2 Ịsamụwẹrị 16 - IWE ỌNỊNỊ

Iziba ộ sị ịsọyịrị yị Idevidi

¹ Idevidi ộ maanị sị para ịrẹsụ ataba ọnọọ hu na chee, di o ne tù ka Iziba ozi ahụ Imehwibọsẹtị jẹẹ ee zị ọnị nị. Iziba ộ nyị ịkẹrịkẹtẹ ẹnyị aanị ọnị ọ sị ịsa za vabẹ, dị ọ kụ́ ụbụrẹẹdị ịrẹka tụra wa nị. Ọ rẹ kụ́ apapa ịrẹgụ ẹchẹhị ne beri akara ana a sị ẹtụtụ ihwigi ohuru-ohuru jị ọnịrị eche okoko ịtụmpaha ọnya tụ́ ọ.

² Di Idevidi ohinọyị va họ̀ Iziba ka sị aa kụ́ ịsa ẹnẹẹ mẹ nị. Di Iziba ka aneehi ohinọyị ọnị ka ẹ̀ kụ́ ịkẹrịkẹtẹ ẹnẹẹ dị ẹ̀ẹ tụra wa nị. Dị ọ rẹ ka ụbụrẹẹdị ọnịrị akara ana a sị ẹtụtụ ihwigi jị avọọ vị ọnị ọnị ka isoja Idevidi ẹ̀ rị, dị aza ene hi ịnị ụnọmị ọnị ọ kụ́ ngụ ẹngụ è tụ́ eche ọnọọ.

³ Di ohinọyị rẹ ka, “Ịzị Imehwibọsẹtị aazị Ịsọọrụ ana vị ọga awụ yà? Di Iziba ka, ọ yà Ijerusarẹmị. Ô ro o ka ajịnị Anisirẹrị vaa kà a ka ọnị ọ̀ rị ohinọyị ana ada anị ọbanyị vịdị rị nị.”

⁴ Di ohinọyị tù Iziba ohi dị ọ kà, “Avaba ịsị Imehwibọsẹtị nyị kụkụ vị awụ.” Di Iziba ka, “Taarụ, ọ máá navọ wa maanị yịị nyị mi iyi.”

Isimeyi ộ kụ̀ Idevidi ụhụ

⁵ Ẹkụhị ọnya Idevidi ohinọyị aa va naa ngụ ẹkụra ana aā hí Ibahurimi, dị a nyị ọnọrụ ọnya ịzọọ ana jịnẹ vẹ nị. Ịpa ịrẹsụ Ịsọọrụ ọnọrụ ọnọọ vị nị. Ịrẹha anị ọ rị Isimeyi nị. Ozi ọza ana aā hị́ Igera ọ vị nị. Ọ́ mẹ̀ jịnẹ aa vẹ, dị aa kụ̀ Idevidi ụhụ nị.

⁶ Dị ọ kụ́ ịrẹta dị ee ne e hi Idevidi ọnịrị avaba ezi ahụ anị nị. Avaba isoja ohinọyị ọnịrị aza ana a nyị ene ee sere e vi ene hi eyi ụvọrị ọnịrị eyi ụvọha anị.

⁷ Di Isimeyi aa kụ́ ohinọyị ụhụ dị ọ kà, “Wa nee, wa nee, ọwọza, ọza odivi.

⁸ Wa raà dọ Ịsọọrụ ohinọyị, dị wụ̀ avaba aza anị vaka nị. Ọnị Ẹnẹyịmavara aa sii họ̀ wụ aanị nị. Ẹnẹyịmavara ọ raà dọ wụ ịjọva ọnọọ yị Abịsarọmị ozi ewu. Ịrẹyị odivi ô tù wu ịrẹsụ agụvị ka ọwọza ụ vị nị.”

⁹ Di Abisayi ozi Izeruya hị́ ohinọyị dị ọ ka, “Taarụ, sị ẹ vẹ dị ẹnẹsa ana sị mẹẹ anka oku irezi aanị aa kụ́ wụ ụhụ? Navọ ma na dà ẹnẹsa ịrẹsụ ne ta.”

¹⁰ Di ohinọyị ka, “Ẹwụ nịnị ezi Izeruya, ẹ yị nyị ụvọ amị rị ịnị ọnọọ o. Àa vị Ẹnẹyịmavara ọ kà a ka ọ̀ọ kụ̀ mị ụhụ dị aa kụ̀ mị ụhụ nị, ẹnị ẹ họ̀ ọ ka sị ẹ vẹ?”

