2 Ịsamụwẹrị 22 - IWE ỌNỊNỊ

Ahẹ ọnị Idevidi jị kụ́ Ohomorihi avọ

¹ Ẹnẹyịmavara mẹ̀ maanị sị Idevidi dọ tụ́ hụụnị ụvọ avaba ọnịvị anị ọnịrị hụụnị ụvọ Ịsọọrụ, di Idevidi maanị ahẹ ọnọnị nị

² Ẹnẹyịmavara ee sere mi nị. Ịda anị ọ vị aha ẹvagu ọkatẹngụ ọnị mị na tẹ̀ tụ́ nị.

³ Aha ẹvagu nganganga Ohomorihi amị vị, Ịda anị mị zwe na tẹ̀, ọnị ee sere mi nị. Ụkata anị aa sị dọ mị tụ́ nị, ịda anị ọ vị aha ẹvagu ọnị mị na tẹ̀ tụ́ nị.

⁴ Mê nowu na za Ẹnẹyịmavara kà ọ̀ ba mi owu. Ẹnẹyịmavara a vọrọ ka àa sị ụbanyị yị nị.

⁵ Ọ sị vọ hwẹẹ isu ọ raà sị mị, mị ka isu vị ana sị mị tụ́ irenu ka ọnị aa mụnẹ mị.

⁶ Ọ sị vọ chee ụvọ iswọọza o reè kú mị, mê ro ka ma sị ngụ ịrẹpa iswọọza.

⁷ Ẹngụkata mẹ̀ maanị tù mi mê nowu na za Ẹnẹyịmavara. Mị ka ẹwụ Ohomorihi amị navọ wa ba mị owu oo! Ịnị eehi ịda Ohomorihi ịzọọ ọ yà wụ́ owu amị nị; Ọ́ mẹ̀ wụ́ owu ọnị na, dị ọ va ba mi owu nị.

⁸ Ịjị Ẹnẹyịmavara nyima aa kụ́ ayị ẹtẹ vi ene ee henyi jigi-jigi. Ataba nịnị vi ene hu iruvo dị ẹnịnị ye zizi nị.

⁹ Ộ mẹ ka areyi ọ̀ ká hi ẹhẹ ne beri ịra ana aa rị wụụrụ ịra akịna ọnị ọnị ka hi ẹhẹ dị aa za po kẹnẹ nị.

¹⁰ Ó mèe chii vẹ, ẹbẹẹba vị ọnị ọ maanị yá vẹ ẹtẹ. Eguhi ana yà iruvo ahụ anị vi ene jooji piri-piri.

¹¹ Ộ tụra anggẹẹrị ana aā Ikerubi, dị o hira nị. Ahị ọ sị mẹ avaka ọnị ọnị ya sị zịịzị.

¹² Ịrahụ ọ sị dị ọ sị kú ẹngụ anị nị. Eguhi ẹbẹẹba ọnị ọ hara gụ, ẹnị vị ana sị mẹẹ enyi.

¹³ Ini ẹtohweyi ana yà ọvịdị anị, ịzọọ akịna ịra aa jịnẹ nị.

¹⁴ Ẹnẹyịmavara, ịnị eguhi o nowu hụrẹ vẹ nị. Ọnị ụvọ ọza ò yi mē tụ̀, wáá yẹ ka aza ệ wụ́ ọ ịrẹyị.

¹⁵ Ó mè ne ọpa ọ kụ́ ọnịvị anị gara, ịnyanya mẹ̀ rị dị ẹ và tụ́ echi nị.

¹⁶ Ẹnẹyịmavara ịjị ụ kụ́ ayị, dị ẹwụ kara eyi hi ọnịvị awụ, oku vị ana maanị tịnọ yaara, dị aza ee re iruvo enyi. Ẹtẹ vị ana maanị há nọ ẹhẹ, dị aza ee re iruvo ẹtẹ nị.

