2 Ịtọpa 7 - IWE ỌNỊNỊ

Isoromọnị ô sị irehi Ohomorihi tụ́ irenyi

¹ Isoromọnị mẹ maanị mẹ̀ aduwa ta kẹnẹ, ịra hụrẹ ẹbẹẹba chi vẹ, dị ọ va rị ịsọvọ anaā rị ịra ana ya ịrẹsụ ụta ịra nị. Obobooro ọnọọ di ụbanyị Ẹnẹyịmavara vị ẹtohweyi dọ avaba irehi anị nị.

² Avọọ ẹ yị nyị ohirẹsụ irehi Ohomorihi ana nyayịnẹ ngụ ịzọọ.

³ Ịjị aza maanị re ịra ọnịrị ẹtohweyi ụbanyị Ẹnẹyịmavara, ene hí irehi anị, dị ẹ vaku ẹtẹ, dị ẹ hẹkẹ ẹ, dị ẹ kụ́ ọ avọ agụvị ka ọ yẹ ịrẹyị dị oō sì ịrẹyị ọza pooro nị.

⁴ Ohinọyị Isoromọnị ọnịrị avaba aza mẹ̀ ịsọvọ yị Ẹnẹyịmavara nị.

⁵ Imaaru ọnị Isoromọnị sị mẹ̀ ịsọvọ ọnọọ vị akawụ-akawụ oze ịhịnọnyị (22,000) dị atẹmẹ ẹnị vị akawụ-akawụ oze ịrẹka (120,000) nị ịjị ọ vavọọ sị ọ mẹ dị Isoromọnị ọnịrị avaba Anisirẹrị sị irehi ọnọọ yị Ohomorihi nị.

⁶ Ohirẹsụ irehi Ohomorihi nịnị vị ana jẹẹ aha ụkọrọ ẹnịnị, dị Anireevi nịnị aa jị ahẹ, di e yee hu ẹnya isohu ọnị Idevidi mẹ ka aa sị gama Ẹnẹyịmavara agụvị ọyịsị ẹnẹ ẹ yị ma ta nị. Ohirẹsụ irehi Ohomorihi nịnị ene ee hu ịkakanchị vị ana jẹẹ va eyi ka onisohu ẹnẹẹ, dị avaba Anisirẹrị jẹẹ ịzọọ beri wa.

⁷ Ịhị ọnọọ Isoromọnị rẹ sị ịnị akakana ohweje ana yà ọvịdị irehi Ẹnẹyịmavara tụ́ irenyi yị Ohomorihi nị. Ịnị ohweje ọnọọ Isoromọnị ya sị ịsọyịrị mẹ̀ ịsọvọ dị ọ rẹ kụ́ ịsa va yị Ohomorihi, dị ọ rẹ sị ụ̀hị̀ ịsọvọ ẹngwọọrọ mẹ̀ ịsọvọ nị. Ộ vavọọ mẹ ịzọọ agụvị ka aha ịsọvọ ana a sị enyusẹ ịkọpa mẹ ana ya ọvịdị Ẹnẹyịmavara ọ sị weyi. Ọ yị dọ ịsọyịrị ana aā sị mẹ̀ ịsọvọ ọnịrị ẹyịza ana aa kụ́ va yị Ohomorihi ne beri ụ̀hị̀ ịsọvọ ẹngwọọrọ.

⁸ Ịnị ụmẹ ọnọọ vị Isoromọnị sị rị eche ajẹngụ ẹkụhị ịhịmba. Avaba Anisirẹrị vị ana wara gụ pè e tatarata. Ọkọnị aza ệ hụrẹ Irabohamati huu na ngụ ịnị okuha Ijipiti vẹ.

⁹ Ẹnịnị ệ vavọọ ya ịzọọ mẹ ẹkụhị ịhịmba ene e sị ụta ịsọvọ tụ́ irenyi yị Ohomorihi, ẹkụhị ịhịmba ọhụva vị ẹnẹ ẹ sị rị eche. Ịhị ẹ tụ́ ọ ẹkụhị ịhịnta ịnị ẹkụhị ịhịmba ụpẹ ọhụva, avaba ịragụ ya mẹ̀ aduwa ana a sị za a ẹtẹ nị.

