2 Ohinọyị 10 - IWE ỌNỊNỊ

Ijehu ộ wụ̀ avaba ezi Ahabị

¹ Ụmẹ ọnọọ, evere ezi Ahabị ẹtarẹwụ hi Ịsamarịya. Ijehu ộ chẹrẹ iwe tu hi wa, ẹnịrị ọdọvịdị Ịsamarịya ọnịrị Ijezirẹẹrị nini beri ẹnị enee sere ezi Ahabị. Ọ kà,

² Waa nyị ụkata nịnị ẹtẹẹtẹrẹ ẹkụra awụ nịnị, dị ụ nyị ịkẹkẹ ịrẹkụ ọnịrị umaata nịnị beri ẹnya ịrẹkụ ọnị ụụ̄ sị sere ẹngụ awụ nịnị nị. Ọ kà, á mẹ hịka ẹwụ nịnị o si eyi pe ezi ọga awụ nịnị aanị,

³ nyị ene hu keekere ịnị ẹnịnị, dị ụ wa sị ọ rị ohinọyị nịnị o, dị u we tenyi ẹngụ ịrẹkụ nịnị agụvị ovwoovu Ahabị o.

⁴ Ama ayị ộ hụrẹ ọdọvịdị Anịsamarịya nịnị ịnẹ ẹtẹẹtẹrẹ, dị ẹ ka, ọza ọnị Ijorami ọnịrị Ahaziya ohinọyị Isirẹrị ọnịrị Ijuda ẹ̀ yị zụ gẹ ịrẹvụ, ẹnẹ vị ẹnị anaa vaa gẹ ẹ ịrẹvụ?

⁵ Dị ọza ana si eyi pe irehi ohinọyị ọnịrị ohirẹsụ Ịsamarịya bẹrị ẹnị ọzọkụ-ọzọkụ ọnịrị ẹnị ana sị eyi pe ezi ohinọyị tụ́ ne tu Ijehu ka, Ezida anị ẹnị vị nị. Ẹnị vaa mẹ ịsị ọ̀ọ ka kẹnẹ. Ẹ yị nyị ọza ọnị ẹnị aa sịị rị ohinọyị. Ịsị òo ro ka oo zoza kẹnẹ ọ̀ mẹ̀ ẹ.

⁶ Di Ijehu chẹrẹ ịrẹta ọhụva na yị wa ka: àa vị aza anị ẹ vị, dị e reè tenyi ẹngụ ka ẹnị aa mẹ ịsị ọnị ọ̀ọ ka nị; ẹ̀ jị avaba ezi Ahabị ịrẹsụ, dị ẹ̀ kụ ọ ve tu ọnị Ijezirẹẹrị ụmẹ aanị ụhwọọ. Ezi Ahabị ẹnẹnị vị ene hi ịdị ẹnị ọdọvịdị Ịsamarịya, dị ẹyaa pá wa.

⁷ Ịjị ịrẹta ọnọnị tu wa ụvọ, dị ẹnịnị kụ ezi ohinọyị ẹnẹnị, dị ẹ wụ̀ wa nị. Ẹ sị wa wụ, dị ẹ jị wa ịrẹsụ, dị ẹ kụ ọ hi ini uji, dị ẹ kụ ọ ne tu Ijehu Ijezirẹẹrị nị. Ezi ohinọyị ẹnẹnị vị ẹnị ẹtarẹwụ.

⁸ Ịjị ọnụtụ vẹ, dị ọ kà a yị Ijehu ka, a raà kụ́ ịrẹsụ ezi ohinọyị vẹ o. Di Ijehu ka ẹ̀ nọ enoze oze ọbanyị Ijezirẹẹrị, dị ẹ sị wa jị aba ẹẹva hi ẹtẹ ne tu ụhwọọ nị.

⁹ Ẹnẹnẹ eyinẹhẹ anị Ijehu ộ na jẹẹ ịzị avaba aza va zụụ wụ́ ịrẹyị anị, dị ọ kà a yị wa ka: Wẹ yị rị ịvị ịsọnyị-ịsọnyị nịnị o. Ọ kà ọnị ọ tọ̀ọ́ aza kara ẹngụ dị ọnị wụ ọga anị Ijorami nị. Ama ẹnẹ wụ̀ avaba aza ẹnị ịrẹsụ anị hi ẹtẹ aanị?

¹⁰ Ọ kà, yẹ́ nịnị ka, ọsọnị ộ sị zụ ka, avaba ịsa ọnị Ẹnẹyịmavara kà ịnị ịpa evere Ahabị vaa sẹ. Ịsa ẹnẹ Ẹnẹyịmavara wo oto anị ọnị Erija kà ịhị ọnọọ, ọ mẹ aanị nị.

