịnị nị.

²¹ Ijehorami ọnịrị avaba aza anị anaā sịị ụkẹkẹ ịrẹkụụ kụ̀ ịrẹkụ ệ nọ ịzị aā hị́ Ịzaya. Ịrahụ dị ẹ kwẹẹtẹ ka ẹnị kụ ịrẹkụ ne tu Anedomi nịnị nị. Isoja Anedomi nịnị ệ họ̀ kara wa, dị ahịka vị ọnịrị isoja vụrị zwe hụụ ịzọọ, dị isoja anị ọzọza zwe nọ eehi ẹnịnị nị.

²² Hụrị ụmẹ ọnọọ pooro ve tu ajịnị Anedomi nịnị vana jẹẹ yị ẹngụ ẹnịnị nị. Ụmẹ avọọ gẹdẹ-gẹdẹ ẹkụra ana aā hị́ Iribina ẹnị rẹ sị kụ̀ hịrẹ Ijuda nị.

²³ Avaba ịsa ana vọ ọnị Ijehorami mẹ, vị ana chẹrẹ tụ ini iwe ịtọpa ohinọyị Anijuda nịnị.

²⁴ Ijehorami ô su, di e ne e tu ịzị ee ne ohinọyị nịnị ẹkụra Idevidi nị, di oze anị Ahaziya dọ ọ ịrẹsụ anka ohinọyị nị.

Ahaziya ộ rị ohinọyị Ijuda

²⁵ Ịnị ana tụ ọ ịrayị ẹwụrẹva ọnị Ijorami ozi Ahabị rị ohinọyị Ísirẹrị, Ahaziya ozi Ijehorami, ohinọyị Ijuda ô nyima aa mẹ ohinọyị.

²⁶ Ahaziya vị ozi ịrayị ohurẹẹva dị ọ rị ohinọyị. Ịrẹha ọnyị anị ọ rị Atarịya nị. Aazị ohinọyị Isirẹrị ana aā hị́ Omiri ọnyị anị vị nị.

²⁷ Ka Ahaziya ộ nyị ọnẹẹ hụụnị ovwoovu Ahabị, ẹngụ ebira edivi ọnị aza Ahabị mẹ̀ ọnị rẹ mẹ nị. Ịsa ọ mẹ e yi zoza ini eyi Ẹnẹyịmavara.

²⁸ Ohinọyị Ahaziya ộ saasa Ijorami ohinọyị Ísirẹrị ne pe Ihazayẹrị ohinọyị Isiriya kụ̀ ịrẹkụ. Ịzị aā hị́ Ịramọtị ịnị ẹtẹ Anigiriyadi isoja ẹnịnị na gẹ nị, dị a tọ̀ Ijorami ụnava ịnị ịrẹkụ ọnọọ nị.

²⁹ Ijorami ộ varẹma na yà ẹkụra ana aā hị́ Ijezirẹẹrị ka ụnava anị ọ̀ vị, dị Ahaziya nọ ịzọọ ne he e eyi nị.