¹¹ Di Idevidi va hị́ Abisayi ọnịrị avaba ezi ahụ anị dị ọ ka, “Ozi ọnị mị ma hụụnị ẹngụ amị oni ee sì ka ọnị ọ̀ wụ mi aanị nị. Ana Anịbẹnjamịnị ọnọrụ ọnị va mẹ aa óó divi hu nị? Naavọ nịnị ọ̀ọ kụ̀ mị ụhụ. Ẹnẹyịmavara ọ kà a ka ọ̀ọ kụ̀ mị ụhụ nị.

¹² Ẹyịyara Ẹnẹyịmavara òo re ụya ọnị maa rị aanị, ọ vaa sị ịsa ozoza sị mị atọ ụhụ ana aa kụ̀ mị aanị.”

¹³ Idevidi ọnịrị aza anị ệ và tụra oze aa na, di Isimeyi ọnị zị oze ini ataba ana và eyi kà ohinọyị, dị aa kụ̀ ohinọyịị ụhụụ na di ee ne ịrẹta ọnịrị adavụ hí ọ nị.

¹⁴ Ohinọyị ọnịrị aza anị e si tù ịzị ẹ yaa nọ. Ọ kụ̀ ngụ wa ẹngụ, di e hi ịzọọ dị ẹ tụ́ ụhwọ nị.

Ihusayi ộ gẹrị Abịsarọmị

¹⁵ Abịsarọmị ọnịrị avaba Anisirẹrị ẹ va sị ngụ Ijerusarẹmị. Ahitohwẹrị yà ịzọọ pè wa.

¹⁶ Di Ihusayi ana vị ọta Idevidi ne tù Abịsarọmị dị ọ ka, “Taarụ, ohinọyị, orubo ọcha, orubo ẹya o!”

¹⁷ Di Abịsarọmị tụ́ ohi dị ọ ka, “Vị ẹwụ wéé si sì ịrẹyị ọta awụ aanị nị? Sị ẹ vẹ dị wẹ̀ yị maa dụ ọta awụụ na?”

¹⁸ Di Ihusayi tụ́ ohi dị ọ ka ẹ yị vị avọọ ọ mẹ̀ vị. Ọ kà ọza ẹnị Ẹnẹyịmavara ọ̀ọ nyị, dị aza ẹnẹnị ẹnịrị avaba Anisirẹrị rẹ dọ nị, ọza ọnọọ ọnị rẹ dọ yị dị ọnị rẹ jẹẹ pè e nị.

¹⁹ Di Ihusayi rẹ ka à hyakụ kụ́ ẹnẹẹ kwooze, ẹnị ọnị vaa yà ahụ anị ọsa? Ọ kà ọza ọnị ọnị hẹkẹ ada anị, ẹ yị vi ozi ọza ọnọọ a vọrọ ka ọnị ọ rẹẹ hẹkẹ ẹ? Dị ọ rẹ ka ọnị vaa hẹkẹ Abịsarọmị nị.

Iwọjị Ahitohwẹrị

²⁰ Di Abịsarọmị họ̀ Ahitohwẹrị ka ịsị a vọrọ ka ọnị ọ kụkụ mẹ?

²¹ Di Ahitohwẹrị ka onyeehi Idevidi ada anị ọnị ọ navọ hi ẹtẹ ka ẹ̀ si eyi pè irehi anị avọọ, ọ ka Abịsarọmị ò ne pè wa sú. Ọ kà ọnọọ vaa mẹ ka avaba Anisirẹrị ẹ̀ wụ́ ka vị ọ kụkụ aa nyị ada anị ịhyẹrẹ nị. Ọ kà ịjọnọọ avaba aza vị ana kụkụ vaa sị ọtụụ kà a ịrẹma.

²² Ịzẹyịza dị ẹ hịrẹ nọ ịrẹsụ itu, dị ẹ jị ajẹngụ tụ́ ịzọọ nị. Di Abịsarọmị nọ ịzọọ dị ọ na kụ́ ada anị, dị ọnịrị wa aa sụ éyi avaba Anisirẹrị nị.

²³ Ịnị ụmẹ ọnọọ, Ahitohwẹrị òo pè ọza jị iwe, vị ọ sị mẹẹ ka Ohomorihi o pè ọza kà ịrẹyị nị. Avọọ Idevidi ọnịrị Abịsarọmị mè re iwọjị Ahitohwẹrị nị.