¹¹ Di Ijehu wụ̀ avaba anda Ahabị ana vọ hi Ijezirẹẹrị nị. Avaba ọdọvịdị isoja anị, ọtọọta anị ana gụrị ọ, ọnịrị ọdọvịdị ori anị nịnị vị ọnị ọ rẹ wụ̀ va ha.

 wụ̀ ẹnị anda ohinọyị Ahaziya

¹² Ijehu ộ hụrẹ Ijezirẹẹrị aa nọ Ịsamarịya. Ọ maa na oze, ô tu ịzị aā hị́ udi oseratẹmẹ nịnị,

¹³ dị ọnịvị anda onku Ahaziya ohinọyị Íjuda nịnị na gẹ nị. Ộ họ̀ wa use ka: Ẹnị ụ vị nịnị? Dị ẹnịnị ka, anda Ahaziya ẹnị vị nị. Ẹ ka vị ẹnị aa nọ Ijezirẹẹrị ka ẹnị ẹ̀ na kụ́ ezi Ijezebẹrị ose ohinọyị, ọnịrị avaba aza ohinọyị ana vọ nị.

¹⁴ Ijehu ộ kà a yị aza anị ka ẹ̀ za wa ireyi-ireyi. Ẹnịnị ệ za wa, dị ọ wụ̀ wa ọ sị gụrị usi ọnya ịzọọ nị. Aza ẹnẹẹ vị ẹbẹẹva tụra ẹẹva. Ọza ịnyara ẹ yị vẹtẹ ịnị ẹnịnị.

¹⁵ Ijehu ộ hụụ ịzọọ, dị ọ na gẹrị Ijehonadabi ozi Irekabi oze nị. Ijehu ộ kụ́ ọ, dị ọ ka: Ẹmịrị ẹwụ vị eneē ro ịrẹyị ọnyọọnya. Ụ wáá vị aza amị? Dị Ijehonadabi ka ịịndẹ ọnị aa vị aza anị nị. Ijehu ộ kà a yọ ka ọ sị ụvọ anị vẹ, dị ẹ dọ ẹngụ ụvọ, dị Ijehu sị ọ hịrẹ ịkẹkẹ ịrẹkụ anị nị.

¹⁶ Ộ kà a yọ ka, “Saasa amị, di u we ve re mmẹmẹ kụ ẹngụ hi ịrẹyị Ẹnẹyịmavara.” Dị ọnịrị ọ sị ịkẹkẹ anị aa na nị.

¹⁷ Ịjị ẹnịnị tu ịzọọ, Ijehu ộ wụ̀ avaba anda Ahabị ene hi Ịsamarịya, ikonyara ẹ yị vẹtẹ. Aanị Ẹnẹyịmavara mẹ̀ vịdị kà a yị Erija ka ịrẹyị ọnọnị vaa mẹ nị.

Ijehu ộ wụ̀ aza anaa hẹkẹ ori ana aā hi Ịbaarị.

¹⁸ Ijehu ộ hị́ avaba aza gụ, dị ọ kà a yị wa ka: Ahabị vana hẹkẹ ibaari chee aanị; ama Ijehu ọ vaa hẹkẹ ẹ hu nị.

¹⁹ Ọ kà ẹ̀ hị́ avaba ọnịsẹ Ịbaarị gụ, avaba ọnụtụ anị, ọnịrị avaba aza anaā kụ azaa hẹkẹ ẹ. Asị a nyị ọza ana vẹtẹ, agụvị ka â nyị ịsọvọ ọbanyị ọnị ọnị aà vaa mẹẹ yị Ịbaarị; ọza ẹnẹ ẹ̀ yị yà ịzọọ ịnị ẹnịnị vị ene vee su. Ama Ijehu vị anaa da ọbọ ọ̀yị wụ̀ avaba aza anaā hẹkẹ Ịbaarị ha.

²⁰ Ijehu ộ mẹ̀ ọda ka à jị ẹkụhị ana a vaa sị hẹkẹ Ịbaarị, ịzẹyịza dị ẹ nọ̀ ọ ẹkụhị ọnọọ nị.

²¹ Ijehu ộ tụ́ ụtụ ngụ avaba ẹtẹ Ísirẹrị zịịzị; dị avaba aza anaā hẹkẹ Ịbaarị vẹ nị ọza ịnyara ẹ yị vọ ịnị ẹnịnị ẹnẹ ẹ̀ yị vẹ. Ẹnịnị ệ hàrà hi ini irehi Ịbaarị, dị o hí na kà avaba ugene nị.

²² Ộ kà a yị ọza ana si eyi pe ịzị aā kụ ịtaa hi, ka ẹ̀ kụ awuru ọnụtụ Ịbaarị nịnị yị wa. Ịzẹyịza, dị ọ kụ ọ hi ẹhẹ yị wa nị.

