2 Ịtọpa 13 - IWE ỌNỊNỊ

Ohinọyị Abija ọnịrị Ijerobowami ệ kụ́ ịrẹkụ

¹ Ịnị ịrayị ana tụ́ ọ ịrayị ẹwụrịhịnta ọnị Ijerobowami rị ohinọyị Isirẹrị, a sị Abija rị ohinọyị Ijuda nị.

² Ịrayị ẹẹta kẹnẹ ọ mẹ̀ ohinọyị Ijerusarẹmị nị. Ọnẹẹ ọnya aanị ana a hị́ Imikaya ana vị ozi Uriyẹrị Anigibiya ọ vị ọnyị anị nị. Â nyị ụmẹ ọnya aanị ọnị ịrẹkụ sị chị tụ́ ịnị akakana Abija ọnịrị Ijerobowami.

³ Abija ộ kụ́ isoja akawụ-akawụ oze ịrẹka (400,000) nọ ịrẹkụ isoja Ijerobowami akawụ-akawụ oze akava (800,000).

⁴ Ẹnịnị vị ana na gẹ ịrẹsụ ataba Ehwireemi, ohinọyị Abija ộ nọ ịrẹsụ ataba Izemarayimi ịzị ọ hị́ Ijerobowami ọnịrị aza anị Anisirẹrị. Ọ kà ẹnịnị e batọ dị ẹ wụ́ ịrẹyị anị.

⁵ Ọ̀ kà ẹnịnị éé vana yẹ ka Ẹnẹyịmavara Ohomorihi Anisirẹrị ô hị́ eku ẹnị ẹ yị ma vara yị Idevidi ka ọnị aa sị udi ohinọyị Anisirẹrị yị ọnịrị ụnaka anị pooro zịna-zịna?

⁶ Ama Ijerobowami ozi Inebati vị ana kụ́ hịrẹ Isoromọnị ana vị ohinọyị anị.

⁷ Avọọ ọ mẹ rẹ kụ́ aza kẹnẹ-kẹnẹ ku ịrẹma na kụ́ ọ ka Irehobowami ozi Isoromọnị ụhwẹ agụvị ka o vi ozweyi, oni eyi anị ộ yị hweyi.

⁸ Abija kà ọyaanị Irehobowami vi eni tenyi ẹngụ dị ọ va eyi ịrazị ka udi ohinọyị ọnị Ẹnẹyịmavara raà sị yị Idevidi ọnịrị ụnaka anị. Agụvị avọọ ộ kụ́ otomiroku isoja kara ẹngụ anị, dị ọ sị ụnọ ana a sị igooru mẹ̀ ka ọ vị ori awụ nịnị.

⁹ Dị ọ dụ ohirẹsụ irehi Ẹnẹyịmavara ana vị ezi Eerọnị ọnịrị Anireevi nịnị. Dị ọ varẹma nyị ohirẹsụ irehi Ohomorihi anị anka anẹkụra ana vọ mẹẹ̄ mẹ̀ ẹ. Ọza tụra ọza anaa sị ụnọ a vị atẹmẹ ịhịmba ve, dị ọ nyị ẹngụ anị tụ́ irenyi anka ohirẹsụ irehi Ohomorihi ịsa ẹ yaa hị́ ori.

¹⁰ Ama ẹyị vị ana yịị hẹkẹ Ẹnẹyịmavara Ohomorihi ayị. Yẹ yị va ịrẹma anị. Ezi Eerọnị ana vị ohirẹsụ irehi Ohomorihi vị ana mẹ̀ ụkọrọ ẹnịnị, dị Anireevi nịnị aa gụ wa ụvọ.

