2 Ịtọpa 5 - IWE ỌNỊNỊ

 sị apoti oto vẹ ịnị irehi Ohomorihi

¹ Ịjị avaba ụkọrọ irehi Ẹnẹyịmavara ta Isoromọnị mẹ̀, dị ọ kụ́ avaba ẹnya ọnị ada anị Idevidi vịdị sị yị Ẹnẹyịmavara va tụ́ ịzị aa kụ́ ẹnya hi ịnị irehi Ohomorihi nị. Ộ kụ́ isiriva ọnịrị igooru ne beri avaba ẹnya ana vọ na hi ịzọọ.

² Dị ọ hị́ avaba azọkụ ọnịrị ohi ịrẹsụ-ịrẹsụ, ne beri ohi abara-abara ene hi Isirẹrị vẹ Ijerusarẹmị ka ẹ na sị apoti oto Ẹnẹyịmavara hụrẹ Ịzayọnị ana vị ẹkụra Idevidi.

³ Ịzẹyịza, dị avaba Anisirẹrị kụ ẹngụ gụ ịnị ụmẹ ana aā sị rị eche ajẹngụ ịnị ụhwẹ ịhịmba ịrayị nị.

⁴ Ịjị avaba azọkụ Anisirẹrị nịnị sị gụ, dị Anireevi nịnị sị apoti oto ọnọọ nị.

⁵ Dị ệ sị ọ na tụ ịnị irehi Ohomorihi, dị ohirẹsụ irehi Ohomorihi nịnị ọnịrị Anireevi nịnị kụ́ ajẹngụ anị ọnịrị ẹnya ene hi ịnị anị va tụ́ ịzọọ nị.

⁶ Isoromọnị ohinọyị ọnịrị avaba ịragụ ya ọvịdị apoti oto dị ẹ wụ́ atẹmẹ ọnịrị ụnọ ọrụrụ ọnị ọza ẹ yẹ za ịrịka mẹ̀ ịsọvọ nị.

⁷ Ịjị ịsọvọ ta wa mẹ̀, dị ohirẹsụ irehi Ohomorihi nịnị sị apoti oto na tụ́ aha ana nị huu ịnị irehi Ohomorihi nị. Dị ẹ sị ọ tụ́ ụvẹtẹ avaka icherubi nịnị nị.

⁸ Dị icherubi nịnị gana avaka ẹnịnị agụvị o kú apoti ọnọọ ọnịrị ọchị anị ịrẹsụ.

⁹ Ọchị anị ẹ gọdọ ẹtẹẹtẹrẹ ọnị ọza zụ re ịnị aku ana gụrị ọ. Ama ọza ẹ zụ re eyi ẹhẹ. Ẹnya ẹnẹnị vavọọ hi ịzọọ pooro ve tu ajịnị.

¹⁰ Nyị ịsị ẹ ya ịnị apoti oto ọnọọ ẹyị vị ịrẹta oku ẹẹva ọnị Imosiisi sị tụ ọ ịrẹsụ ataba Ịhọrẹbị ịnị ụmẹ ọnị Ẹnẹyịmavara ọnịrị Anisirẹrị sị hị́ eku yị ẹngụ ẹ mẹ hụrị Ijipiti.

Ẹnẹyịmavara ộ sị igirima anị zụ

¹¹ Ịrẹma ọnị a raà sị apoti tụ́ ịnị aku ọnọọ, dị ohirẹsụ irehi Ohomorihi nịnị jịnẹ hụụ ịzọọ nị. Avaba ẹnị ana raà sị ẹngụ tụ́ irenyi yị Ẹnẹyịmavara kẹnẹ ẹ zụ ya ịzọọ nị. Ẹ yị vị ogu ọnị ọza ya ịnị anị ọ sị nị tu ọ ka ọ zụ ngụ ịzọọ.

¹² Avaba Anireevi nịnị ana vị ọjahẹ ệ jẹẹ beri Asa, Ịhẹmanị Ijedutuni ẹnịrị ezi anị ne beri anda ẹnịnị. Ẹnịnị vị ana jẹẹ akaha eyi ịzị ọyịị̄ zịị hụrẹ vẹ, dị ẹ kụ́ ẹnya ọvwọọvụ, di e yee hu isohu nị. Ohirẹsụ ẹchẹhị tụra oohu ee hụ́ ịkakanchị beri wa nị.

¹³ Ẹnị ene hú ịkakanchị ẹnịrị aza ana jị ahẹ vị ana vabẹ aa gama Ẹnẹyịmavara, dị ẹyaa kụ́ ọ avọọ. Isohu irenyi-irenyi ẹnịrị ịkakanchị beri ịchachaa ene hu vị ana sụ wanyị-wanyị kẹnẹ. Dị aza sị ọngwẹ tụ́ ẹba aa jị ahẹ gama Ẹnẹyịmavara nị. Ê jị ahẹ ga a, dị è kà, oo zoza, di o si ọza pooro. Ịnị ụmẹ ọnọọ eguhi chire ku avaba irehi Ẹnẹyịmavara,

¹⁴ eguhi ana dẹngụ, ohirẹsụ irehi Ohomorihi ệ yị nyẹngụ mẹ̀ ụkọrọ, dị ụbanyị Ẹnẹyịmavara hi irehi anị nị.