2 Ịtọpa 16 - IWE ỌNỊNỊ

Ẹngụkata ene tu Isirẹrị

¹ Ịnị ịrayị ana tụ́ ọ ịrayị ohurẹẹwụ tụra ịhịnọnyị ọnị Asa sị vị ohinọyị ẹtẹ Ijuda, Ibaasa ana vị ohinọyị Isirẹrị kụ ịrẹkụ na rị Ijuda nị. Ibaasa ộ tenyi ẹkụra ana a hị́ Iraama dà agụvị asị a nyị ọza ana zụ jịnẹ tụ́ ẹhẹ a vị dị ọ hụrẹ ẹhẹ ngụ ne tu Asa ohinọyị ịzọọ.

² Avọọ dị Asa kụ́ isiriva ọnịrị igooru hụrẹ ịzị ogu hi ịnị irehi Ohomorihi ọnịrị ịnị irehi ohinọyị na yị Ịbẹnịdadị ohinọyị Isiriya ana ya Ịdamasịkọsị. Dị ọ tụ́ hị́ Ịbẹnịdadị ka;

³ ọnị ee si ka ọnịrị ọ ẹ̀ va ụvọ bẹ anka ohiku ẹnịnị mẹ vịdị mẹ̀ ẹ vẹ avọọ; isiriva ọnịrị igooru ẹnẹẹ vị ọnị sị mẹẹ ẹyịza, ộ ka obobooro ọnọọ ọnịrị Ibaasa ẹ̀ ha hi agụvị ọ kụ́ isoja anị hụụnị ẹtẹ anị.

⁴ Ịzẹyịza, dị Ịbẹnịhadadị dọ beri Asa, dị ọ mẹ̀ ọda ka ọdọvịdị isoja nịnị ẹnịrị isoja nịnị ka ẹ̀ hụrẹ ẹtẹ Ijuda nị. Isoja ẹnẹnị ẹ̀ vịdị raà dọ Ijoni, Ịdaanị, Ẹba, Ịbẹtị, Imaaka ọnịrị avaba ẹkụra ene hi Inahwitari ịzị ẹ kụ́ ẹnya ẹnịnị tẹ̀ hị́.

⁵ Ịjị ohinọyị Ibaasa maanị wụ́ ịsa anaa na, dị ọ za aza ana jị ọvọ kara Iraama jẹẹ dị ẹ va ụkọrọ hi ẹtẹ nị.

⁶ Ụmẹ ọnọọ, ohinọyị Asa sị kụ́ avaba anọrụ Anijuda gụ́ ka ẹ kụ́ ịrẹta ọnịrị ọchị ọnị Ibaasa a sị tụra ọvọ ọnọọ nị. Ẹnịnị vị ana kụ́ ẹnya ẹnẹẹ na jị ọvọ kara Ịgẹba ọnịrị Imizipa.

Ịhananị ọnịsẹ

⁷ Ịnị ụmẹ ọnọọ â nyị ọnịsẹ ọnya aanị ana a hị́ Ihanani. Ô ne tù ohinọyị Asa, dị ọ kà, Ẹnẹyịmavara ana vị Ohomorihi ẹnịnị kà agụvị ka ẹnịnị ẹ̀ para ọnị hu na va ẹngụ na ya ohinọyị Anarami, dị isoja Anisirẹrị ee zwe hụrẹ ẹngụ nị.

⁸ Ộ ka ẹnịnị ẹ tamayị ịzị Anetiyopiya ọnịrị Aniribiya nyị ụkata na za. Ẹnị ẹ vị ẹkụra ana nyị isoja rụrụ, dị ẹ nyị ịkẹkẹ ịrẹkụ ọnịrị umaata ịrẹkụ nị. Ama agụvị ka ẹnịnị ẹ̀ sị ayị tụra Ẹnẹyịmavara, dị ọ sị wa chire ẹnịnị ụvọ nị.

⁹ Ẹnẹyịmavara vị ana nyayịnẹ si eyi pe ẹhẹ agụvị dị ọ sị ụkata yị aza ana sị avaba ayị ẹnịnị yọ. Ama ẹwa sị ụra ọdẹngụ mẹ. Hụrẹ ụmẹ ọnọnị na, u vaa kụ́ ịrẹkụ pooro nị.

¹⁰ Ịrẹyị ọnọnị ọ mẹ ka Asa ọ kụ́ ayị hi ọnịsẹ ọnọọ, dị ọ ka a kụ́ ịchẹkẹchẹkẹ hi ọ ụvọ tụ ịnị ẹngwa nị. Hụrẹ ụmẹ ọnọnị Asa nyima aa chamayị yị aza anị ẹnyị nị.

Ọdịrẹma ịjọva ohinọyị Asa

¹¹ Avaba ịsa ana mẹ ịnị ụmẹ ohinọyị Asa nyima hụrẹ ẹtẹẹtẹ na ngụ ọzẹtẹ anị vị ana chẹrẹ tụ ịnị iwe ịtọpa ohinọyị Ijuda ọnịrị Isirẹrị nịnị.

¹² Ịnị ịrayị ohurẹẹwụ tụra ịhịịna ọnị Asa vị ohinọyị, ụkụ za ahụ dị ọ jị ọ avụ nị. Ama ẹ yị hụụ agụvị avọọ ro ịnẹ ka Ẹnẹyịmavara na ka ọ mẹ ọgụvọ yị ọnị. Ube ovosi kẹnẹ aa ngụ zịịzị nị.

¹³ Ịrẹma ịrayị ẹẹva dị Asa su nị.

¹⁴ Di e ne e ịnị ụsị ịrẹta ọnị ọ chi yị ẹngụ anị ịnị ẹkụra Idevidi. Dị ẹ kụ́ eturare ohuru-ohuru sisi ọ ẹngụ zị ọ yị ne anị nị. Dị a ka ịra giri-giri ana sị zị ẹngụ nị.