2 Ịtọpa 9 - IWE ỌNỊNỊ

Ọnẹẹ ana vị ohinọyị Ịsẹba ô ve heyi Isoromọnị.

¹ Â nyị ọnẹẹ ọnyara aanị ana vị ohinọyị ẹkụra ana aa hị́ Ịsẹba. Ộ wụ́ ịrẹyị ohinọyị Isoromọnị, dị ọ vẹ Ijerusarẹmị va họ̀ use ịrẹyị ka ọnị ọ sị zama a re nị. Ộ kụ́ aza rụrụ tụra ẹngụ beri ịnyaakụmị ọrụrụ ana za ẹnya eturare ohuru-ohuru ọnịrị igooru ọdẹngụ, beri ịrẹta ẹkẹhị-ẹkẹhị. Ịjị ọ tù Isoromọnị, dị ọ họ̀ ọ use ịrẹyị irenyi-irenyi ọnị ọ nyị tụ́ ịnị ayị anị nị.

² Isoromọnị ộ sị ohi avaba ịrẹyị ọnị ọ họ̀ use anịị yọ. Ệ yị nyị use ịrẹyị ana tụ́ ọ akanya vụrụ-vụrụ.

³ Ịjị ọnẹẹ ana vị ohinọyị Ịsẹba ọnọọ vavọọ re ka Isoromọnị ộ nyị ịrẹyọyẹ ẹtẹẹtẹrẹ, dị o re irehi ohinọyị ọnị ọ dà.

⁴ Ô re ịsọyịrị ene hi ịrẹsụ iteburu anị, aga ọyịyaatẹ ọdọvịdị anị nịnị, ẹnya ọnị ezi ahụ anị ọnịrị aza ana sị enyi yọ kụ́ hi ẹngụ, dị o hi ọ irenu. Ịrẹma ẹnẹẹ dị o ree re ịsọvọ irenyi-irenyi ọnị Isoromọnị rị ịra ịnị irehi Ohomorihi, dị ọ kụkụ ee re ẹtẹ tatataa kẹnẹ nị.

⁵ Dị ọ kà ọnị o si o re ka ịrẹyị Isoromọnị ọnị ọnị vịdị wụ́ ọnị mẹ ya ẹkụra anị vị ịzẹyịza.

⁶ Ọ kà ọnị vịdị kụ́ ịrẹyị anị ọnị ọnị wụ́ hi ireche, ẹ vị ọnị mẹ va maanị sị eyi anị re e aanị. Ọ kà Isoromọnị ọ hyakụ nyị ịrẹyọyẹ hụụnị ịsa ọnị vịdị wụ́.

⁷ Ọnẹẹ ọnọọ kà a ezi ahụ Isoromọnị ẹ nyarị ịrẹsụ ọyịza agụvị ka ụmẹ tụra ụmẹ ẹ ya pe e, dị ẹ yaa wụ́ ịrẹyọyẹ ọnị aa ka nị.

⁸ Ọ kà ọnị ọ́ kụ́ Ẹnẹyịmavara Ohomorihi anị avọ agụvị ka ọ raà sị zụ ayị anị mẹmẹ hine tù ọnị, dị ọ mẹ̀ ọnị ohinọyị ka ọnị sị ịrẹha mẹ̀ ịjọva tụra aza anị ịrẹsụ. Ka Ẹnẹyịmavara o sị ịrẹyị aza Isirẹrị, dị ọ sị ka ọnị o sere wa pooro zịna-zịna, dị ọ nyị Isoromọnị agụvị ọ sị ụkọ za ọda dị ọ mẹ ịzẹyịza.

⁹ Dị ọ sị ẹyịza ọnị ọ kụ́ vẹ yị Isoromọnị nị. Igooru ọnị ọ sị va yọ ộ rata ikirogirami akawụ-akawụ oze ẹẹva. Avọọ eturare ohuru-ohuru anị mẹ rụrụ, ne beri ẹnya ọvị anka ịsụtọ, ịsọbẹ, ịsụvọ ọnịrị ana vọ.

¹⁰ Aza Ihurami ọnịrị aza Isoromọnị ệ kụ́ igooru ọnịrị ọchị ana a hị́ Ijunipa ne beri ẹnya ọvị hụrị Ohwiri vẹ.

¹¹ Isoromọnị ộ sị ọchị ọnọọ mẹ ọbụna ana a sị hịrẹ ọtụrọsarẹsụ irehi Ohomorihi ọnịrị irehi ohinọyị anị. Dị ọ bẹ́ ọkangga irenyi-irenyi ọnịrị agidibo irenyi-irenyi yị ọmaahẹ nịnị. Aza ẹ yị vịdị rẹ ẹngụ ịsa ẹnịnị daa ịnị ẹtẹ Ijuda.

Ogu Isoromọnị

¹² Isoromọnị ộ sị avaba ọnị ohinọyị Ịsẹba sị yọ. Ịsa tụra ịsa ọnị o họ̀ use anị ịrẹma ẹnya ọnị ọ kụ́ vẹ vị ọnị Isoromọnị sị yọ. Dị ọnịrị ezi ahụ anị varẹma nọ ẹkụra anị nị.