¹⁷ Ohomorihi ộ tana ụvọ hụrẹ ẹbẹẹba vẹ, dị ọ za mị dị ọ tụ̀ mị hụụnị isu nị.

¹⁸ Ọnịvị amị ệ nyị ụkata hu mi, mẹ yị zụ za wa, ama Ohomorihi ọ raà dọ mị hụrẹ wa ụvọ.

¹⁹ Ọnịvị amị mè re ka ịrẹyị ô tù mi ịjọnọọ ẹ kwẹẹtẹ tù mi nị. Ama Ẹnẹyịmavara ọ raà dọ mị tụ́ o!

²⁰ Ọ yị navọ ka ịsa odivi ọ̀ mẹ mị. Ọ dọ mị tụ́ agụvị ka ô sì mị.

²¹ Ebira ọnị maa mẹ̀, ộ vọrọ ini eyi Ẹnẹyịmavara. Avọọ ọ́ mẹ̀ raa sị ọgụ anịị mị nộ. Ô re ka mẹ yị nyị ụvọ tụ́ ini ebira odivi. Dị ọ rẹ vavọọ aa sị ọgụ ebira amị mị nộ.

²² Mẹ yị mẹ akamawụ hi Ẹnẹyịmavara, mẹ yị dọ ka ma mẹ̀ ebira odivi hi Ohomorihi.

²³ Ẹ yị nyị ọda Ohomorihi ikonya ọnị mị jịnẹ. Avaba ọda ọnị ọnị mẹ mị sị ụvọ za nị.

²⁴ Ẹnẹyịmavara o re ka mẹ yị mẹ akụvị. Ẹmaa sị ụvọ za ẹngụ amị agụvị asị ẹmị na rị ịvị.

²⁵ Ẹnẹyịmavara ộ sị ọgụ ịzẹyịza amị mị. Agụvị ka ô re e ka mẹ yị me irikichi.

²⁶ Ọza aa mẹ ịzẹyịza, Ohomorihi vaa sị ịzẹyịza pe e mẹ. Ọza ẹnẹ ẹ̀ yị mẹ akụvị ọnị ọ yị vaa sị ebira akụvị kanyị ọ.

²⁷ Ọza ana àa nyị ayị ọnya, dị waa sị ayị ọnyaa pe e mẹ. Ọza aa mẹ irikichi, irikichi ọnọọ ẹwụ ree sii pe e mẹ nị.

²⁸ Aza ana vị oniruwa, ẹwụ ọ vaa dọ wa tụ́ nị. Aza ene ee wo zị, ẹnịnị u vee hu ẹtẹ nị.

²⁹ Ẹnẹyịmavara ẹwa vị ẹtohweyi amị nộ. Ịrahụ ana kara mị ẹwa sị ẹtohweyi va yị mị.

³⁰ Ẹwa sị ụkata yị ẹmị ka ma zụ dụ ọnịvị amị. Ịnị ụkata Ohomorihi eme zụ hira na jịnẹ ọvọ.

³¹ Ẹwụ Ohomorihi, ẹwụ ē mè nyeeyi vụrụ-vụrụ. Ịsa ẹnẹ Ẹnẹyịmavara kà, ẹ yị nyị ireche o! Avaba aza ene zwe na vaka ọnị, avaba ẹnịnị o sere nị, ẹ yị nyị ịsị ẹ zụ kanyị wa.

³² Ẹnẹyịmavara ịnya kẹnẹ ọ vị Ohomorihi nị. A yị nyị ịsa ọsa o!

³³ Ohomorihi ọ vị ụkata amị nị; ọnị ee sere mi ịnị oze tụra oze ọnị maa zị nị.

³⁴ Ộ mẹ ka mā rẹ anka akọnọ, emee zwe echi ịnị ataba, ọ yị zẹẹ ka à nyị ịsị ẹ mẹ̀ mị.

