2 Ịsamụwẹrị 19 - IWE ỌNỊNỊ

Ijowabi ộ tụ́ Idevidi ohuvọ

¹ Dị a va kà yi Ijowabi dị a ka, “wáá yẹ ka vi ohinọyị ee sụ ùnè, dị ọ và ẹngụ hi agụvị Abịsarọmị nị.

² Ịrajẹ ọnị yaa jẹ ka yâ nyị ehuna ịhyọọ, ọ kụkụ sị vara ayị odu yị avaba aza, agụvị ka avaba aza ệ wụ́ ka ayị ohinọyị o si du agụvị ịrẹyị ozi anị.”

³ Ịhị ọnọọ dị ahịka vị aza ẹnẹẹ tangwa-tangwa va ngụ ịnị ẹkụra anka isoja ene e tụ́ éyi ịrẹkụ mẹ̀ẹ vakaa zị avọọ nị.

⁴ Dị ohinọyị sị ịsa kú eyi anị dị aa tụ́ orere booro-booro, dị ọ ka, “Abịsarọmị ozi emi oo! Abịsarọmị ozi emi oo! Abịsarọmị ozi emi oo!”

⁵ Di Ijowabi va nọ ini eehi ne tù ohinọyị dị ọ ka, “Ajịnị, wa raà mẹ̀ ụhị nyị ẹmị ana dọ wụ tụ̀ ve tu ajịnị eyi avaba ezi ahụ awụ. Ẹma rẹ dọ ezi ewu anọrụ ọnịrị anẹẹ neberi ese ẹwụ ọnịrị onyeehi awụ tụ́ nị.

⁶ Aza ana aa kụ́ ayị awụ u sì ịrẹyị anị, dị waa kụ́ ayị aza ene sì ịrẹyị awụ nị. Iruvo ọ vị ka wa sị ọ kà ajịnị ka ẹ yị nyị ịsị ọga isoja ọnịrị ezi ahụ awụ vị yị wụ. Wa sị ọ kà ajịnị ka Abịsarọmị ọ̀ọ yà ịzọọ dị avaba ayị sú nị, oni o hine wu hu nị.

⁷ Booro anị re ka wâ kwẹẹtẹ dị wa jịnẹ nọ ẹhẹ, dị wa kà ịrẹyị yị ezi ahụ awụ dị wa sị Ẹnẹyịmavara hị́ eku ka wẹ̀ yị vavọọ mẹ, ẹ yị nyị ọza ana vaa sụụ pè wu ịrahụ ajịnị. Ọsọnị vaa mẹ ka ịrẹyị odivi ene vee tù wu agụvị ịrẹyị ọnọnị ò divi huna avaba ịrẹyị odivi ene vịdị tù wu ụ mẹ̀ hụrẹ vị ozweyi ve tù ajịnị.”

⁸ Ịzẹyịza di ohinọyị kwẹẹtẹ dị ọ na yaayịtẹ ènoze ẹkụra nị. Dị avaba aza aa kà a ka, “wéē re, ohinọyị ọ yaayịtẹ ini oze ẹkụra aanị nọ!” Dị avaba aza vẹ dị ẹ va jẹẹ pè ohinọyị ịzọọ nị.

A ka à na si Idevidi va ve eehi Ịnị ụmẹ ọnị yaa kà aanị, avaba Anisirẹrị ẹ kụ́ tụ́ ikonya-ikonya nọ ini eehi ẹnịnị.

⁹ Dị ẹ ka, “Ohinọyị ọ raà dọ yị hụụnị ụvọ ọnịvị ayị. Ọnị ọ dọ yị tụ́ hụụnị ụvọ Anihwirisiti nịnị nị. Ama ohinọyị o si zwe hụụnị ẹkụra booro aanị agụvị ịrẹyị Abịsarọmị.

¹⁰ Abịsarọmị ọnọọ ọnị nyị ka ọ vị ohinọyị ayị, oni ô wusu ịnị ịrẹkụ. Sị ẹ vẹ dị waa mẹ kẹẹkẹrẹ nịnị dị wẹ̀ yị na sị Idevidi ohinọyị vavẹ nịnị?”

