2 Ohinọyị 3 - IWE ỌNỊNỊ

Ijorami ozi Ahabị ộ rị ohinọyị Isirẹrị

¹ Ịnị ana tụ ọ ịrayị ẹwụrịhịnta ọnị Ijehosahwati rị ohinọyị Ijuda, Ijorami ozi Ahabị ộ rị ohinọyị Isirẹrị, dị ọ yà Isamariya mẹ ohinọyị anị ịrayị ẹwụrẹva nị.

² Ộ mẹ̀ ebira odivi ini eyi Ẹnẹyịmavara, ama aanị ẹ yị yà anka áada anị ọnịrị ọnyị anị. Ô wú ọhẹ ọnị ada anị mẹ jẹẹ yị ori ana aā hị́ Ịbaarị

³ Ama ebira odivi ọnị Ijerobowami ozi Inebati mẹ̀ ka ezi Anisirẹrị ẹ̀ mẹ, vị ọnị ọnị nyayịnẹ ta ku baaba. Ẹ yị hụụnị anị.

Animowabi ê va eyi ka Anisirẹrị

⁴ Ụmẹ ọnọọ, Imesa, ohinọyị Imowabi vị anaā pa atẹmẹ. Ịrayị-ịrayị ọọ̄ sịị kụ ezi atẹmẹ akawụ-akawụ oze ẹvarẹwụ (100,000) naa yị ohinọyị Isirẹrị nị. Avọọ ọ mẹrẹ rẹ kụ ẹyị ịdẹba akawụ-akawụ oze ẹvarẹwụ ẹyị vaa yọ nị.

⁵ Ama ịjị Ahabị ohinọyị Isirẹrị mẹ wusu, dị Imesa ohinọyị Imowabi nyima aa kụ̀ụ hịrẹ Anisirẹrị nịnị nị.

⁶ Obooro ọnọọ, ohinọyị Ijorami ộ hụrẹ Ịsamarịya, dị ọ kụ avaba isoja anị gụ nị.

⁷ Ộ tụ́ na kà a yị Ijehosahwati ohinọyị Ijuda ka: ohinọyị Imowabi ộ kụ̀ hịrẹ ọnị: ọ́ọ́ vaa saasa ọnị nee pe e kụ̀ ịrẹkụ? Dị ohinọyị Ijehosahwati tụ́ ohi ka ọnị vaa nọ nị. Ọ kà ọnịrị ọ vị ọnya, aza anị rẹ vị aza Ijorami, dị umaata anị rẹ vị aanị nị.

⁸ Ọ kà, ye re oze ẹnẹ ẹnị vaa zịị kụ́ ịrẹkụ ụ na? Dị Ijorami ka, oze ịnị ụnọmị Edomi ẹnị vaa zị nị.

⁹ Ịzẹyịza, di ohinọyị Isirẹrị, ọnịrị ohinọyị Ijuda beri ohinọyị Edomi ẹnịrị isoja ẹnịnị sì hu nị. Ịjị ẹnịnị reè jesi kara ịzọọ mẹ ẹkụhị ịhịmba, dị ẹnịrị ịsụpa ẹnịnị è yi re enyi hú nị.

¹⁰ Ohinọyị Ijorami ô nowu zẹtẹ ka; ẹnị ẹ sị da. Vị́ Ẹnẹyịmavara kụ ẹnị ẹyịta hi ẹhẹ ka ụvọ ohinọyị Animowabi ò ve kú ẹnị aanị nọ.

¹¹ Ohinọyị Ijehosahwati ộ họ̀ ka, áá nyị ọnịsẹ ịzẹnị ẹnẹ ẹnị nyẹngụ họ̀ use ka, Ẹnẹyịmavara mẹ̀ ka? Dị ọga isoja ohinọyị Ijorami ọnya tụ́ ohi ka, Erisa ozi Isahwati yà ịzẹnị nị. Ọ kà ozi ahụ Erija ụvọta ọ vị̀ nị.

¹² Ohinọyị Ijehosahwati ka, ọ́ zụ kà a yị ẹnị ịsị Ẹnẹyịmavara kà nị. Ịzẹyịza dị ẹnị ohinọyị ẹyịta kụ ẹngụ ne tù ọ nị.

¹³ Erisa ộ kà a yị ohinọyị Anisirẹrị nịnị ka, sị ee si ịdị anị? Ọ kà ò ne tụ ẹnị ọnịsẹ ana ada anị ọnịrị ọnyị anị vịdịị nọ ịdị anị. Ama dị Ijorami, ohinọyị Anisirẹrị ka, eyiye de; Ẹnẹyịmavara ọ hị́ ẹnị ohinọyị ẹyịta hi ẹhẹ ka, ọnị ọ va kụ ẹnị chire ohinọyị Animowabi ụvọ aanị nị.

¹⁴ Dị Erisa ka, ọnị ộ sị Ẹnẹyịmavara ana yára ọnị ọnị aa hẹkẹ hị́ eku, ẹ̀ yị vị agụvị Ijehosahwati ohinọyị Ijuda ọnị ọnị sị ụbanyị yị, ọnị ẹ yị hyakụ yaanị kana eyi si Ijorami vụrụ-vụrụ.

