2 Itimoti 3 - IWE ỌNỊNỊ

Ịsị ẹ vaa mẹ ịnị ụmẹ ọdịrẹma

¹ Tamayị ka ẹtẹ vaa katẹngụ ịnị ụmẹ ọdịrẹma,

² agụvị ka aza vị ene kuku vee sì ịrẹyị ẹngụ ẹnịnị kẹnẹ, dị ẹyaa họ́họ̀ha, dị ẹ rẹ yaa mẹ eyi, dị ẹyaa sị ẹngụụ tụ́ ẹba. Dị ẹyaa kụ́ aza ụhụ, dị ẹyaa mẹ akamawụụ hi aza ana ma wa, dị ẹyị kụkụ yẹ ẹyịza, dị ẹyị yẹ Ohomorihi.

³ E yi kuku vee ro ịrẹyịị yị ọza; ẹnịrị aza ẹ̀ẹ zyaazị, e mē vene ze; dị eyee du ọza ịrẹsụ. Dị ẹyị zụ sị ụvọ za ẹngụ ẹnịnị, dị ẹyaa mẹ anka uye ịnị avị avọọ, dị ẹyaa nyị ịhyẹrẹ ịsa ene zoza.

⁴ Dị ẹyaa sị ọzaa chire ọnịvị anị ụvọ, dị ẹyaa mẹ̀ ebira eneē chire ọza angwa, dị eyee wù ịka. Dị a hị́ ka ịsa ẹhẹ ọnọnị kẹnẹ e sì ịrẹyị anị nị, dị e yi sí ịrẹyị Ohomorihi.

⁵ Dị ẹ sị tụra eyi ka ẹnị aa mẹ̀ ebira ọnịnị, ama dị ẹyị zẹẹ ka Ohomorihi ọ̀ sị ụkata yị ẹnị. Asị ẹwụrị ẹngụ aza ẹnẹẹ zị ògù vụrụ-vụrụ!

⁶ Dị aza ẹnyị ẹnịnị sị irikichi na ngụ ini eehi aza, dị e ne vene anyẹnẹẹ ẹnẹ ẹ̀ yị yẹ ịrẹyị, dị ẹ za wa. Ẹngụ anẹẹ ẹnẹẹ vị ọnị ịvị sị ngụ tịtẹ, dị ẹ kụkụ yà ịnị ụvọ avaba ịsa ọnị ọchẹngụ ẹnịnị òo sì kẹnẹ.

⁷ Ẹngụ anẹẹ ẹnẹẹ vị eneē sì ka ẹnị ẹ̀ẹ sị ụtọọ pe ọza pooro, ama a mā nyị ụmẹ ẹnẹ ẹ va zụ sị yẹ ịzẹyịza.

⁸ Ịyẹẹyẹ, Ijanesi ọnịrị Ijambire ệ kụ̀ hịrẹ Imosiisi; avọọ gẹdẹ-gẹdẹ aza ẹnẹnị mẹ̀ẹ̄ kụ̀ụ hịrẹ ịzẹyịza nị. Ayị ẹnịnị eyi kuku zoza; Ohomorihi ọ sị wa yi tịtẹ, agụvị ka ẹyị nyị ịzẹyịza.

⁹ Ama ẹ́ yị nyị ịzị eyee tù, agụvị ka avaba aza vee re ụra ẹnẹ ẹyaa mẹ. Avọọ avaba aza mè re re ụra Ijanesi ọnịrị Ijambire nị.

Iwọjị ọdịrẹma

¹⁰ Ama ẹwa raà saasa avaba ịsị mị sịị̄ zụ̀ aza, ọnịrị ebira ọnị mịị̄ mẹ beri ịsị miī sì ịnị ẹhẹ. Wa rẹ saasa mị ini oze ọnị mị zị sị ayị tụra Ohomorihi, dị mị nyị isuuru, di mee sì ịrẹyị aza, dị mị rẹ sị ẹngụ dọ ụya.

¹¹ Wâ yẹ, a mẹmẹ sị ụya rị mị ọnịrị ịsị mi sị eyi re Antịyọkị ọnịrị Ayịkọnịyọmị beri Ịrịsịtịra. Wâ yẹ ụyọrị ọbanyị ọnị mị sị ẹngụ dọ. Ama Ananyị yị ọ́ọ dọ mị tụ́ hụụnị avaba anị.

¹² Avaba aza ẹnẹ ẹnịrị Ijeesu sị vị ọnya, dị eyee sì ka ẹnị ẹ̀ẹ m ẹ ebira oni Ohomorihi sì, a vaa sị ụyaa rị wa.

¹³ Ama aza edivi ọnịrị enevene nịnị vị oni o vee divi yii hu avọọ hu avọọ. E vee vene ọza, dị e re vene ẹnị.

¹⁴ Ẹwà yị jẹẹ pe ịzẹyịza ana a raà sị zụ̀ wụ, dị ụ rẹ sị ọọ dọ wụ́! Wâ yẹ aza ana sị zụ̀ wụ.

¹⁵ Wa rẹ yẹ ka, ụ mẹ̀ hụrẹ vị ozweyi, ụ hụrẹ yẹ Iwe Ohomorihi nị. Ọ zụ mẹ ka wa yẹ ịrẹyị, ana vaa mẹ ka wa sị ayị tụra Ijeesu Ikirisiti, dị ọ̀ dọ wụ há.

¹⁶ Ohomorihi ọ mẹ ka à chẹrẹ avaba Iwe anị tịtẹ nị. Iwe ọnọọ ọ zụ sị sị ịzẹyịza zụ̀ aza, ọ rẹ zụ tụ́ ọza ohuvọ, ọ zụ vọrọ ọza zị oze, a rẹ zụ sị pe ọza juwe, a mẹmẹ vọrọ ka ọza ọ̀ọ mẹ̀ ebira ana vọrọ.

¹⁷ Ọ vaa mẹ ka ọza Ohomorihi ò zụ tenyi ẹngụ ẹtẹẹtẹrẹ, dị ọ̀ rẹ nyị avaba ịsị a vọrọ ka ọ̀ sịị mẹ avaba ụkọrọ ozoza.