¹¹ Ídevidi ohinọyị mẹ̀ yà ini eehi ịda anị, ọ sị wụ́ avaba Ánisirẹrị mẹ̀ maanị aa kà. Dị ọ va tụ́ na hị́ Ịzadọkị ọnịrị Abiyata nị. Ẹnịnị vị ohirẹsụ irehi Ohomorihi. Di ohinọyị ka ẹ̀ na kà a yị ọdọvịdị Anijuda ka sìi ẹ vẹ dị ahịka ẹnị ẹ vaa vị ọdịrẹma ini aza ana aa naa sị ohinọyịị vaavẹ ini eehi anị nị?

¹² Ẹwụ nịnị vị ẹyịnyara amị. Ọnya-ọnya ẹmịrị ẹwụ nịnị vị nị. Sị ẹ vẹ dị ahịka ẹwụ nịnị ọ vaa vị ọdịrẹma ịnị aza ana ka à và sị ohinọyị vavẹ nị?

¹³ Di ohinọyị ka ẹ̀ rẹ kà a yị Amasa ka ọ̀ yẹ o, ka ọnịrị ọ vị ọnya-ọnya. Ọ kà Amasa ọ vaa dọ Ijowabi ịrẹsụ dị ọ kụkụ vị ọga isoja nị. Ọ kà ọnị ọ̀ yị vavọọ mẹ, asị Ohomorihi zẹẹ ka aanị ò zoza.

¹⁴ Ịrẹyị ọnọnị ộ mẹ̀ ka avaba Anijuda nịnị ẹ̀ nyị aro ọnya. Dị ẹ tụ́ na kà a yi ohinọyị ka ọnị beri avaba ezi ahụ anị ẹ̀ vavẹ eehi nị.

¹⁵ Ịzẹyịza di ohinọyị si hu aa vaa vẹ nị. Ọ va sị ngụ Okuha Ịjọdanị, dị Anijuda na gẹrị ọ Igirigari, dị ẹ sị ọ va tụ́ va jịnẹ Okuha Ịjọdanị nị.

¹⁶ Isimeyi ozi Igera ana hụrị Ibahurimi vẹ vị Anịbẹnjamịnị. Ọnịrị anọrụ Anijuda e dudu zwe chi na, dị ẹ na gẹrị Idevidi ana vị ohinọyị nị.

¹⁷ Aza ẹnị akahị hụụnị ovwoovu Ịbẹnjamịnị ne beri Iziba ozi ini eehi Ịsọọrụ ệ saasa a. Iziba ộ kụ́ ezi anọrụ anị ẹwụrẹhị ne beri ezi ahụ anị oohu za. Dị ẹnịnị dọ ọvịdị ohinọyị na ngụ Ijodani nị.

¹⁸ Ẹnị ana saasa ohinọyị ệ jịnẹ Okuha Ịjọdanị, ka ẹnị ẹ̀ na para irehi ohinọyị hu, dị ẹ̀ rẹ mẹ avaba ịsa oni ohinọyị òo sì. Óhinọyị màa jịnẹ Ijodani, di Isimeyi ozi Igera và kú ẹtẹ ọvịdị anị dị ọ ka ẹ yị ohinọyị

Idevidi ộ vayị Isimeyi

¹⁹ dị ọ ka, “Taarụ, navọ asị ụ ro ịrẹyị ebira odivi ọnị mị mẹ, asị ụ kà a ka waa tamayị ebira odivi ọnị mị mẹ̀ ịhị ọnị wụ jịnẹ hụrẹ Ijerusarẹmị avọọ. Taarụ, navọ asị ụ sị ịrẹyị ọnọnị tụ́ ịnị ayị awụ.

²⁰ Taarụ, aarịhịnị ka mâ yẹ ka ebira odivi mị mẹ hi wu nị. Agụvị avọọ ahịka ẹma dọ ọvịdị anị ovwoovu Ijosẹẹhụ ajịnị, dị mị chị vẹ ka ma va gẹrị ẹwụ nị.”

