2 Ịtọpa 22 - IWE ỌNỊNỊ

Ahaziya ô vị ohinọyị Ijuda

¹ Â nyị ụmẹ ọnyara aanị, ọnị Anarabi nịnị sị kụ́ ịrẹkụ nọ ẹtẹ Ijuda, dị ệ wụ̀ Ijehorami ohinọyị ọnịrị ezi anị, dị ahịka ajẹmọ anị ana a hị́ Ahaziya kẹnẹ ộ ha nị. Avọọ dị Anijerusarẹmị nịnị sị ọ rị ohinọyị tụ́ udi ada anị nị.

² Ịrayị ohurẹẹva ộ vị ịnị ụmẹ ọnị a sị sị ọ rị ohinọyị nị. Ọnyị anị Atarịya vị ozi Ahabị, dị ọ vị aazị Omiri nị. Ịrayị ọnyara kẹnẹ ộ rị ohinọyị

³ agụvị ka ọnyị anị ộ mẹ̀ ẹ ka ọ̀ saasa ebira odivi ọnị Ahabị ada anị ọbanyị mẹ̀.

⁴ Ahaziya ô mẹ̀ du Ẹnẹyịmavara eyi agụvị ka ịrẹma ọnị ada anị su, aza Ahabị ẹ vana vị anajuwe anị ana gụ́ ọ hyẹdụ nị.

⁵ Ộ saasa ajuwe ẹnịnị, dị ọ va ụvọ beri Ijorami ozi Ahabị ohinọyị Isirẹrị gẹ ịrẹkụ tù Ịhazẹrị ohinọyị Aramị ịzị a hị́ Ịramọtị-Igiriyadi, Ịzọọ Anarami nịnị ya tọ̀ Ijorami ụnava nị.

⁶ Ịjị ộ sị ụnava tọ̀, dị ọ vavẹ Ijezirẹẹrị va tụ́ ụ́hwọ́ ka ụnava anị ọ vị nị. Ahaziya ộ na ịzọọ na kú ọ ahẹ.

⁷ Ẹnẹyịmavara ộ zị oze ụsẹ ọnị Ahaziya zị aanị gụ ọ hyẹdụ. Ahaziya mẹ ne hee Ijorami, dị ọnịrị ọ ẹ na va eyi ka Ijehu ozi Inimisi ọnị Ẹnẹyịmavara nyị ka o vu ovwoovu Ahabị ẹtẹ.

⁸ Ijehu mẹ vavọọ ee vu ovwoovu Ahabị ẹtẹ anka Ẹnẹyịmavara mẹ tụ́ ọ, dị o re ọdọvịdị Anijuda nịnị ẹnịrị ozi ọhụva Ahaziya ana saasa a vị Ijezirẹẹrị nị. Dị ọ wụ̀ avaba ẹnịnị saka-saka va ha nị.

⁹ Ịjị aza Ijehu maanị sị wa wụ̀, di e yee si Ahaziya ene zwe na tẹ̀ Isamariya nị. Ẹ mẹ za a, dị ẹ sị ọ ve tụ̀ Ijehu, dị ẹ wụ̀ ọ nị. Ẹnịnị ê ne oku anị agụvị ka ẹ sị ụbanyị yị Ijehosahwati ada anị ọbanyị ana sị avaba ayị mẹ̀ ịsị Ẹnẹyịmavara si. Ẹ yị kụkụ nyị aza ịnị ovwoovu Ahaziya ana zụ vị ohinọyị Ijuda.

Atarịya ọnịrị Ijowasi

¹⁰ Ịjị Atarịya ọnyị Ahaziya re ka ozi anị ô wusu, dị ọ wụ̀ avaba ezi ohinọyị Ijuda ha nị.

¹¹ Ama â nyị ozi ohinọyị Ijehorami ọnẹẹ ọnyara ana a hị́ Ijehoseba. Adẹnyara Ahaziya ọ vị, dị ọnyara ịnị ohirẹsụ irehi Ohomorihi nini nyị ọ nị. Ọnị ô were-were sị Ijowasi ọnịrị ọza ene si eyi pè e tẹ̀ ịnị aku ịnị irehi Ohomorihi agụvị asị Atarịya wụ̀ ọ beri ẹnị ọnị ọ vịdị wụ̀.

¹² Ịrayị ịhịnọnyị a sị ọ tẹ̀ ịzọọ, dị Atarịya mẹ ẹngụ anị ohinọyị tụra Anijuda nịnị ịrẹsụ ịnị ụmẹ ọnọọ nị.