2 Itimoti 4 - IWE ỌNỊNỊ

¹ Wáa yẹ ka ẹkụhị ọnya Ijeesu Ikirisiti vaa vaa vẹ, dị ọ mẹ ka aza ẹ̀ yẹ ka ọnị aa mẹ ịjọva nị. Ọnị ọ rẹ vaa mẹ̀ ọkarẹyị aza ene sú ọnịrị aza ana yára nị. Máa sị Ijeesu ọnọọ ọnịrị Ohomorihi hú wu ụvọ

² ka, waa kà enube ọyịzaa yị aza! Waa kà a ịnị ụmẹ ana aza èe sì ọnịrị ịnị ụmẹ ana aza è yi sì! Waa tụ́ wa ohuvọ, waa kà wa ọnọ, dụ wa rẹẹ tụ́ wa ọtụtụrụma! Re ka wáa nyị isuuru ẹtẹẹtẹrẹ, ụ màa zụ̀ wa ịsa!

³ Ụmẹ aa vẹ ana ahịka aza eyi kuku vee sì ka ẹnị ẹ̀ẹ wụ́ ịzẹyịza ana aa sịị zụ̀ wa. Dị ẹ kụkụ aa dụ ẹ́ẹngụ ẹnịnị kẹnẹ. Dị ẹ kụ́ aza gụ ka ẹ̀ẹ zụ̀ ẹnị ịsa eni eè sì ka ẹnị ẹ̀ẹ wụ́ kẹnẹ.

⁴ Dị e yi, dị ẹyị kụkụ sị ụtọ pe ịzẹyịza, dị ahịka ịtọpa kẹnẹ-kẹnẹ ẹ kụkụ sị ụvọ za nị.

⁵ Ama ewè re ka wáa sị ụvọ za ẹngụ awụ ịnị avaba ịsa! Waa sị ẹngụụ dọ ụya, dị waa kà enube ọyịza anka ụkọrọ awụ! Di u we re ka waa mẹ avaba ụkọrọ awụ saka-saka!

⁶ Àa vị ẹmịị yọ, ma sị ẹngụ tenyi ka à wụ̀ mị anka ịsa ịsọvọ avọọ. Ụmẹ o si tù ka ma hụụnị ẹhẹ ọnọnị.

⁷ Avaba ọpa ọnị mị zụ mẹ, ma sị ọọ mẹ ini echi ọnọnị. Ma sị echi amị zwe ta. Mâ sị eyi pe ịzẹyịza pooro ne tù ọzarẹyịrẹsụ.

⁸ Máa yẹ ka ẹyịza ọbanyị oni Ohomorihiī sịị yị ọza ana mẹ̀ ebira ana vọrọ, ọ raà sị tẹ mị. Ananyị yị anaā sịị ịzẹyịzaa mẹ̀ ọkarẹyị vaa sị ọọ mị ịnị ẹkụhị ọnọọ. Ayị vị ẹmị ịnya kẹnẹ ọ vaa sịị yị; ọ rẹ vaa sịị yị avaba aza ene ee sì ọọ ka ọ̀ vavẹ.

Ịpọọrụ ộ kà ịrẹyị ẹngụ anị.

⁹ Re ka wée jintu ve tù mi ịzẹnị.

¹⁰ Ịdẹmasị ọ raà sị ayị tụ́ ịnị ịsa ẹhẹ ọnọnị, o si zwe kà na yị mị, ọ zị nọ Ịtẹsaronika. Ikirisẹnsị ọnị ọ zị nọ Ịgaratịya, Ịtayịtọsị ọnị ọ rẹ zị nọ Idarimatiya.

¹¹ Iruuku kẹnẹ ọ kụkụ jẹẹ pe mi nị. Hị́ Ịmaakị dị ẹwụrị ọ ọ̀ zị vẹ! agụvị ka ọ zụ mẹ ọgụvọ mị ịnị ụkọrọ amị.

¹² Ma raà tụ́ Ịtayịkịkọsị nọ Ẹhwẹsọsị.

¹³ Wàaa vẹ, ụ sị awuru ọbanyị amị ọnị mị navọ tụ́ Itirowasị yị Ikaripọsị va mị! Rẹ kụ́ iwe amị va mị bẹẹ! Kụ́ ẹnya ọchẹrịsa ẹnẹẹ beri ọọ. Asị a nyị ka wẹ yị kụ́ ẹnya ọchẹrịsa ẹnẹẹ vẹ.

¹⁴ Ịsị Arẹkịsanda anaā mẹ ụ́hị́ avọọ mẹ mị, óo divi ẹtẹẹtẹrẹ. Ananyị yị o vee sí ọọ atọ avaba ịsa ọ mẹ nị.

¹⁵ Ẹwụ nyẹmba ọ̀ sị ụvọ za ẹngụ awụ ịnị ụvọ anị, agụvị ka vị ọ nyayịnẹ aa kụ̀ụ hịrẹ ịrẹyị ayị nị.

¹⁶ Ịhị ịpaapa ọnị mị na kụ́ irenu amị, ẹ yị nyị ọza ana jẹẹ pe mi. Avaba ẹnịnị vị ene zwe kà na yị mị. Ohomorihi ọ̀ navọ asị ọ jị ịvị anị yị wa!

¹⁷ Ama Ananyị yị ộ jẹẹ pe mi, dị ọ sị ụkata mị ka ma zụ kà enube ọyịza ẹtẹẹtẹrẹ, dị avaba aza ẹnẹ ẹ̀ yị vị Aniju ẹ̀ zụ wụ́ nị. Ohomorihi ộ dọ mị hụrị irenu idu.

¹⁸ Ananyị yị rẹ vaa dọ mịị hụrẹ ụvọ avaba ịsa odivi, dị ọ sị mị hẹẹ na ngụ ịzị ọ yà aa mẹ ịjọva ẹ́bẹẹba. Ọnị ọ nyị ụbanyị pooro zịna-zịna nị. Aamị.

Ụkụ́ ọdịrẹma

¹⁹ Kụ́ Ipirisira ọnịrị Akwira yị mị ne beri aneehi Onesihworọsị.

²⁰ Ẹrasịtụsị yà Ịkọrịntị, mâ navọ Itirohwimọsị tụ́ Imiretụsị agụvị ka ẹngụ aa zị ọọ.

²¹ Re ka wée jintu vẹ, dị ọgụ ò ve tù. Eyuburusi ọnịrị Ipudeni beri Ịranọsị ne beri Ikirawudiya ka ẹnị kụ́ wụ. Avaba anda ayị ana vọ ka ẹnị rẹ kụ́ wụ.

²² Ananyị yị ọ̀ yà ịnị ayị awụ! Ohomorihi ọ̀ mẹ ọyịza wụ nịnị!