2 Ịsamụwẹrị 13 - IWE ỌNỊNỊ

Ịrẹyị Amịnọnị ọnịrị Ịtama

¹ Ụmẹ ọnya yà ịzọọ â nyị ozi Idevidi ọnọrụ ọnya aanị ana aā hị́ Abịsarọmị. Abịsarọmị ọnọọ ộ nyị ọyịnyara ọnya ana vị ọnẹẹ. Ịrẹha anị ọ rị Ịtama nị. Ô zoza ẹtẹẹtẹrẹ. O si kù ọnị ịrẹyị Idevidi ọnịrị Ịbatịsẹba mẹ dị ịrẹyị ọnị maa vaa kà aanị mẹ. A rẹ nyị ozi Idevidi ọsa ana aā hị́ Amịnọnị. Amịnọnị vị adẹnyara Ịtama, dị ọ nyayịnẹ sì ịrẹyị Ịtama nị.

² Amịnọnị ô sì oze pooro ka à nyị ịsị ọnịrị Ịtama mẹ, ama o yi re oze. Amịnọnị ô ro ịrẹyị Ịtama pooro ọ sị vara ẹngụ aa zị ọ. Ịtama vi ozwoorihi, dị ahịka adẹnyara Amịnọnị ọ rẹ vị nị.

³ Amịnọnị ộ nyị ọta ọnya ana aā hị́ Ijonadabị. Ozi ọnọrụ ana aā hị́ Isama ana vị ọyịnyara Idevidi Ijonadabị vị nị. Ijonadabị vị ọnọbọ ọbanyị ọnya.

⁴ Ẹkụhị ọnya di Ijonadabị va họ̀ Amịnọnị dị ọ ka, “sị ẹ vẹ dị ụ maanị aa và ẹngụụ hi eyinị-eyinị, ẹwụ ana vi ozi ohinọyị? Wẹ rẹ kà a mịị.” Di Amịnọnị va kà a yọ dị ọ ka, “Ịtama ọyịnyara Abịsarọmị ana vị adẹnyara amị m maanị ee ro ịrẹyị anị nị. Mê sì ịrẹyị ozi ọnọọ ẹtẹẹtẹrẹ.”

⁵ Di Ijonadabị va kà a yọ dị ọ ka, “Ma apẹ ka ẹngụ aa zị wụ, dị ụ wà na hụtụ aha ọyịsụ. Ịjị ada awụ òo ve heeyi wụ, kà a yọ ka ọ̀ navọ dị Ịtama adẹnyara awụ ọ̀ va mẹ̀ ịsa yị wụ. Wee si ka ọ mẹ̀ ịsa ọnọọ eyi awụ ịzẹnị, dị ọ yọ ọ yị wụ.”

⁶ Ịzẹyịza dị Amịnọnị na hụtụ dị ọ mẹ apẹ ka ẹngụ aa zị ọnị nị. Idevidi ohinọyị mẹ̀ vẹ ve heeyi yi, dị Amịnọnị kà a yọ ka ọ̀ navọ Ịtama ọ va jị akara chee yị ọnị éyi anị, dị ọọ da a tụ ọnị irenu.

⁷ Ịzẹyịza di Idevidi tụ́ Ịtama ozi anị ka ọ̀ nọ ini eehi ịda Amịnọnị adẹnyara anị dị ọ̀ na mẹ̀ ịsa yọ nị.

⁸ Di Ịtama si hu aa nọ ini eehi Amịnọnị adẹnyara anị nị, di o ne tù ka ọ hụtụ nị. Dị ọ ka ayị, di o po o, dị ọ yà eyi anị dị ọ sị jị akara nị.

⁹ Dị ọ sị ọ tụ́ ịnị ịchacha, dị ọ sị yị Amịnọnị nị. Ama ô yi, ọ yị zẹẹ ka ọnị ọ̀ rị. Di Amịnọnị ka avaba aza ene hi ini eehi pè ọnị ẹ̀ jịnẹ tụ́ ẹhẹ nị. Ịzẹyịza di avaba aza ene hi ịzọọ jịnẹ tụ́ ẹhẹ kwooze yọ nị.

¹⁰ Di Amịnọnị va hị́ Ịtama dị ọ ka ọ̀ sị ịsọyịrị ọnọọ ngụ ịnị aku va yị ọnị, dị ọnị ọ̀ dọ ọ ịzọọ dị ọnị ọ̀ rị ọ. Ịzẹyịza di Ịtama sị ịsa ọnị ọ mẹ dị ọ sị nọ ịnị aku ka ọnị ọ̀ sị naa yọ nị.

¹¹ Ọ́ mẹ̀ vavọọ sị ọ aa naa yọ ka ọ̀ rị ọ, dị ụvọ Amịnọnị ngụ ọ, dị ọ ka, “Ọhụva amị, vẹ vị ẹmịrị ẹwụ ọ̀ sụ.”

