2 Ịtọpa 25 - IWE ỌNỊNỊ

Amaziya ộ rị ohinọyị Ijuda

¹ Ịrayị ohurẹẹhị Amaziya vị dị ộ rị ohinọyị, dị ọ mẹ̀ ohinọyị ọnọọ ịrayị ohurịhịịna Ijerusarẹmị. Ijehoyadini ana vị Anijerusarẹmị ọ vị ọnyị anị nị.

² Amaziya ộ mẹ̀ ebira ene hine Ẹnẹyịmavara ayị ama ệ yị sị ayị ọnya mẹ̀.

³ Obooboro ọnị ụkata ngụ ụvọ kẹnẹ ọ wụ̀ avaba ọdọvịdị nịnị ana wụ̀ ada anị.

⁴ Ama ệ yị wụ̀ ezi aza ẹnẹẹ agụvị ka ộ saasa ọda ọnị Ẹnẹyịmavara mẹ̀ yị Imosiisi, ọda ọnọọ ka: Asị a wụ̀ aza ana ma ezi agụvị ebira odivi ezi ẹnịnị, avọọ asị a rẹ wụ̀ ezi agụvị ebira odivi aza ana ma wa. Ọzọza o su usu ebira odivi ọnị ọ mẹ̀.

Ịrẹkụ Anedomi

⁵ Ohinọyị Amaziya ô mẹ̀ eto, dị ộ kụ́ avaba anọrụ Anijuda ọnịrị Anịbẹnjamịnị hi ini isoja, dị ọ nyị ọdọvịdị isoja yị ịrẹsụ ọnyọọnya. Ộ za wa ịrịka dị anọrụ ana vị ẹhụ ịrayị ohu da a vahịrẹ vị akawụ-akawụ oze ẹchẹhị tụra ẹvarẹwụ.

⁶ Ộ sị ẹkẹhị isiriva Ikirogirami akawụrakahị tụra akava dọ isoja akawụ-akawụ oze ẹvarẹwụ hụrẹ Isirẹrị.

⁷ Ọnịsẹ Ohomorihi ọnya ô ne tụ́ ohinọyị, dị ọ ka yọ ka asị haya isoja Anisirẹrị saasa ẹngụ nọ ịrẹkụ. Ẹnẹyịmavara ọ yị ya pè Anehwireemi nịnị.

⁸ Ọ vaa navọ ka ọnịvị nịnị ẹ nyị ẹbẹẹba ẹnịnị nị. Ẹ yị nyị ẹ mẹmẹ kata pooro ka ẹ vị Ẹnẹyịmavara ee hu wa ẹtẹ yị ọnịvị ẹnịnị.

⁹ Ịzẹyịza, dị Amaziya họ̀ ọza Ohomorihi ọnọọ ka sị ọnị ọọ mẹ ịnị ẹkẹhị ọnị ọnị sị yị wa aanị? Dị ọ va ohi yọ ka, Ẹnẹyịmavara ọ zụ mẹ ene huna avọọ yọ.

¹⁰ Avọọ dị Amaziya hụrẹ isoja Anehwireemi ẹnẹẹ ụvọ ka ẹ varẹma nọ eehi ẹnịnị nị. Ịsa ọnị ọ mẹ aanị, vị ana nyayịnẹ mẹ ka e du wa ayị hi Anijuda, dị ahịka ọyịkụ-ọyịkụ ẹ sị varẹma nọ eehi ẹnịnị nị.

¹¹ Amaziya ộ sị ayọvị kụ́ aza jịnẹ nọ ịrẹkụ ini ozi ẹtẹ anọ, dị ọ wụ́ isoja Anedomi akawụ-akawụ oze ẹẹhị (10,000) nị.

¹² Dị ẹ rẹẹ̀ za aza ẹnị akawụ-akawụ oze ẹẹhị ireyi-ireyi, dị ọ kụ́ wa nọ ịrẹsụ ọwọrọba, dị ọ tụ́ wa ụvọ zina na gara ha nị.

¹³ Isoja Anedomi ọnị Amaziya dụ varẹma ka asị ẹ saasa ọnị nọ ịrẹkụ aanị, vị ana va eyi ịrẹkụ tù anẹkụra Ijuda nịnị hụrị Isamariya na ngụ Ịbẹtị Ihoroni. Aza ẹnị akawụrakahị ẹ wụ́, dị ẹ kụ́ ogu ẹnịnị ẹtẹẹtẹrẹ nị.

