2 Ohinọyị 7 - IWE ỌNỊNỊ

¹ Ama, Erisa ô tụ́ ohi ka: Ẹnẹyịmavara ộ tụ́ ọnị hi wu; ọ ka ụmẹ aanị ụhwọọ, a vaa hị́ ihwiiti ene zoza hu ikirogirami ẹẹta Ịnayịra ọnya, dị a raa hị́ ibaari ikirogirami ịhịnọnyị Ịnayịra ọnya Ị́samarịya ịzẹnị.

² Â nyị ozi ahụ ohinọyị ọnya ọnị ọ hụraa tụ́ ụtụ. Ộ kà a yị Erisa ka, ịzị ọ na vị̀. Ẹnẹyịmavara ọ̀ọ daka na ozokete ihinẹba, dị ọ zụ̀ orihi ka ịsa ẹ̀ mẹ nị, ọ́ọ́ zụ vavọọ yà? Ama Erisa ộ kà a yọ ka, ọ vaa sị eyi anịị re e, ama ẹ yị vaa rị ịnị anị.

Ọnụkụ ọbanyị ệ nọ udi isoja Anisiriya nịnị

³ Â nyị ọnụkụ ọbanyị ẹẹna ene hi ẹhẹ oze ọbanyị ọbanyị ẹkụra ana a zịị̄ ngụ Ịsamarịya ịnị ụmẹ ọnọọ. Ẹnịnị ệ kà a yị ẹngụ ka, aanị ẹnị wáá mẹ vee hi ịzẹnị, dị ẹnị sú nị?

⁴ Ẹ ka; ẹnị ẹ̀ẹ ka ẹnị aa ngụ Ịsamarịya na, ụngwẹ tịtẹ ịzọọ, vị ẹnị ee su ha nị; Ẹnị ẹ̀ẹ va yaatụ ịzẹnị, vị ẹnị ee su nị. Avọọ, à vẹ vị ẹnị ẹ nọ udi Anisiriya nịnị, Ẹnịnị ẹ̀ yị wụ ẹnị, dị ẹnị yàra. Ẹ̀ẹ va wụ ẹnị, dị ẹnị su.

⁵ Ịzẹyịza ịjị ẹtẹ maanị ee hozi kẹnẹ, di e si hu aa nọ udi Anisiriya nịnị nị. Ama ịjị ẹ maanị aa jị ahụụ ngụ ịzọọ kẹnẹ, ẹnịnị e yi re ọza ọnyọọnyị ịzọọ.

⁶ Ẹnẹyịmavara ộ mẹ̀ ka, Anisiriya nịnị ẹ̀ wụ́ ka â nyị ịsa aa sụrẹyịị vẹ. Ịsa ọnọọ vị ana sị mẹẹ anka ọkọnị isoja èe rere kụ umaata ọnịrị ịkẹkẹ ịrẹkụ aa vẹ avọọ. Ẹnịnị ệ kà a yị ẹngụ ka, vị ohinọyị Anisirẹrị nịnị na raà hị́ ohinọyị Anihiti nịnị ọnịrị ohinọyị Anijipiti ka è ve pe ẹnị kụ̀ ịrẹkụ anị nọ.

⁷ Oruva ịhị ọnọọ ẹnị kwẹẹtẹ dị e zwe ka a va sị ẹnị wụ̀ ha nị. Ẹnịnị ệ navọ ajẹngụ ẹnịnị, ọnịrị umaata ẹnịnị beri ịkẹrịkẹtẹ ẹnịnị hi ẹtẹ, dị e zwè hụrị udi ẹnịnị nị.

⁸ Ịjị ọnụkụ ọbanyị ẹyịna ẹnẹnị ngụ ịzọọ, ẹnịnị ệ ngụ ajẹngụ, dị ẹ rị ịsa, di e hú nị. Ẹnịnị ệ kụ isiriva, ọnịrị igooru beri ịta, dị ẹ kụ ọ na tẹ̀ nị. Ẹnịnị ệ rẹ vavẹ, dị ẹ ngụ ajẹngụ ọsa, dị ẹ ku ịsa hụụ ịzọọ, dị ẹ rẹ kụ ọ na tẹ̀ nị.

⁹ Dị ẹnịnị va kà a yị ẹngụ kà, ịsị ẹnị aa mẹ aanị e yi zoza. Ajịnị vị ẹkụhị ịrajẹ, ẹnị ẹ̀ yị na kà a, dị ẹnị jẹẹ ka eyi ọ̀ nị nị, vị a vaa sị ụyaa rị ẹnị nị, avọọ a vẹ vị ẹnị ẹ̀ na kà a idi ohinọyị.