¹⁵ Ama, ọ̀ na hị́ ọmaahẹ ọnya vẹ. Ịjị e nyima aa mẹ aahẹ, dị ụkata Ẹnẹyịmavara vana vẹ Erisa ịrẹsụ nị.

¹⁶ Dị ọ ka: Ẹnẹyịmavara kà: ẹnịnị ẹ̀ chị̀ ahata hi ịnị okuha ana sị wụ aanị, agụvị ka ọnị vaa mẹ ka enyi ò hí avaba anị.

¹⁷ Ẹnẹyịmavara kà, ahị ẹ yị vaa tụ́, orihi ẹ yị vaa zụ̀ okuha ana wụ aanị vaa vị ohihii yi enyi, dị ẹnịnị beri imaaru ọnịrị ịsụpa ẹnịnị ee hú enyi.

¹⁸ Ọsọnị vị ịrẹyị oweyi ini eyi Ẹnẹyịmavara; ọ rẹ vaa sị Imowabi chire wu nịnị ụvọ bẹẹ.

¹⁹ Ọ kà, Ụ vaa nyị ẹbẹẹba ẹkụra ozoza-ozoza ẹnịnị ẹnẹ ẹ jị ọvọ kara. Avaba ọchị ẹnịnị anaā tụ́ ẹtụtụ vị ọnị ụ vaa máa hi ẹtẹ nịnị, dị ụ du avaba oswe ẹnịnị ha. Avaba ẹtẹ ẹnịnị anaā mẹ̀ ịsa ẹtẹẹrẹ vị ọnị ụ vaa za ịrẹtaa hi nịnị, di u we si du ọ ha nịnị.

²⁰ Ẹnẹnẹ eyinẹhẹ anị, ịnị ẹngụ ụmẹ ana a sịị̄ mẹ̀ ịsọvọ ẹnẹnẹ, dị enyi venee sìi hụrẹ oze Edomi vẹ nị. Dị avaba ẹtẹ ọnọọ vana vị ohihi yị enyi nị.

²¹ Ama ịjị Animowabi nịnị wụ ka ohinọyị ẹyịta ẹnẹnị ẹnịrị isoja ệ vẹ ee ve pe ẹnịị kụ̀ ịrẹkụ; ẹnịnị ệ hị́ avaba aza ẹnịnị ana zụ kụ̀ ịrẹkụ, hụrẹ ọzọkụ na ngụ ezweyi ẹnịnị. Dị ẹnịnị na jẹẹ ẹhwị ẹtẹ ẹkụra ẹnịnị nị.

²² Ịjị ẹnịnị kwẹẹtẹ ẹnẹnẹ viri-viri eyinẹhẹ anị, dị ọyị và ọpa tụra enyi ọnọọ nị. Animowabi nịnị ene hi eyi ọsọọ mee re e, dị enyi ọnọọ sị mẹẹ anka avọọ o mee ví nị.

²³ Dị ẹnịnị ka, yọ! Vị́ ohinọyị ẹyịta ẹnẹnị beri isoja ẹnịnị pe ẹngụ kụ ịrẹkụ, dị ẹ wụ ẹngụ va ha aanị nọ. À vẹ ẹnị ẹ̀ na kụ ogu ẹnịnị.

²⁴ Ama ịjị Animowabi nịnị maanị ngụ udi Anisirẹrị nịnị kẹnẹ, dị Anisirẹrị nịnị kwẹẹtẹ tu wa, dị ẹnịnị và tụ echi nị. Anisirẹrị nịnị ệ dụ wa huuu na ngụ ịnị ẹtẹ ẹnịnị, dị ẹ wụ Animowabi nịnị ha nị.

²⁵ Ẹnịnị ê vu ẹkụra Animowabi nịnị ẹtẹ, dị ẹ́ hara ịrẹta va hi ịnị ẹtẹ ẹnịnị ene zoza nị. Ẹnịnị ệ sụnẹ aha enyi ẹnịnị, dị ẹ má avaba ọchị ozoza ene hi ịzọọ nị. Â nyị ẹkụra ẹnịnị ọnya ana aā hị́ Ikiri-Ihareseti. Ọnị ịnya kẹnẹ ọ vana vọ jẹẹ nị, dị ẹnị isoja eneē ne ọnanta va ta kara a, dị ẹ kụ ịrẹkụ ngụ ọ nị.

²⁶ Ịjị ohinọyị Imowabi re ka ịrẹkụ ọnọnị o si nyima aa dà ọnị ụvọ, dị ọ kụ isoja anaā sịị ụhwọọ kụ ịrẹkụ, ẹnị akatarẹchẹhị nị. Ọnịrị wa ệ sị vụrị ka ẹnị è và eyi ka ohinọyị Edomi dị ẹnị ẹ̀ zị avọọ tụ, ama ẹnịnị e yi re mẹ.

²⁷ Ộ sị ozi ọnọrụ anị ana vị ọzọkụ; ọnị ọ yaanị rị ohinọyị dọ ọ ịrẹsụ nị. Ộ sị ọ mẹ̀ ịsọvọ, dị ọ rị ọ ịra ịrẹsụ ọvọ nị. Ịjị Anisirẹrị nịnị re e, dị ayịhụrịnẹ sụ́ wa nị. Ẹnịnị ệ và hụụ ịrẹma ẹkụra ọnọọ, dị ẹ varẹma aa nọ ẹkụra ẹnịnị nị.