2 Ịtọpa 18 - IWE ỌNỊNỊ

Ọnịsẹ Imakaya ộ kà Ahabị ọnọ

¹ Ịjị Ijehosahwati raà nyị ẹkẹhị, dị ọ ngụrẹyị, dị ọ mẹ eto di ozi anị nyị ozi Ahabị ohinọyị Isirẹrị nị.

² Ọ mẹ sị mẹ̀ ịrayị che parahu, dị Ijehosahwati nọ Isamariya ne heyi Ahabị nị. Dị ọ nyayịnẹ si Ijehosahwati ọnịrị aza ana saasa a ọzọga nị. Ộ wụ̀ atẹmẹ ọnịrị ụnọ ọrụrụ-ọrụrụ ọnị ọ sị si ọ ọzọga. Ahabị ô vene e ka ọ kù isoja anị saasa ọnị nọ.

³ Dị ọ họ̀ Ijehosahwati ka, “ọ́ọ́ va saasa ọnị kụ́ ịrẹkụ ne tù Ịramọtị-Igiriyadi?” Dị Ijehosahwati tụ́ ọ ohi ka, “Hee nị!” Ọ kà ọnịrị ọ vị ọnya, aza ẹnịnị vị ọnya nị. Ẹnị vaa saasa a nọ ịrẹkụ.

⁴ Di Ijehosahwati kà, “Ẹnị ẹ vịdị họ̀ use da, dị à yẹ Ẹnẹyịmavara mẹ̀ kà.”

⁵ Ịzẹyịza, dị ohinọyị Anisirẹrị hara ọnịsẹ akava nịnị gụ nị, dị ọ họ̀ wa ka, “Ọnị ọ́ọ́ nọ Ịramọtị-Igiriyadi ne pè wa kụ̀ ịrẹkụ à vị asị ọnị nọ?” Dị avaba ẹnịnị ka, “Wa na haara, ka Ẹnẹyịmavara va sị wa chire wu ụvọ.”

⁶ Di Ijehosahwati ve họ̀ use ka, “Aanị ka ẹ yị kụkụ nyị ọnịsẹ Ẹnẹyịmavara ọsa ịzẹnị, dị à rẹ họ̀ ọ use?”

⁷ Di ohinọyị Anisirẹrị kà a yị Ijehosahwati ka, “A nyị nyị ọza ịnya ana vọ ọnị ị zụ họ̀ use ka Ẹnẹyịmavara mẹ̀ kà. Ama ayị ọnọrụ ọnọọ vị anaā kụ́ ọnị, agụvị ka ọ mā kà ịsẹ ọyịza yị ọnị, à yị vị odivi. Ọnọrụ ọnọọ ọ vị Imikaya ana vi ozi Imira nị.” Di Ijehosahwati va kà a yị ohinọyị kà, “Asị ọ vavọọ kà dè.”

⁸ Di ohinọyị va hị́ ọga isoja ọnya ka ọ̀ wụsẹ na hị́ Imikaya ozi Imira vẹ nị.

⁹ Ịjọnọọ ohinọyị Anisirẹrị ọnịrị Ijehosahwati ana vi ohinọyị Anijuda vi ana yaayịtẹ, di ọzọza yà ịnị aga anị nị. Ọzọza vi ene chire awuru di e hi ịzị eē tụ́ ayị ini enoze ana na ngụ ịnị ẹkụra. Dị avaba ọnịsẹ hí ọvịdị ẹnịnị dị ọzọza aa kà ịsẹ nị.

¹⁰ Di Izedekaya ozi Ikenaana ọnị sị enyusẹ ọnya aanị, dị ọ sị mẹ ọpanyị nị. Ọ mẹ̀ sị ọ mẹ dị ọ ka, “Ẹnẹyịmavara kà ọpa ọnọnị wụ vaa sị tụ́ Anịsamarịya pooro di we vú wa ẹtẹ nị.”

¹¹ Dị avaba ọnịsẹ ana vọ ẹnị rẹ vavọọ kà ịsẹ dị ẹ ka, “Waa nọ Ịramọtị-Igiriyadi ka Ẹnẹyịmavara vaa mẹ ka we huna aza ẹnẹẹ.”