¹⁰ Ịzẹyịza, ẹnịnị ệ hụrị udi Anisiriya nịnị, dị ẹ na hị́ aza enee sere oze ọbanyị ọbanyị ẹkụra-ẹkụra, dị ẹ ka, ẹnị ệ nọ udi Anisiriya nịnị. Ẹnị e yi re ọza ọnyọọnyị ịzọọ, ẹnị ẹ yị rẹ wụ̀ ọza ịrẹyị. Umaata ẹnịnị ọnịrị ịkẹrịkẹtẹ ẹnịnị vị ana yị za zụ. Ajẹngụ ẹnịnị vị ana yị ya anka ẹ mẹ̀ naa vọ hi ẹtẹ.

¹¹ Dị oserẹtẹ ẹnẹnị nọ ini eehi ohinọyị, dị ẹ na nọ̀ ọ enube ọyịza ọnọnị nị.

Anisirẹrị nini ê wuva hi ẹhẹ

¹² Ịnị ịrahụ ọnọọ, ohinọyị ộ kwẹẹtẹ, dị ọ kà a yị ezi ahụ anị ka. “Jẹẹ ma kà a wụ nịnị, ọbọ ọnị Anisiriya nịnị aa dà. Ệ yẹ ka ụngwẹ aa kụ̀ yị ịzẹnị, agụvị avọọ ẹ hụrị udi ẹnịnị dị ẹ na tẹ̀ hi ịnị avị nị. Ẹnịnị ê rò o ka ị vaa jịnẹ tụ ẹhẹ hụụnị ẹkụra ka yee vee sì ịsọyịrị; dị ẹnị ẹ̀ re oze za yị ireyi-ireyi, dị ẹnị ẹ̀ rị ẹkụra ayị.”

¹³ Ọnya ini ezi ahụ ohinọyị ộ kà a yọ ka, ịrẹyị ộ ka avaba aza ana vọ tụ Ịsamarịya vẹ, anka anda ẹnịnị ene wusu. Avọọ, à jẹẹ vị ẹnị ẹ̀ tụ́ aza, dị ẹ̀ sị umaata ẹẹhị ana vọ aanị. Ẹnịnị ẹ̀ na zama ẹtẹ dị ẹnị ẹ̀ yẹ ịsị ẹ mẹ.

¹⁴ Ịzẹyịza, ẹnịnị ệ nyị aza anaā sịị ịkẹkẹ ịrẹkụ, dị ohinọyị ka ẹ̀ na zama ẹtẹ dị ẹ̀ yẹ ịsị ẹ mẹ isoja Anisiriya nịnị nị.

¹⁵ Aza ẹnẹnị ệ na huuu na ngụ Ijodani. Ẹ maa na oze, dị e re ịta ọnịrị ẹnya ọnị Anisiriya nịnị va ha ẹnịnị mee zwè nị. Dị ẹnịnị vavẹ, dị ẹ va kà ụtụ yị ohinọyị nị.

¹⁶ Dị aza ana vọ hi Ịsamarịya sị eyiha-eyiha, dị ẹ nọ udi Anisiriya nịnị, dị ẹ kụ wa ẹnya ẹtẹẹtẹrẹ nị. Ịzẹyịza dị a kụkụ aa na ihwiiti ikirogirami ẹẹta Ịnayịra ọnya; dị ibaari ikirogirami ịhịnọnyị ọnị rẹ vị Ịnayịra ọnya nị. Avọọ Ẹnẹyịmavara mẹ̀ vịdị kà a nị.

¹⁷ Ọdọvịdị ana gụrị ohinọyị ẹtẹẹtẹrẹ, ohinọyị nyị ka ò si eyi pe oze ọbanyị ọbanyị ẹkụra nị. Aza ệ tụ́ ọ ụvọ nyẹtẹ, dị ẹ kụ ahụ hi ọ pooro di o su nị. Avọọ Erisa mẹ̀ vịdị kà a ka ọ vaa ya ịhị oni ohinọyị ve tu ọ nị.

¹⁸ Ụmẹ ọnị Erisa sị kà a yị ohinọyị Isamariya ka a vaa na ihwiiti ikirogirami ẹẹta ọnịrị ibaari ikirogirami ịhịnọnyị Ịnayịra ọnya-ọnya.

¹⁹ Ọdọvịdị ọnọnị ộ kà a yọ ka, Ẹnẹyịmavara ọ̀ọ daka na ozokete ihinẹba hi ẹtẹ ka ịsọyịrị ọọ zụ̀ụ anka orihi avọọ, ịrẹyị ọnị Erisa kà ẹ̀ yị zụ mẹ. Dị Erisa tụ́ ọ ohi ka, ọ vaa mẹ di o re e, ama ẹ yị vaa rị ịnị ịsọyịrị ọnọọ.

²⁰ Avọọ gẹdẹ-gẹdẹ ọ mẹ̀ va yaa yọ nị; ịnị oze ọbanyị aza yà kụ ahụ hi ọ pooro di o su nị.