2 Ịsamụwẹrị 17 - IWE ỌNỊNỊ

Ihusayi ộ sị Abịsarọmị nyee eyi

¹ Ộ dà kù chee, di Ahitohwẹrị va hí Abịsarọmị dị ọ ka taarụ, vị ọnị ka ọ̀ tọ̀ọ́ aza ẹnị akawụ-akawụ oze ẹwụrẹva, dị ẹnị ẹ̀ kwẹẹtẹ ịrahụ ajịnị dị ẹnị ẹ̀ na dụ Idevidi nọ.

² Ọ kà ịjị ọ̀ọ sị ngụ Idevidi ẹngụ dị ọnị kwẹẹtẹ tù ọ, dị ọnị kụ́ angwahi ngụ ọ ẹngụ. Ọ kà ọnị ọ̀ọ vavọọ raà kụ́ angwahi ngụ ọ ẹngụ, dị aza ana yà pè e kú zwe, dị ahịka Idevidi ohinọyị kẹnẹ ọnị wụ nị. Ọ kà ọnị ọ̀ọ vavọọ sị Idevidi wụ, dị ọnị kụkụ kụ́ aza Idevidi va yị Abịsarọmị.

³ Di Ahitohwẹrị rẹ ka, ọza oni wee sì òo wusu, avaba ẹnị ana vọ vaa vàa ka wụụ vẹ anka u mè sì. Ẹ yị nyị ịsị ẹ vaa mẹ ẹnị ana vọ.

⁴ Ịrẹyị ọnọnị ộ vọrọ ini eyi Abịsarọmị ọnịrị ini eyi avaba ọdọvịdị Anisirẹrị.

⁵ Di Abịsarọmị ka aarịhịnị à hị́ ọnọrụ ana aā hị́ Ihusayi yị ọnị dị ẹnị ẹ̀ wụ́ ịsị ọnị ọ̀ọ rẹ kà nị.

⁶ Ịzẹyịza dị a na hị́ Ihusayi di o ve tù Abịsarọmị nị. Di Abịsarọmị ka, “Aanị, aanị Ahitohwẹrị mẹ̀ kà nọ, sị ẹwụ ro tụ́ ọ? Yáá mẹ̀ ịsa ọnị ọ kà aanị, à vị asị mẹ̀ ẹ? Ụ mẹ̀ kà?”

⁷ Di Ihusayi tụ́ Abịsarọmị ohi dị ọ ka, “Wáá yẹ ka iwọjị ana Ahitohwẹrị jị aanị ọ yị mẹ.”

⁸ Dị ọ rẹ ka Ẹwụ ụvọta ộ yẹ ada awụ ọnịrị aza ana yà pè e. Wâ yẹ ka isoja obooro ẹ vị nị. Ê divi anka ọdụmị ana a wụ̀ ezi. Wa rẹ yẹ ka o si kù ana ada awụ hụrẹ aa kụ̀ ịrẹkụ. Ọnịrị isoja anị ẹ yị vaa sụ aha ọnya ịrahụ.

⁹ Ộ hyakụ na sị tẹ aha ọnya, à vị ịnị ụtẹha ọnya aanị. Àa vị ọnị ọ vịdị kụ́ ịrẹkụ ve tù isoja awụ nị, aza ana àa wụ́ vị ana vaa kà a ka a kụ́ isoja Abịsarọmị wụ.

¹⁰ Ọ̀ọ vavọọ yà isoja ana ayị vị hu keekere anka idu vị ana angwahi vaa ngụ ẹngụ. Avaba Anisirẹrị ệ yẹ ka ada awụ ọ zụ kụ̀ ịrẹkụ. Ẹ rẹ yẹ ka isoja ana yà pè e vị ana ayị ẹnịnị nyayịnẹ vị.