³⁵ Ohomorihi ọ rẹ sị ụkata mị ka ma zụụ kụ̀ ịrẹkụ. Dị ma zụ kụ́ ọkịta ana a sị enyusẹ mẹ.

³⁶ Ẹnẹyịmavara ewee sere mi nộ! Wâ mẹ ka ma nyị ụbanyị agụvị ka wa tẹsị amị.

³⁷ Wẹ yị zẹẹ ka ọnịvị ẹ̀ za mị, wẹ yị rẹ zẹẹ ka ma hyẹdụ.

³⁸ Mâ dụ ọnịvị amị, mẹ yị và ịrẹma ẹnịnị, pooro dị mị za wa ịdị ẹmị vú wa ẹtẹ.

³⁹ M mẹ̀ gụ ịsa chire wa za ẹtẹ, ẹnịnị ẹ yị kụkụ zụ kwẹẹtẹ. Ẹnịnị vị ana hyẹdụ hi ẹtẹ ọvịdị amị.

⁴⁰ Ohomorihi wa sị ụkata mị ka ma zụ kụ́ ịrẹkụ. Dị ụ mẹ ka me huna ọnịvị amị nịnị.

⁴¹ Ẹwa mẹ ka ọnịvị amị, ẹ̀ và ịrẹma tụ́ nị. Aza ana aa kụ́ ayị amị, dị mị gu ịsa chire wa nị.

⁴² Eyee nowu, ama e yi re ọza ba wa owu. Ê nowu na za Ẹnẹyịmavara ama ọnị o yi tụ́ wa ohi.

⁴³ Ẹma pá ịva yị wa, ẹnịnị ẹ sị vara eteesu. Dị maa kụ́ ahụụ hi wa eteesu avọọ nị.

⁴⁴ Ọnịvị amị ệ kwẹẹtẹ tù mị, ama ẹwa sị mị dọ tụ́. Wa raà mẹ ka ma rị ohinọyị tụ́ ịrẹsụ ẹnẹ ẹ̀ yẹ wụ. Aza ẹnị mẹ̀ yị yẹ da, ẹ sị vara ezi ahụ amị.

⁴⁵ Mị ka azọga ẹnịnị ẹ yị nyayịnẹ kụ̀rà eyi re mi. Ịsị ẹ wụ́ ka mâ kà, obobooro ẹnị vaa mẹ̀ ọnị.

⁴⁶ Angwahi mẹ̀ ngụ wa ẹngụ ẹnịnị e si zwe hụrẹ ịzị ẹ na tẹ̀. Ẹnịnị màa vẹ, ẹnịnị vị ana aa dá ẹgahị.

⁴⁷ Ẹnẹyịmavara ọnị vi ana yara pooro, ọnị aa dọ mị tụ́ nị. Â vọrọ ka asị ụbanyị yọ Ohomorihi aa dọ mịị tụ́ nị, Ọnị ọ nyị ụbanyị hu keekere nị.

⁴⁸ Ọnị o sí ọnịvị amị nịnị atọ, dị ọ mẹ ka ma nyị ehuna anẹkụra,

⁴⁹ Ọnị ọ tụ̀ mị hụụnị ụvọ ọnịvị ọnịrị aza ana kwẹẹtẹ tù mi. Ộ dọ mị hụụnị ụvọ enezigi, dị ọ sị mị nyị ẹbẹẹba anị nị.

⁵⁰ Ẹnẹyịmavara agụvị ịsị ụ mẹ aanị, ịnị akakana anẹkụra ana ahịka ẹ yị yẹ wụ, mị vaa jị ahẹ gono wu.

⁵¹ Ọza ọnị ọ sị rị ohinọyị, ọnị ọ vị ẹnẹdọha amị nị. Mị ka ọza ọnị sị nyị, vi o nị o sì ịrẹyị anị pooro. Mị ka Idevidi ọnịrị ezi anị ịrẹma-ịrẹma vị ọnị ọnị sì pooro.