¹⁴ Ịjị Amaziya raà nyị ẹbẹẹba isoja Anedomi ẹnẹẹ, dọ ọ kụ́ ori ẹnịnị ọnị ọ dọ wa jẹẹ dị aa hẹkẹ wa, dị aa rị eturare ịra yị wa nị.

¹⁵ Ebira ọnị ọ mẹ aanị vị ana nyayịnẹ kụ́ Ẹnẹyịmavara ayị, avọọ ọ tụ́ ọnịsẹ ka ọ̀ họ̀ ọ sị ẹ vẹ dị aa hẹkẹ ori ẹnẹ ẹ yị zụ dọ aza anị ha hụụnị ụvọ anị?

¹⁶ Ọ maa kà ụtụ yọ, Amaziya da jị ọ, dị ọ kà ọ yịị mẹ hẹẹ ọnị a wụ́ ọ nị. Ọnị wáá mẹ̀ ẹ anajuwe anị nị?

Isirẹrị ô huna Ijuda

¹⁷ Amaziya ana vị ohinọyị Ijuda ọnịrị anajuwe anị geeyi ịrẹkụ tụ́ Anisirẹrị nị. Ộ tụ́ hi ohinọyị Ijehowasi ozi Ijehowahazi ana vị aazị Ijehu ka ọnịrị ọ ẹ gẹ eyi ịrẹkụ.

¹⁸ Ijehowasi va ohi na yọ, dị ọ kà a â nyị igegenechi ịrẹsụ ataba Ịrẹbanọnị ana tụ hi ọchị Isida ọbanyị. Ọ kà ọ sị ozi anị ọnẹẹ ga ozi ọnị. Di uye ịnị avị para igegenechi ọnọọ hu dị ọ sị ahụ za siisi ẹtẹ nị.

¹⁹ Ee wu ka ọnị o huna Anedomi nịnị, ama ọnị aa kà a yọ ka ọ ya ini eehi anị hẹẹ. Sị ẹ vẹ di e sì ịrẹyị ana vaa rị ọnịrị aza anị ịrẹsụ?

²⁰ Ama Amaziya ô yi. Ohomorihi o si ka a wụ̀ wa agụvị ka ẹ yaa hẹkẹ ori Anedomi nịnị.

²¹ Avọọ, dị ohinọyị Ijehowasi kụ́ aza anị nọ ịrẹkụ ohinọyị Amaziya, dị ẹnị ẹyịva gẹ Ịbẹtị-Isemesi ịnị ẹtẹ Ijuda nị

²² Dị aa pa ịva yị isoja Anijuda nịnị, di ê zwe hụrẹ eyi ịrẹkụ nọ eehi ẹnịnị nị.

²³ Ijehowasi ộ za Amaziya, dị ọ sị ọ za nọ ịrẹkụ Ijerusarẹmị. Di o wu ọvọ anị hụrị oze ọbanyị ana a hị́ Ehwireemi na ngụ oze ọbanyị ana a hị́ Akaha. Ọvọ ọnị e wu ọ gọdọ ahụ akata.

²⁴ Ijehowasi ộ kụ́ igooru ọnịrị isiriva ne beri avaba ẹnya irehi Ohomorihi ọnị evere Ọbẹdị Edomi si eyi pè vaka aza ọnị ọ za ọrịhị nọ Isamariya.

 wụ̀ Amaziya

²⁵ Amaziya Ohinọyị Ijuda ộ ra ịrayị ẹwụrẹhị ịrẹma ọnị ohinọyị Ijehowasi su kwooze.

²⁶ Avaba ịsa ọnị Amaziya mẹ ịnị ụmẹ ọnị ọ sị vị ohinọyị vị ana a chẹrẹ tụ ini iwe ịtọpa Ohinọyị Ijuda ọnịrị Isirẹrị nịnị.

²⁷ Obobooro ọnị Amaziya nyima aa jịnẹ Ẹnẹyịmavara, aza ẹnyị Ijerusarẹmị geeyi ka ẹnị aa wụ̀ ọ nị. Ô zwe na tẹ̀ Irakisi ịzị ọnịvị anị nịnị dụ ọ na wụ̀ ọ.

²⁸ Oku anị vị ana sị tụra umaata vẹ Ijerusarẹmị ịzị e ne pe ohiku ẹnịnị, ịnị ẹkụra Idevidi.