¹¹ Di Ihusayi rẹ ka ịsa ọnị ro ka ộ mẹ̀ hu ọ vị ka ọ̀ kụ́ avaba Anisirẹrị gụ hụrẹ Ịdaanị na ngụ Ịbẹẹsẹba. Ọ kà ẹ̀ rụrụ ẹtẹẹtẹrẹ anka ààrẹ ụtọ ókụ̄. Ọ kà di Abịsarọmị ọnị ụvọta ọ kụ́ wa dị ẹ̀ẹ nọ ịrẹkụ.

¹² Ọ kà ịzị ẹnị ẹ̀ẹ yà re aza Idevidi, dị ẹnị kụ́ chire wa, dị ẹnị sụ và kú wa anka eguhi mèe chiree kú eteesu avọọ. Ọ rẹ ka Idevidi ọnị ụvọta, àa vị isoja anị ọnyọọnyị ẹ yị vaa há.

¹³ Ọ kà àa vi Idevidi zwe na ngụ ịnị ẹkụra nị, dị aza kụ́ obo vẹ dị ẹnị si tụra a hụụnị ataba na ngụ ini ozi. Dị ẹnị chaka ẹkụra ọnọọ nẹrẹ-nẹrẹ.

¹⁴ Ịjị Abịsarọmị ọnịrị avaba Anisirẹrị maanị wụ́, dị ẹ ka iwọjị Ihusayi ana vị Anaakị ọ gẹ hụụnị iwọjị Ahitohwẹrị nị. Ẹnẹyịmavara ọ vavọọ mẹ ka asị a dọ iwọjị Ahitohwẹrị ene zoza aanị, agụvị ka ee sì ka ịrẹyị odivi ò tù Abịsarọmị.

Ijonatani ọnịrị Ahimaazị ệ kà enube yị Idevidi

¹⁵ Di Ihusayi ộ kà yị Ịzadọkị ọnịrị Abiyata ana vị ohirẹsụ irehi Ohomorihi ajuwe ọnị Ahitohwẹrị pè Abịsarọmị ọnịrị ọdọvịdị Anisirẹrị juwe ni. Ama iwe ọnị ẹmị rẹ pè wa jị yị.

¹⁶ Wụsẹ jintu tụ́ na kà a yi Idevidi ka asị ọ sụ ịzị aā jịnẹ okuha ịnị ụnọmị avọọ oo! Kà a ọ wụsẹ kwẹẹtẹ dị ọ̀ọ nọ akẹnẹ kà à yị vị avọọ vị aa wụ ọnịrị aza anị nị oo!

¹⁷ Ijonatani ọnịrị Ahimaazị ẹnị vi ene hi ịzị aā hị́ Enirogeri. Dị a ka à tụ́ ozi ahụ ọnya ana vị ọnẹẹ hi wa, dị ẹnị ẹ̀ na kà a yị Idevidi ana vị ohinọyị nị. Ijonatani ọnịrị Ahimaazị ẹ yị nyayịnẹ nọ ịnị ẹkụra ka e ve re ẹnị.

¹⁸ Â nyị ozi ọnọrụ ọnya aanị ene re wa, dị ọ na kà a yị Abịsarọmị nị. Di Ijonatani ọnịrị Ahimaazị wụsẹ hụụ ịzọọ, dị ẹ nọ ini eehi ọnọrụ ọnya aanị ịzị aā hị́ Ibahurimi nị. Ọnọrụ ọnọọ ộ nyị ịkangga ọnya tụ́ ini ohweje anị, di Ijonatani nịnị ngụ ọ nị.

¹⁹ Di ose ọnọrụ ọnọọ sị ịsa dị ọ gana a kú ikangga ọnọọ irenu nị. Dị ọ sị akụ dị ọ gara tụ́ ịrẹsụ ịsị o si kú ịkangga ọnọọ nị. Ẹ yị nyị ọza ana yẹ ka ộ vavọọ mẹ.

²⁰ Ịjị aza Abịsarọmị ve tù ọnẹẹ ọnọọ ịnị eehi dị ẹ ka ịzị ahimaazị ọnịrị Ijonatani yà? Dị ọnẹẹ ọnọọ ka ẹ sị jịnẹ okuha nọ akẹnẹ. Di aza ẹnẹẹ ee sì wa nị, ama ẹ yị nyị ọza ene e re. É è yi mè re wa, dị ẹ varẹma aa nọ Ijerusarẹmị nị.