¹³ Ịrayị-ịrayị Isoromọnị aa dọ ẹyịza igooru ana rata ikirogirami akawụ-akawụ oze ẹwụrọnya tụra akahị (23,000)

¹⁴ Ịrẹma ẹkẹhị irehi ọnị osohu nịnị aa tụ́ yọ, ohinọyị nịnị ene hi ẹtẹ Arebiya ẹnịrị Ịgọvọnọ Anisirẹrị nịnị vá ana raà sị isiriva ọnịrị igooru va yị Isoromọnị.

¹⁵ Isoromọnị ộ sị igooru ana rata ikirogirami ẹẹta tụ́ ogonto ọgana-ọgana ịrẹka

¹⁶ Ọ rẹ sị igooru tụ́ ogonto oweyi-oweyi ịrẹkarẹchẹhị ọnị ụrata igooru ene e si tụ́ ọ jịha che ini ikirogirami ẹẹva. Ogonto ẹnẹnị vị ọnị kụ́ hi ini irehi anị ana ya ini uruku Ịrẹbanọnị.

¹⁷ Ọhọmị ọdọba a sị mẹ̀ aga ohinọyị anị, dị a wụ́ eyi igooru ku ọ nị.

¹⁸ Igooru a sị mẹ ịrẹhụ pe e ọnịrị aha ọyị kụ ụvọ tụra nị. Â nyị uyi idu ana jẹẹ akaha eyi ẹnyị eyi ọsa aga ohinọyị.

¹⁹ Â nyị uyi idu ẹwụrẹva ene hi jẹẹ ịrẹsụ ode ịhịnọnyị, eyi ẹnyị eyi ọsa ode ọnyọọnya ẹnẹẹ. Ẹ yị nyị ẹngụ aga ohinọyị ọnọọ ịrẹsụ ẹtẹ.

²⁰ Avaba ako ohinọyị Isoromọnị vị ana sị̀ igooru mẹ̀. Avaba ẹnya ịsọyịrị irehi ohinọyị ana ya ịnị iruku vị ana rẹ sị igooru mẹ, agụvị ka ẹ yị ịsị isiriva vị ịnị ụmẹ Isoromọnị.

²¹ Isoromọnị ohinọyị ộ nyị ẹpa ịnị enyi rụrụ ẹnị ezi ahụ anị aā sị sẹ ohu na Itasisi beri ene hi Ihurami. Ịrayị ẹtẹẹta ọọ̄ sịị tụ́ wa na kụ igooru, isiriva, ọhọmị ọdọba beri ọkavụ nịnị ọnịrị inomi ana nyị asịsẹ achẹrẹ-achẹrẹ hụrẹ na yọ.

²² Isoromọnị ọ vị ohinọyị ana nyị ẹkẹhị hu ịnị ẹhẹ ịnị ụmẹ ọnọọ nị. Ọnị ọ rẹ yẹ ịrẹyị hu nị.

²³ Avaba ohinọyị ene hi ịrẹsụ ẹtẹ vị ana aā nọ ịda anị ne họ̀ use ịrẹyị agụvị dị ẹ wụ́ ịrẹyọyẹ ọnị Ẹnẹyịmavara sị yọ.

²⁴ Ohinọyị ẹnẹẹ vị aa kụ ogu irenyi-irenyi va mẹ̀ ẹ ẹyịza. Ệ kụ isiriva, igooru, obo, ẹnya ịrẹkụ, ịsẹpẹ ohuru-ohuru, umaata ọnẹẹ ọnịrị araka va yọ. Ịrayị-ịrayị ẹ vavọọ aa kụ ẹyịza va yọ nị.

²⁵ Isoromọnị ộ nyị irehi umaata ọnịrị ịkẹkẹ ịrẹkụ akawụ-akawụ oze ẹẹva. Ộ nyị umaata akawụ-akawụ oze ịhịnọnyị ọnị ọ za zụ tụ Ijerusarẹmị ọnịrị ẹkụra ẹbanyị-ẹbanyị irenyi-irenyi ana vọ.

²⁶ Ọnị ọ vị ohinọyị tụra avaba ohinọyị nịnị hụrị Irehu Ehwirati eyi ẹbẹẹba na ngụ ẹtẹ Anihwirisitiya eyi ụvẹtẹ ọnịrị ẹhwị ẹtẹ Anijipiti.

²⁷ Ịnị ụmẹ ọnị Isoromọnị sị vị ohinọyị, isiriva vị ana gwẹẹtẹ Ijerusarẹmị anka ata avọọ. Ọchị Isida vị ana rụrụ anka ọchị isikamọ ene hi iruvo ataba ene hi Ijuda avọọ.

²⁸ Umaata anị vị ana a kụ hụrẹ Ijipiti ọnịrị ẹkụra ana vọ va yọ.

Usu Isoromọnị

²⁹ Avaba ịsa ana vọ ọnị Isoromọnị mẹ̀ hụrẹ ụmẹ ọnị ọ sị rị ohinọyị na ngụ ọdịrẹma vị ana chẹrẹ tụ ịnị iwe ịtọpa Ịnatanị ọnịsẹ ọnịrị iwe ịsẹ Ahija Anisiro beri iwe etore Ido ana vị ọza ene re ẹtẹ yị Ijerobowami Ohinọyị Isirẹrị.

³⁰ Isoromọnị ộ mẹ̀ ohinọyị tụra avaba Anisirẹrị nịnị ịrẹsụ Ijerusarẹmị ịrayị ẹbẹẹva.

³¹ Òo me su, di e ne e ịnị ẹkụra ada anị Idevidi nị. Ozi anị Irehobowami ọ vana rị ohinọyị tụ udi anị nị.