¹² Ịjị ọnụtụ ana a tụ́ ka ọ̀ na hị́ Imikaya tù ịzọọ dị ọ kà a yị Imikaya dị ọ ka, “Batọ ma kà ịrẹyị ọnya wụ o! Avaba ọnịsẹ e ne hi ịzẹnị vị ana sị irenu tẹ ọnya ka ohinọyị ọ vaa nyị ehuna ịnị ịrẹkụ ọnọnị nị. Aarịhịnị ẹwụrị wa ọ̀ sị irenu tẹ ọnya, dị ẹwa rẹ kà ọyịza yị ohinọyị.”

¹³ Di Imikaya ka, “Mâ sị Ẹnẹyịmavara hị́ eku ka ịsa tụra ịsa ẹnị Ẹnẹyịmavara ọ̀ọ kà mị kẹnẹ, mị vaa kà nị.”

¹⁴ Ịzẹyịza dị Imikaya ve si tù ohinọyị nị. Di ohinọyị kà, “Imika, ahẹ, yáá nọ Ịramọtị-Igiriyadi di ye ne pe wa kụ̀ ịrẹkụ, à vị asị ị nọ?” Di Imikaya ka, “Wa na, ka ẹ yị vaa nyị ịrẹyị. Ẹnẹyịmavara vaa sị waa chire wụ ụvọ.”

¹⁵ Di ohinọyị ka, “Hóò, ụpẹ ịrịka yà u wee si ka ma sị Ẹnẹyịmavara tụra wụ ka wa kà ịzẹyịza kẹnẹ mị?”

¹⁶ Di Imikaya va ka, “Mê re ka avaba Anisirẹrị ẹ sị gara hi ịnị ataba anka atẹmẹ ẹnẹ ẹ̀ yị nyị ọza ene ee sere wa avọọ. Ẹnẹyịmavara kà ẹnịnị ẹ yị nyị ohirẹsụ. Ọ kà ẹnịnị ẹ̀ varẹma ẹ̀ẹ nọ eehi ẹnịnị ịnị ẹngwọọrọ.”

¹⁷ Di ohinọyị Anisirẹrị kà a yi Ijehosahwati dị ọ ka, “Mâ vịdị sị sị ọ kà wụ ka ọnọrụ ọnọnị ọ mā ka ịsẹ ọyịza yị mị pàá, à yị vi odivi.”

¹⁸ Di Imikaya aa kịị kà ịrẹyị anị dị ọ ka, “Batọ ọ dị wụ́ ịrẹyị ẹnị Ẹnẹyịmavara kà. Ụmẹ ọnya mê re Ẹnẹyịmavara kà ộ yaayịtẹ ịnị aga anị, di avaba anggẹẹrị anị ẹbẹẹba jẹẹ pè e eyi ụvọrị ọnịrị eyi ụvọha anị nị.

¹⁹ Dị Ẹnẹyịmavara ve họ̀ use ka eni e ve nee vene Ahabị ka ọ̀ hịrẹ nọ Ịramọtị-Igiriyadi di o ne sú ịzọọ. Dị anggẹẹrị ọzọza aa kà a ka aanị, aanị ẹnị mẹ vaa kà nị.

²⁰ Dị ụhwẹ ọnya va jịnẹ vẹ dị ọ va jẹẹ ọvịdị Ẹnẹyịmavara, dị ọ ka ọnị ve ne vene Ahabị nị. Dị Ẹnẹyịmavara va họ̀ ọ ka ọ mẹ mẹ vaa mẹ̀ ẹ?

²¹ Dị ọ ka ọnị vaa jịnẹ tụ́ ẹhẹ, dị ọnị na mẹ ka avaba ọnịsẹ Ahabị ee cheeche. Dị Ẹnẹyịmavara kà ọ̀ jịnẹ na dị ọ vavọọ na mẹ, ka ụsẹ anị vee zoza.

²² Wéē re aanị ka Ẹnẹyịmavara ọ mẹ ka avaba ọnịsẹ awụ ẹnẹnị ee cheeche nị. Ẹnẹyịmavara ọnị ụvọta ọ kà a ka ịrẹyị odivi e vee tù wu nị.”