²¹ Ịjị aza Abịsarọmị si hu, di Ijonatani ọnịrị Ahimaazị jịnẹ hụụnị ịkangga nị. Ẹ mẹ̀ sị jịnẹ, dị ẹ na kà a yi Idevidi dị ẹ ka ọ wụsẹ kwẹẹtẹ dị ọ̀ọ nọ akẹnẹ okuha. Ẹ ka Ahitohwẹrị o reè juwe ụvọ mẹmẹ vee ku Idevidi.

²² Ịzẹyịza di Idevidi ọnịrị aza anị kwẹẹtẹ, dị ẹ jịnẹ nọ akẹnẹ Okuha Ịjọdanị nị. Ịjị eyi naa nị, avaba ẹnịnị ẹ sị jịnẹ na ngụ akẹnẹ Ijodani.

Ahitohwẹrị ộ wụ̀ ẹngụ anị

²³ Ịjị Ahitohwẹrị re ka ọza ọ yị dọ ịrẹyị anị mẹ̀ ụkọrọ, di o tenyi umaata anị, dị ọ tụra a, di o si huu aa nọ eehi anị ẹkụra anị nị. Ịjị o tù eehi, di o tenyi irehi anị, di o ne zụ̀ obo yị ẹngụ anị nị. Ó mè wusu di e ne e tụ́ ini ikuta ada anị nị.

Abịsarọmị ộ sị Amasa mẹ ọga isoja

²⁴ Idevidi ọ na ngụ ịzị aā hị́ Imahanayimi, di Abịsarọmị ọnịrị avaba Anisirẹrị ana saasa a ẹnị sị jịnẹ na ngụ akẹnẹ Ijodani nị.

²⁵ Di Abịsarọmị sị Amasa mẹ ọga isoja, dị ahịka ọnị ọ dọ Ijowabi ịrẹsụ nị. Amasa ọnị vị ozi ọnọrụ ana aā hị́ Ijeteri. Anisirẹrị Ijeteri vị nị, dị ahịka ọnị ọ nyị ọnẹẹ ana aā hị́ Abigẹrị nị. Abigẹrị ọnị vị ozi ọnọrụ ana aā hị́ Inahasi. Izeruya ana vị ọnyị Ijowabi ọnịrị Abigẹrị vị ẹyịnyara.

²⁶ Anisirẹrị ọnịrị Abịsarọmị vị ana kụ́ udi tụ̀ ịnị ẹtẹ Anigiriyadi.

 kụ́ ẹnya va yị Idevidi

²⁷ Ịhị Idevidi na sị ngụ Imahanayimi, â nyị aza ana kụ́ ịsa va yọ. Ẹnị ẹnẹẹ ẹ vị Isobi ozi Inahasi ana hụrẹ Ịraba ịnị ẹtẹ Amọnị vẹ, ọnịrị Imakiri ozi Amịyẹrị ana hụrẹ Iro-Idebari vẹ, ne beri Ibariziri Anigiriyadi ana hụrẹ Inogerimi vẹ.

²⁸ Ịsị ẹ kụ́ va yi Idevidi vị ịta ịbẹẹdị, ịchacha ọnịrị ụnọkọ. Ẹ rẹ kụ́ ịsọyịrị ana aā hị́ ihwiti ọnịrị ibaari ne beri ayị ọnịrị apaapa ana a wara ne beri ẹza irenyi-irenyi va yọ.

²⁹ Dị ẹ rẹ kụ́ ẹhụ ọnịrị inono ne beri atẹmẹ ọnịrị ịrẹva ụnọ ana za va yi Idevidi ọnịrị aza anị ka ẹ̀ rị ọ nị. Aza ẹnẹẹ ê ro ka ụngwẹ aa kụ̀ aza Idevidi, di enyi raà kụ̀ wa, dị ọ kụ́ ngụ wa ẹngụ hi ịnị ụnọmị.