2 Ohinọyị 16 - IWE ỌNỊNỊ

Ịrẹyị Ahazi, ohinọyị Ijuda

¹ Ịnị ana tụ ọ ịrẹyị ẹwụrịhịmba ọnị Ịpẹka ozi Ịrẹmarịya rị ohinọyị Ísirẹrị, Ahazi ozi Ijotami ộ rị ohinọyị Íjuda.

² Ozi ịrayị oohu Ahazi vị̀ dị ọ rị ohinọyị nị, dị ọ yà Ijerusarẹmị mẹ ohinọyị anị ịrayị ẹwụrịhịnọnyị nị. Ẹ yị hama ebira ọyịza ọnị ohinọyị Idevidi ana vị ohiku anị mẹ. Ama ộ mẹ̀ ebira ene è yị hine Ẹnẹyịmavara Ohomorihi anị.

³ Ộ saasa ebira ohinọyị Anisirẹrị nịnị. Ộ hyakụ sị ozi ọnọrụ anị mẹ̀ ịsọvọ ana a rị ịra yị ori nịnị. Avọọ anẹkụra oni Ohomorihi dụ hụụnị ẹtẹ ọnọọ yị Anisirẹrị mẹẹ̄ vịdịị mẹ̀ ẹ nị.

⁴ Ahazi ộ mẹ̀ ịsọvọ ịzị aza anaā hẹkẹ ori nịnị yaā mẹ ori ịrẹsụ ataba ọnịrị iruvo avaba ọchị ana nyị ihuhu.

⁵ Irezini ohinọyị Ísiriya ọnịrị Ịpẹka ohinọyị Ísirẹrị ệ kụ́ ịrẹkụ tu Ijerusarẹmị, di isoja ẹnịnị kara a okiri-okiri nị, ama ẹnịnị ẹ yị va zụ nyị ẹbẹẹba Ahazi.

⁶ Ụmẹ ọnọọ gẹdẹ-gẹdẹ ohinọyị Édomi sị dọ ẹkụra ana aā hị́ Erati varẹma yị Edomi nị.

⁷ Ahazi ộ tụ́ ne tu Iparisa, ohinọyị Ísiriya ka: Ozi ahụ anị ọnị vị nị. Ọ̀ navọ ọ̀ va dọ ọnị hụrẹ ụvọ ohinọyị Ísiriya ọnịrị ohinọyị Ísirẹrị nịnị ana kụ́ ịrẹkụ tu ọnị aanị.

⁸ Ahazi ộ rẹ kụ́ isiriva ọnịrị igooru ene hi ini irehi Ẹnẹyịmavara beri ana a sị tẹ ini irehi ohinọyị, ka à sị na yị ohinọyị Ásiriya.

⁹ Ịzẹyịza, ohinọyị Ásiriya ộ wụ́ ịrẹyị Ahazi; dị ọnịrị isoja anị nịnị kwẹẹtẹ tu Ịdamasịkọsị nị. Ộ nyị ẹbẹẹba anị, dị ọ wụ Irezini ohinọyị, dị ọ za aza ene hi ịzọọ ọrịhị ne hi ẹkụra ana aā hị́ Ịkịrị nị.

¹⁰ Ịrẹma ịrẹyị ọnọnị, Ahazi ohinọyị ộ nọ Ịdamasịkọsị ne heyi Itigirati Iperesa ohinọyị. Ọ́ mẹ̀ yà ịzọọ, ô re ụta ịsọvọ ọnya aanị, dị ọ si uhwoto anị tụ́ na yị Uriya ana vị ohirẹsụ irehi Ohomorihi nị. Ộ tụ́ ka a yọ a mẹmẹ da a bemi-bemi.

¹¹ Ịzẹyịza, Uriya ộ dà ẹngụ ụta ịsọvọ gẹdẹ-gẹdẹ, dị ọ za a ịrẹsụ dị Ahazi va vavẹ nị.

¹² Ịjị Ahazi và hụrẹ Ịdamasịkọsị vẹ, ô re ka asị ụta ịsọvọ ọnọọ da za ịrẹsụ, dị ọ nọ ịnị ụta ọnọọ nị.

¹³ Ộ sị ịsụpa ọnịrị ịsọyịrị mẹ̀ ịsọvọ ana aā rị ịra ịrẹsụ anị, dị ọ và eche ọnịrị hi ọ, ọnị ọ sị mẹ̀ ịsọvọ ọ̀ yị pe Ohomorihi me uzee nị.

¹⁴ Â nyị ụta ịsọvọ ana a sị enyusẹ ana aā hị́ ibironzi dà yị Ẹnẹyịmavara. Ịnị akakana ụta ịsọvọ ọwọọwa ọnọnị ọnịrị Irehi Ohomorihi ọ yà nị. Ahazi ộ kụkụ sị ọ na tụ eyi ẹbẹẹba ụta ọwọọwa anị ọnọnị.

¹⁵ Ahazi ộ kà a yị Uriya ka: Ụta ịsọvọ anị ọnọnị ọ gana hu nị. Ọ kà, ọ̀ kụkụụ ya ịnị anịị mẹ̀ ịsọvọ ẹnẹnẹ ana aā rị ịra, ọnịrị ịsọvọ oruva ana aā sị ịsọyịrị mẹ. Ọọ ya ịnị anịị mẹ̀ ịsọvọ ana aā rị ịra ọnịrị ịsọvọ ịsọyịrị ana aā mẹẹ yị ohinọyị ọnịrị aza. Ọọ ya ịnị anị mẹ̀ ịsọvọ ana aā sị eche mẹẹ yị aza ọ ka ọọ va avaba ịsụpa ana aa sịị mẹ ịsọvọọ hi ọ. Ama ọ̀ sị ụta ana a sị ibironzi mẹ aanị tịtẹ yị ọnị. Ịnị anị ọnị vaa yaa mẹ̀ aduwa, dị ọnị oo si iruvo ịsị Ohomorihi òo sì ka ọnị ọ̀ mẹ nị.

¹⁶ Uriya ộ mẹ̀ avaba ịsị Ahazi kà yọ aanị.

¹⁷ Ahazi ohinọyị ộ sị ụkẹkẹ ana a sị ibironzi mẹ̀ ene eē ro ini Irehi Ohomorihi, dị ọ hụrẹ ịchacha ana yà ịnị anị nị. Ộ rẹ hụrẹ uruku ana a sị ibironzi mẹ hụụ ịrẹma ụnọ ẹwụrẹva ana a sị ibironzi mẹ, dị ọ sị ọ hi ọkẹtẹ irehi ana a sị ịrẹta mẹ nị.

¹⁸ Ahazi ộ hụ agụvị ka ọnị ọ̀ mẹ̀ ịsa ene hine ohinọyị Ásiriya ayị kẹnẹ, ộ sị eyi kụ ha ọnya ode ana a sị aga ohinọyịị tụ kwooze, dị o gù oze oni ohinọyị ịnyaraā zịị ngụ ini irehi Ohomorihi samị-samị nị.

¹⁹ Â chẹrẹ avaba ịsa ana vọ ọnị Ahazi ohinọyị mẹ hi ini iwe ịtọpa ohinọyị Íjuda nịnị.

²⁰ Ahazi ô su, di e ne e tụ ịzị eē ne oku ohinọyị nịnị ẹkụra Idevidi nị. Di Ihezekaya ozi anị rị ohinọyị dọ ọ ịrẹsụ nị.