¹¹ Ẹnẹnẹ ọnịrị oruva vị ọnị ẹ ya rị eturare ọnịrị uye ịsọvọ ịra. Dị ẹ yaa sị ụbụrẹẹdị vẹ ịrẹsụ iteburu ana nị. Oruva-oruva vị ọnị e yee hu ịra ozotupa ọ nyị irenu ịhịmba ọnị ọchị anị vị igooru. Ẹ ka ẹnị vaa mẹ̀ ịsa ọnị Ẹnẹyịmavara mẹ ọda anị, ama ẹwụ nịnị ọ raà va ịrẹma anị.

¹² Ohomorihi ọnị ụvọta ọ vị ọdọvịdị ayị, dị ohirẹsụ irehi anị nịnị ya ịzẹnị beri ịkakanchị ẹnịnị. Ẹnịnị ee tenyi ẹngụ ka ẹnị ee hú ịkakanchị hị́ yị ka ya va eyi ịrẹkụ ka wụ. Anisirẹrị nịnị asị e va eyi ịrazị ka Ẹnẹyịmavara Ohomorihi ohiku awụ nịnị. Wẹ yị vaa zụ nyị ehuna.

¹³ Ịnị ụmẹ ọnọọ, Ijerobowami ộ tụ́ isoja anị ẹnyị ka ẹ zị oze ịrẹma na tẹ̀ zi isoja Anijuda ịrẹma, dị ẹnị ana vọ ẹ va gẹrị ẹnị oze ọvịdị.

¹⁴ Ịjị isoja Anijuda nịnị kana eyi, di e re ka ẹnịnị ẹ raà kara ẹnị hi, dị ẹ da ịpẹ yị Ẹnẹyịmavara kà ọ gụ́ ẹnị ụvọ, dị ohirẹsụ irehi Ohomorihi nịnị hu ọpanyị ịrẹkụ ẹnịnị nị.

¹⁵ Dị avaba Anijuda nịnị na owu ịrẹkụ, dị Abija kụ́ wa ku ịrẹma nọ ịrẹkụ isoja Anisirẹrị nịnị nị. Dị Ohomorihi sị wa nyị ẹbẹẹba Ijerobowami ọnịrị isoja anị nị.

¹⁶ Isoja Anisirẹrị nịnị vi ene zwe kwooze yị isoja Anijuda nịnị, dị Ohomorihi mẹ̀ ka Anijuda nịnị e huna wa nị.

¹⁷ Abija ọnịrị isoja anị vị ana nyayịnẹ pa ịva yị isoja Anisirẹrị ẹtẹẹtẹrẹ. Achẹva Imiriyọnị ọka isoja ẹnịnị vị ẹnị wụ̀ va ha.

¹⁸ Ẹnịnị huna Anisirẹrị nịnị, agụvị ka Anijuda nịnị ọ sị ayị tụra Ẹnẹyịmavara Ohomorihi ohiku ẹnịnị, dị ẹnịnị huna Anisirẹrị nịnị nị.

¹⁹ Abija ộ dụ isoja Ijerobowami, dị ẹ dọ wa ẹkụra ẹnyị. Ẹkụra ọnị ẹ dọ wa ẹ vị Ịbẹtẹrị, Ijesana ọnịrị Ehwironi ne beri ẹkụra oweyi-oweyi ana gụrị ẹkụra ẹnẹẹ.

²⁰ Ijerobowami ọ yị vana zụ dọ ụkata anị varẹma ịnị ụmẹ ohinọyị Abija. Ọdịrẹma anị Ẹnẹyịmavara hu ọ nẹtẹ dị ọ wụ́ ọ nị.

²¹ Abija vị ana vana nyị ụkata huu avọọ. Ộ nyị ọnẹẹ ẹwụrẹna, dị ọ́ ma ezi ọnọrụ ohurẹẹva ọnịrị ezi anẹẹ ẹwụrịhịnọnyị.

²² Ịtọpa Abija ana vọ ịnị ịsa ọnị ọ́ ka ọnịrị ọnị ọ́ ka vị ana chẹrẹ tụ ịnị ịtọpa ọnịsẹ Ido.