²¹ Di Abisayi ozi Izeruya tụ́ ohi dị ọ ka, “Isimeyi vị ana vọrọ ka ò sú agụvị ka ọ raà si eyi oweyi re ọza ẹnị Ẹnẹyịmavara nyị ka ọ̀ vị ohinọyị.”

²² Ama di Idevidi kà, “Yere ana jị gẹ ẹmịrị ẹwụ nịnị aanị, ẹwụ ezi Izeruya? Sị ẹ vẹ di wee sì ka wa kụ́ ịrẹyị tù mi ajịnị? Ẹma vị ohinọyị Isirẹrị nị, ẹ yị nyị ọza ana a vaa wụ̀ ajịnị ịnị ẹtẹ Isirẹrị.”

²³ Di Idevidi kà a yi Isimeyi dị ọ ka ọza ọ yị vaa wụ̀ ọ. Dị ọ hị́ eku yọ nị.

²⁴ Imehwibọsẹtị ozi Ịsọọrụ oni o re chi na ka ọnị ọ̀ na gẹrị ohinọyị. Ọ yị nyịna ahụ anị, ọ yị kụ́ ọkara irenu anị, ọ yị rẹ nyịna awuru anị hụrẹ ịhị oni ohinọyị sị jịnẹ hụụnị hụrẹ Ijerusarẹmị pooro ne tù ẹkụhị ọnị ọ sị vavẹ ịnị ẹngwọọrọ.

²⁵ Imepi-Iboseti mẹ̀ va ngụ Ijerusarẹmị ka ọnị ọ̀ va gẹrị ohinọyị, dị ohinọyị kà a yọ dị ọ ka, “Sị ẹ vẹ dị wẹ̀ yị saasa mị na, Imehwibọsẹtị?”

²⁶ Di Imehwibọsẹtị ka, “Taarụ Ohinọyị! Wáá yẹ ka oswahụ mị vị nị. Mâ kà a ka è tenyi ịkẹrịkẹtẹ amịị mị dị ma tụra a dị me si ve tù wụ, ama di e vene mi nị.

²⁷ Taarụ, ệ vẹ di e ve du mi zụ̀ wụ nị. Nda taarụ vị ụ yà anka anggẹẹrị Ohomorihi avọọ nị. Ịsị èe zee wu eyi kẹnẹ ụ mẹ̀ ẹ.

²⁸ Taarụ Ohinọyị, vị a vọrọ ka wa wụ̀ avaba aneehi ada amị nị. Ama wa va raà sị mị ka ma hyakụ vaa rị ịsa ini itevuru awụ. Taarụ, ẹ yị nyị ịsị mi kụkụ zụ họ̀ use huna ọsọnị hụụnị ụvọ awụ.”

²⁹ Di ohinọyị tụ́ ọ ohi dị ọ ka, “Ịrẹyị ọnị ọ kà aanị ô zee.” Ọ kà ọnị ọ sị ọ kà ka Imehwibọsẹtị ọnịrị Iziba e dudu vaa gẹ ẹtẹ Ịsọọrụ nị.

³⁰ Di Imehwibọsẹtị kà a yị ohinọyị dị ọ ka, “Naavọ Iziba ọ̀ sị avaba ẹtẹ ọnọọ. Taarụ ụ mẹ̀ va sị ngụ eehi ịnị ẹngwọọrọ aanị ọnọọ ộ hu yị mị nị.”

Ịsa ọyịza oni Idevidi mẹ yị Ibarizirayi

³¹ Â nyị ọza ịnya aanị ana aā hị́ Ibarizirayi hụrẹ ẹkụra Irogerimi ịnị ẹtẹ Anigiriyadi. Ộ saasa Idevidi ohinọyị na ngụ Okuha Ịjọdanị, dị ọ sị ọ na tụ́ na jịnẹ ẹ nị.