²³ Di Izedekaya ozi Ikanaani tere pè Imikaya, dị ọ kụ́ arụhwọtọ hi ọ eyi nị. Dị ọ ka, “Ụhwẹ Ẹnẹyịmavara mẹmẹ zụ para mị hu, dị ọ̀ va kà ịrẹyị wụ?”

²⁴ Di Imikaya ka, “Ịhị wèe si nyima ee zwe hụụnị aku ọnyị naa tẹ ịnị aku ọsa, u vee re.”

²⁵ Di ohinọyị Anisirẹrị ka, “Za Imikaya ọnọọ nịnị, dị wa sị ọ varẹma nọ Amọnị ịda Ịgọvọnọ ana sị eyi pe ẹkụra ọnịrị ịda Ijowasi ana vị ozi ohinọyị.

²⁶ Wèe tù ịzọọ dị ụ kà a ka mị ka à sị ọ tụ́ ịnị ẹngwa, dị waa dà ịsa kiiki yọ, dị wa rẹẹ sị enyi chee yọ. Ọ̀ vavọọ yà ịzọọ pooro dị ma vavẹ ịnị ẹngwọọrọ.”

²⁷ Di Imikaya ka, “Àa vị ka wa raà vavẹ ịnị ẹngwọọrọ, yẹ ka ẹ yị vị Ẹnẹyịmavara ọ kà ịrẹyị mị.” Dị ọ rẹ ka, “Avaba ẹwụ nịnị aza ẹnẹnị ẹ̀ wụ́ o!”

 wụ́ Ahabị eyi ịrẹkụ Ịramọtị

²⁸ Ịzẹyịza dị ohinọyị Anisirẹrị ọnịrị Ijehosahwati si hu aa nọ Ịramọtị-Igiriyadi nị.

²⁹ Di Ahabị ka Ijehosahwati ọ̀ mẹ apẹ ka ọza ẹnẹsa ọnị vị nị, di ò chire awuru anị dị ọ̀ọ nọ ịrẹkụ. Di ohinọyị Anisirẹrị ọnị rẹ mẹ ẹngụ anka ọza ẹnẹsa kẹnẹ di o si hu aa nọ ịrẹkụ nị.

³⁰ Ohinọyị Anisiriya ọnị ọ nyị aza anaā sịị umaata kụ̀ ịrẹkụ. Dị ọ vịdị sị ọ ka yị ọga isoja anị ẹnẹẹ ka asị a nyị ọza ẹnẹsa ẹnị ẹmịrịị kụ̀ ịrẹkụ à yị vị ohinọyị Anisirẹrị ọnị ịnya kẹnẹ.

³¹ Ọga isoja anaā sịị umaata kụ̀ ịrẹkụ ọnị mè yi re Ijehosahwati kẹnẹ, dị ẹ ka mba, ohinọyị Anisirẹrị yị, dị ẹ yaa dụ ọ ka ẹnịrị ọ ẹ̀ gẹ ịrẹkụ nị. Ẹ mẹ̀ vavọọ aa dụ ọ, di Ijehosahwati ọnị nowu za ẹtẹ nị. Di Ohomorihi gụ ọ ụvọ dị va wa eyi ka aha ọsa nị.

³² Ịjị ọga isoja anaā si umaata kụ̀ ịrẹkụ re ka ẹ yị vị ohinọyị Anisirẹrị ọ vị, dị ẹ và ịrẹma anị nị.

³³ Di ọza ịnya aanị maanị yi ne ọpa anị araara kẹnẹ nị, dị ahịka avọọ o mè yi ne che ohinọyị Anisirẹrị ịnị akakana ịzị awuru ịrẹkụ anị ọnịrị okurachị anị na gẹ nị. Dị ohinọyị Anisirẹrị wụsẹ ka ẹ yị ọza ana aa sị ụkẹkẹ anịị zị dị ọ kà, “Wụsẹ vara eyi, wa sị mị jịnẹ hụụnị udi ịrẹkụ ịzẹnị ka a sị mụ tụ̀ ụnava.”

³⁴ Ịhị ọnọọ ịrẹkụ vị ene nyị anyị. Ohinọyị ọnị vị ana jẹẹ pè ụkẹkẹ dị ọ và eyi kà Asiriya nị. Ini ụmẹ oruva, ohinọyị ô wusu.