¹² Di Ịtama ka, “Navọ de, ẹnẹbẹnị amị, asị ụ sị ụkata za mị. Wáá yẹ ka enyisi ọ vị nị, ọza ọ mā maanị mẹ ịnị ẹtẹ Anisirẹrị. Aarịhịnị navọ asị ụ mẹ̀ ẹngụ ebira odivi ọnọnị.

¹³ Wàa vavọọ mẹ̀ mị, m máá mẹ̀ ụhị ọnọọ? Dị a rẹ kuku ee re ẹwụ anka ọnya ịnị aza edivi ene hi Isirẹrị. Wẹ rẹ na kà a yị ohinọyị ka ọ yị vaa kà a ka ọnị ọ yị sị mị gà wụ.”

¹⁴ Ama Amịnọnị o yi sì ka ọnị ọ̀ wụ́ ịrẹyị ọnị Ịtama aa kà. Ộ yẹ ka ọnị ộ kata hu Ịtama, dị ọ sị ụkata za a dị o pè e sụ nị.

¹⁵ Ịjị Amịnọnị vavọọ sị mẹ, dị ịhyẹrẹ Ịtama kụkụ aa nyị ọ ẹtẹẹtẹrẹ nị. Ộ hyakụ nyị ịhyẹrẹ anị huna ó mè vịdị sì ịrẹyị anị. Di Amịnọnị ka ọ̀ kwẹẹtẹ dị ọ̀ọ na nị.

¹⁶ Di Ịtama kà, “Eyiye! Wàa dụ mị tụ́ ẹhẹ ọ hyakụ divi huna ọnị ụ vịdị mẹ mị nị.” Ama Amịnọnị ọ yị zẹẹ ka ọnị ọ̀ wụ́.

¹⁷ Dị ọ hị́ ozi ahụ anị dị ọ kà, “Dụ ọnẹẹ ọnọnị tụ́ ẹhẹ hụrẹ ọvịdị amị. Tura a jịnẹ tụ ẹhẹ di we chire oze hí ọ.”

¹⁸ Ịzẹyịza di ozi ahụ ọnọọ va dụ ọ tụ̀ ẹhẹ, di o chire oze hi ọ nị. Ịtama vi ene chire awuru ozoza ọnya aanị ana mẹ̀ ụkọrọ tụ́. Awuru ọ vị ọ vị nị. Ẹngụ awuru ọnọọ ezi ohinọyị anị ozwoorihiī chire nị.

¹⁹ Di Ịtama ka ezi hi ịrẹsụ ana sị zụ̀ ka ayị anị ô du, dị ọ na awuru ọgọdọ anị ọnọọ oni o chire, dị ọ tụ̀ ụvọ kú ịrẹsụ dị aa tụ́ oreree na nị.

²⁰ Abịsarọmị ẹnẹbẹnị Ịtama ô re e dị ọ họ̀ ọ, dị ọ ka, “A vị Amịnọnị raà sị wụ mẹ ịyẹyẹ? Kụ́ irenu ọhụva amị. Ẹnẹbẹnị awụ ọ vị nị, asị ụ sị ịrẹyị ọnọọ tụ́ ịnị ayị.” Di Ịtama yà ini eehi Abịsarọmị ẹnẹbẹnị anị nị. A sị ẹhẹ anị du hị́ ọ ụvọ.

²¹ Ịjị Idevidi ohinọyị maanị wụ́ ịrẹyị ọnọnị ayị ộ kụ́ ọ ẹtẹẹtẹrẹ.

²² Hụrẹ ịhị ọnọọ Abịsarọmị ọ yị vana kà ịrẹyị kanyị Amịnọnị, ọ̀ọ vị ọyịza ọ̀ọ vị odivi, agụvị ka Abịsarọmị ộ nyị ịhyẹrẹ Amịnọnị agụvị ebira ụhị ọnị ọ mẹ nyị Ịtama ọhụva anị.

Abịsarọmị ộ wụ Amịnọnị

²³ Ịrẹma ịrayị ẹẹva ana a vavọọ mẹ̀ Ịtama, ezi ahụ Abịsarọmị anaā kụ́ ẹyị atẹmẹ yọ aa mẹ̀ ụkọrọ ọnọọ Ịbaarị-Ịhazọrị ọ gụrị ẹtẹ Ehwireemi nị. Ịnị ụmẹ ọnọọ Abịsarọmị sị hị́ avaba ezi ohinọyị ka ẹ̀ vẹ ịzị ịsụpa anị hị́ ịzọọ nị.

²⁴ Di Abịsarọmị vẹ tù ohinọyị dị ọ ka, “Taarụ, aza anaā kụ́ ẹyị atẹmẹ ẹ zị vẹ. Aarịhịnị ẹwụrị aza awụ è ve tù mị ịzọọ de.”