¹⁰ Ịhị ẹ tụ́ ọ ẹkụhị ohurẹẹta ịnị ụhwẹ ịhịmba ọnọọ, Isoromọnị kà yị aza ka ee nọ eehi ẹnịnị nị. Dị ẹ yaa jẹ, dị ayị ẹnịnị ee hine agụvị ka Ẹnẹyịmavara ộ mẹ̀ ịsa ozoza yị Idevidi ọnịrị Isoromọnị ne beri Anisirẹrị ana vị aza anị.

Ẹnẹyịmavara ộ sị ẹngụ zụ Isoromọnị

¹¹ Â nyị ẹkụhị ọnya aanị, ụmẹ ọnọọ Isoromọnị ộ sị irehi Ẹnẹyịmavara dà, ọ rẹ raà dà irehi anị ụvọta. Ộ sị irehi ẹyịva ẹnẹnị dà ta.

¹² Ịrahụ ịhị ọnọọ, Ẹnẹyịmavara sị ẹngụ zụ Isoromọnị, dị ọ kà yọ ka, ọnị ọ raà wù aduwa anị nị. Ọnị ọ raà nyị irehi anị ọnọnị ka ọ vị aha ịzị a vaa yaa mẹ̀ ịsọvọ yị ọnị.

¹³ Ụmẹ ọnị ọnị ọ̀ọ za orihi jẹẹ ka asị ọ zụ̀, dị ọnị mẹ ọda ka akụvarịva ọ rị ịsa ịnị aarẹ, a vị dị ọnị sị ụkụ za aza anị nị.

¹⁴ Aza anị ana aa sị ịrẹha anị hị́, ẹ̀ẹ va ẹngụ ẹnịnị nẹtẹ, dị ẹ mẹ̀ aduwa, dị ẹ ro ịnẹ varẹma, dị ẹ va hụụnị ebira odivi ẹnịnị, ọnị vaa wụ́ aduwa ẹnịnị hụrẹ ẹbẹẹba, dị ọnị sị eyi hụụnị ịvị ẹnịnị, dị ọnị mẹ ẹtẹ ẹnịnị zoza yị ịsa aarẹ.

¹⁵ Ọnị vee sere irehi anị ọnọnị, dị ọnị wụ́ aduwa avaba aduwa ana aa mẹ̀ ịzọọ

¹⁶ agụvị ka irehi ọnọọ vị anị. Ịzọọ ọ vị aha ịzị a vaa hẹkẹ ọnị pooro nị. Ọnị vee sere e pooro nị.

¹⁷ Ẹnịnị ẹ̀ẹ sị ịzẹyịza hẹkẹ ọnị anka Idevidi ada ẹnịnị ana saasa ọda anị, dị ọ mẹ avaba ịsa ọnị ọnị mẹ ọda anị yọ.

¹⁸ Ohomorihi kà ọnị vaa sị ụvọ za oto ọnị ọnị wo yị Idevidi ada ẹnịnị ka evere anị ẹ vaa rị ohinọyị Isirẹrị pooro nị.

¹⁹ Ama Isoromọnị ọnịrị aza anị ẹ̀ẹ na sị ahụ jịnẹ ọda anị ọnị ọnị raà sị yi wa, dị ẹ na hẹkẹ ori nịnị,

²⁰ dị ọnị kụ́ wa hụụnị ẹtẹ ọnị ọnị vịdị sị yị wa, dị ọnị kara ụvọ hụụnị irehi anị ọnị ọnị sị tụ́ irenyi ka aa hẹkẹ ọnị ịzọọ. Avaba aza vị ana vaa sị wa mẹ̀ isiya, dị ẹ yaa si eyi wụ́ wa.

²¹ Ịjị ụmẹ oo tu, irehi ọnọnị ana maanị ngụ ọza eyi, aanị vee hi aza eyi, dị aza ee, họ̀ use ka sị ẹ vẹ dị Ẹnẹyịmavara maanị mẹ anẹkụra ọnọnị ọnịrị irehi ọnọnị aanị?

²² Dị aza aa kà a, agụvị ka, ẹnịnị e reè yi Ẹnẹyịmavara Ohomorihi ẹnịnị tịtẹ yọ nị. Ohomorihi ọnọọ ọ kụ́ ohiku ẹnịnị jịnẹ hụrẹ ẹtẹ Ijipiti nị. Ama aza ẹnẹnị ẹ raà kú ẹngụ ẹnịnị vaka ori nịnị, dị ẹ yaa hẹkẹ wa nị; avọọ Ohomorihi kụ́ avaba ịrẹyị odivi ẹnẹnị ve tụ́ wa nị.