²³ Ijehu ộ ngụ irehi Ịbaarị beri Ijehonadabi ozi Irekabi, dị ọ kà a yị ẹnị anaā hẹkẹ Ịbaarị ka, “Zama ẹngụ awụ nịnị, di u we re ka ẹ yị nyị ọza anaā hẹkẹ Ẹnẹyịmavara ana ya ịnị akakana awụ nịnị; ama ẹwụnị-ẹwụnị anaā hẹkẹ Ịbaarị kẹnẹ ọ̀ ya ịzẹnị nị.”

²⁴ Di Ijehu ọnịrị Ijehonadabi nyima aa wụ̀ ịsụpa ana aa sịị mẹ̀ ịsọvọ ọnịrị ana aa rị ịraa hi Ịbaarị nị. Ijehu ộ vịdị raà kà a ka aza ẹnị ẹbẹẹna ẹ̀ jẹẹ hi eyẹhẹ, dị ọ kà a yị wa ka, “Re ka wáa wụ̀ avaba aza ẹnẹnị nịnị o. Ọza ana àa zẹẹ ka à nyị ọza ene zwe, vee su dọ ọ ịrẹsụ nị.”

²⁵ Ijehu mẹ̀ maanị ị mẹ̀ ịsọvọ ẹnẹnị kẹnẹ, dị ọ kà a yị oserẹtẹ ọnịrị isoja nịnị ka, “Ngụ ini eehi, dị ụ wa wụ̀ avaba aza ẹnẹnị nịnị; à sị ụ zẹẹ ka ọza ịnyara ẹnịnị ò zwe.” Ẹnịnị ệ ngụ ini eehi, dị ẹ tụ̀ ụhwọ, dị ẹ wụ̀ avaba ẹnịnị, dị e tura oku ẹnịnị và hi ẹhẹ nị. Ẹnịnị ệ rẹ ngụ ịnịnẹ aku ini irehi ori Ịbaarị ọnọọ,

²⁶ dị ẹ kụ ọhẹ ẹnẹ ẹ mẹ hi ịzọọ yị Ịbaarị tụ ẹhẹ, dị ẹ rị wa ịra nị.

²⁷ Ẹnịnị ê wu ọhẹ Ịbaarị ha, di e du irehi Ịbaarị ha nị. Hụrị ụmẹ avọọ irehi Ịbaarị ọnọọ vara ụsịhyẹrẹ avaba aza nị.

²⁸ Avọọ Ijehu mẹmẹ ku ori ana aā hị́ Ịbaarị hụrị ẹtẹ Ísirẹrị nị.

²⁹ Ama ọnị vana rẹ mẹ ịvị Íjerohowami ozi Inebati ọnị ọ kụ Anisirẹrị nịnị na hẹkẹ uyi ụnọ ana a sị igooru mẹ tụ ịbẹtẹrị ọnịrị Ịdaanị nị.

³⁰ Dị Ẹnẹyịmavara kà a yị Ijehu ka, “Wa raà mẹ avaba ịsị mee sii hi evere Ahabị. Agụvị avọọ, mee wo oto yị wụ ka, evere awụ na ngụ ụnanka ọhụna ẹ vanaa rị ohinọyị Ísirẹrị nị”.

³¹ Ama Ijehu ẹ yị sị avaba ana saasa ọda Ẹnẹyịmavara Ohomorihi Ánisirẹrị; ộ hama Ijerobowami ana kụ Anisirẹrị nịnị na mẹ ịvị.

Usu Ijehu

³² Ụmẹ ọnị Ijehu sị vị ohinọyị, Ẹnẹyịmavara ô nyima aà dà a hụụnị ẹhwị ẹtẹ Isirẹrị. Ihazayẹrị, ohinọyị Isiriya ộ dọ avabaẹtẹ Anisirẹrị nịnị

³³ hụrị Anigiriyadi ọnịrị Ịbasanị eyi ọnị ọyịị̄ zịị vẹ irehu Ijodani, huuu na ngụ ẹkụra ana aā hị́ Aroyeri eyi irehu Arinọnị. Ẹtẹ ọnọnị ezi Igadi, Irubẹnị, ọnịrị ezi Ịmanasẹ vịdị ra nị.

³⁴ Avaba ịsa ana vọ ọnị Ijehu mẹ, ịsa ọ sị ọtụtụrụma mẹ ọ mẹ̀ vị ohinọyị; â chẹrẹ wa hi iwe ịtọpa ohinọyị Ísirẹrị nịnị.

³⁵ Ộ sú, dị e ne e Ịsamarịya nị, dị ozi anị ana aā hị́ Ijehowahazi rị ohinọyị dọ ọ ịrẹsụ nị.

³⁶ Ịrayị ohurịhịnta Ijehu yà Ịsamarịya mẹ ohinọyị Ísirẹrị vị nị.