²⁵ Di ohinọyị ka yị Abịsarọmị dị ọ ka, “Ozi emi naavọ, asị avaba ayị va vị ẹnya tụra awụ.” Abịsarọmị ộ da ịpẹ yọ pooro ama ohinọyị ka ọnị ọ yị nọ. Dị ahịka vị ọ mẹ̀ aduwa yị wa kẹnẹ nị.

²⁶ Di Abịsarọmị ka ọ̀ọ ka ọnị ọ yị nọ, ọ̀ navọ Amịnọnị adẹnyara anị ọ̀ saasa ọnị kẹ. Di ohinọyị rẹ ka sị ọnịrị ọ aa zị naa mẹ?

²⁷ Di Abịsarọmị aa dá ịpẹẹ yị ohinọyị nị. Dị ohinọyị va zẹẹ ka Amịnọnị ọnịrị avaba ezi ohinọyị ana vọ ẹ̀ saasa a na nị.

²⁸ Abịsarọmị ọ sị ọ kà yị aza anị ka è batọ. Ọ kà èe re ka Amịnọnị ọ sị eche hú dị ịnẹ anị ee hine nị, ọnị vaa kà a yị wa ka ẹ̀ và ịsa hị́ ọ ẹngụ, dị ẹ̀ wụ ọ. Ọ kà asị e hí angwa ka ọnị ọnọnị ọ kà a ka ẹ̀ vavọọ mẹ nị. Ọ kà ẹ̀ nyị ọtụtụrụma, asị angwa hi wa.

²⁹ Ịzẹyịza dị aza Abịsarọmị za Amịnọnị dị ẹ wụ̀ ọ anka a mẹ̀ kà a yị wa nị. Di ezi ohinọyị ana vọ kwẹẹtẹ, dị ẹ hịrẹ ịkẹrịkẹtẹ ẹnịnị, di e kú zwe nị.

³⁰ Ẹ́ màa na ózee, dị a na sị ọ kà yi Idevidi ka Abịsarọmị ọ kụ́ avaba ezi anị wụ, ikonya ọ yị hyakụ vọ nị.

³¹ Di ohinọyị kwẹẹtẹ dị ọ za awuru anị dị ọ na a ana sị zụ̀ ka ayị aa kụ́ ọ, dị ọ hụtụ ini eteesu nị. Dị avaba ezi ahụ anị vavọọ jẹẹ pè e, dị ẹnị rẹ za awuru ẹnịnị dị ẹ na a nị.

³² Di Ijonadabị ozi Isimịya ana vị ọyịnyara Idevidi va ka, “Taarụ! Asị u ro ka avaba ezi ewu a wụ̀ nị oo! Amịnọnị kẹnẹ o sú nị. Amịnọnị mẹ̀ hụrẹ na sị ụkata za Ịtama ọhụva Abịsarọmị dị o pè e sụ, hụrẹ ụmẹ ọnọọ Abịsarọmị hụrẹ nyị ọ tụ́ ịnị ayị ka ọnị vaa wụ̀ Amịnọnị nị.”

³³ Ọ kà asị ohinọyị dọ ịrẹyị aza ana va kà a ka a sị avaba ezi ohinọyị wụ avọọ tụ́ ịzọọ. Ọ kà Amịnọnị ịnyara kẹnẹ o sú nị.

³⁴ Abịsarọmị o si zwe. Â nyị ọza ana jẹẹ ene ee sere ẹtẹ. Ộ kana eyi di o re ka ọkọnị aza ệ wara zị oze akaha ataba ẹyaa dụ Abịsarọmị vẹ nị.

³⁵ Di Ijonadabị va kà a yị ohinọyị dị ọ ka ọ̀ kana eyi ka ezi anị aa vẹ avọọ nị. Ọ kà ọnị mẹ kị kà yọ ịsọọnị ọ vị nị.

³⁶ Ijonadabị mẹ̀ sị sị ịrẹyị anị kà kẹnẹ, di ezi ohinọyị vana vẹ nị. Dị ẹ yaa tụ́ orere vavavaa nị. Di ohinọyị ịnyẹmba ọnịrị ezi ahụ anị ẹnị raa tụ́ orere booboro nị.

³⁷ Abịsarọmị oni o si zwe, ọ zị nọ ịda Itarimayi ozi Amihudi ana vị ohinọyị Anigesuri. Di ohinọyị oni ee sii sụ́ ùnè ozi anị eyinị-eyinị nị.

Idevidi ộ navọ Abịsarọmị ka oo vẹ eehi

³⁸ Abịsarọmị mè zwe nọ Igesuri, ộ yà ịzọọ mẹ ịrayị ẹẹta.

³⁹ Ịjị Idevidi sị orere Amịnọnị ene sú jị, dị ẹngụ anị sị nịya, dị ọ sị ẹngụ tenyi ini oze ịrẹyị Abịsarọmị nị.