³² Ibarizirayi ọnọọ ọ sị vịra ẹtẹẹtẹrẹ, ọ sị gụ́ ịrayị ẹbẹẹna. Óhinọyị mẹ̀ yà Imahanayimi ọ́ màa vaa vẹ, Ibarizirayi ộ tọ̀ọ́ ịsa naa yọ Ibarizirayi ộ nyị rị ụvọ ẹtẹẹtẹrẹ.

³³ Di ohinọyị kà a yị Ibarizirayi dị ọ ka, “Saasa mị dị ya nọ Ijerusarẹmị, ka mị vaa tẹsị awụ ịzọọ.”

³⁴ Di Ibarizirayi tụ́ ohi dị ọ ka, “Taarụ, ụ́mẹ yà mị kụkụ aa mẹ ịnị ẹhẹ dị ụ ka ma saasa wụ nọ Ijerusarẹmị.

³⁵ Ma sị gụ ịrayị ẹbẹẹna booro aanị. Mẹ yị kụkụ yẹ uhine ẹhẹ Mẹ yị kụkụ yẹ uhine ịsọyịrị ọnịrị eche. Mẹ yị rẹ kụkụ wụ́ ahẹ ana jị. Taarụ, me yi ro ka â vọrọ ka ma na vị ẹnya tụra wụ.

³⁶ Jẹẹ ma sị wụ na tụ́ chee na jịnẹ Okuha Ịjọdanị, ka mẹ yị yà ọ́za ana a vọrọ ka wa maanị nyị íyí.

³⁷ Aarịhịnị jẹẹ ma varẹma nọ eehi, di me ne sú pè ikuta ada amị ọnịrị ọnyị amị. Taarụ, Ikimihami ozi ịda awụ yị. Navọ ọnị ọ̀ saasa awụ. Ịsị èe zee wu eyi dị wụ mẹ̀ ẹ yọ.”

³⁸ Di ohinọyị ka, “Ẹ̀hẹẹ, Ikimihami ọ̀ saasa amị na. Ịsị èe zee wu eyi mị vaa mẹ̀ ẹ yọ. Ịsị ewu è re sì, mị vaa mẹ̀ ẹ wụ.”

³⁹ Avaba aza ẹnẹẹ ẹ sị jịnẹ Okuha Ịjọdanị. Ohinọyị ọnị ọ rẹ sị jịnẹ. Di ohinọyị za Ibarizirayi di o kú o irenu, dị ọ mẹ̀ aduwa yọ, di Ibarizirayi sị varẹma aa nọ eehi anị nị.

⁴⁰ Ohinọyị ọ sị jịnẹ na ngụ Igirigari, di Ikimihami saasa a nị. Avaba Anijuda ne beri achẹva Anisirẹrị ệ sị ohinọyị na tụ́ na jịnẹ Okuha Ịjọdanị.

⁴¹ Dị avaba Anisirẹrị vene ve tù ohinọyị dị ẹ ka, “Taarụ, sị ẹ vẹ dị ẹyịnyara ayị Anijuda wère vẹ dị ẹ va sị wụ beri aneehi awụ ọnịrị aza awụ na tụ́ na jịnẹ Okuha Ịjọdanị?”

⁴² Di avaba Anijuda tụ́ Anisirẹrị ohi dị ẹ ka, “Wâ yẹ ka ẹyịrị ohinọyị vị ọnya. Sị ẹ vẹ dị waa sị ịrẹyị ọnọnịị kụ́ ayị nịnị? Ịsa ọnị ị rị ayị vị ohinọyị o si ụta anị.”

⁴³ Di Anisirẹrị tụ́ Anijuda ohi dị ẹ ka, “Ya zụ kà a tù oze ẹẹwụ ẹnị ẹyịrị Idevidi ohinọyị zị gụrị ẹngụ huna wụ nịnị. Sị ẹ vẹ dị wụ maanị sị eyi wụ yị nịnị? Wáá yẹ ka ẹyị a va na vịdị kà a ka à na sị ohinọyị vavẹ eehi nị?” Dị ahịka Anijuda nịnị ẹ yaa kà geri-geri huna Anisirẹrị nịnị nị.