2 Ịsamụwẹrị 12 - IWE ỌNỊNỊ

Inatanị ộ tụ Idevidi ohuvọ

¹ Ẹkụhị ọnya dị Ẹnẹyịmavara tụ́ Inatanị hi Idevidi nị. Inatanị mè tù ịda Idevidi dị ọ ka, “Â nyị ọza ẹnị ẹẹva aanị ana yà ịnị ẹkụra ọnya aanị. Ọnya vị opisa dị ọsa ọnị vị onosiye nị.

² Opisa ọnọnị ộ nyị imaaru ọnị atẹmẹ ẹtẹẹtẹrẹ

³ Ama ẹ yị nyị ịsị onosiye ọnọnị ọnị nyị à yị hụhụ vị ozi atẹmẹ ikonya kẹnẹ ọnị ọ hị́ ọ́ mẹ̀ hị́ ọ, dị aa pa a, dị ọnịrị ezi onosiye ọnọọ ana vị ọnọrụ si vịra vabẹ nị. Ọza ọnọọ ọnịrị atẹmẹ ọnọnị ọọ̄ rị ịsaa vaa bẹ, dị ahịka ako ọnya eyee sii hú enyi nị. Aha ọnya ẹ hyakụ aa sụ nị. Vị ọ kụkụ sị mẹẹ anka ozi anị ọnẹẹ avọọ nị.

⁴ Ẹkụhị ọnya a va nyị anusoze ene chi ịda opisa ọnọnị. Opisa ọnọọ ọ yị zẹẹ ka ọnị ò sị ini imaaru àa vị atẹmẹ anị dị ọnị ò si sì anusoze ene chi ịda anị aanị ọzọga. Dị ọ na sị ozi atẹmẹ ọnọrụ onosiye ọnọọ, dị ọ sị na mẹ̀ ịsa yị ọnọrụ ene chi ịdị anị aanị nị.”

⁵ Ayị ọ sị kú Idevidi tù ọnọrụ ọnọọ ana vavọọ mẹ ẹnẹmẹhị. Dị ọ kà a yi Inatanị ka ọnị ộ sị Ẹnẹyịmavara tẹ ivenu ka vị a vọrọ ka ọnọrụ ana vavọọ mẹ̀ ebira avọọ ò sú nị.

⁶ Di Idevidi rẹ ka ọza ọnọọ vị ana a vọrọ ka ọ̀ sị atẹmẹ ẹẹna dọ atẹmẹ ọnya ọnọọ ịrẹsụ yị onosiye ọnọọ. Ịsị a vọrọ ka ọ̀ mẹ ọ vị ọnọọ nị, agụvị ka ọ yị vayị ọza vụrụ-vụrụ.

⁷ Di Inatanị va kà a yi Idevidi dị ọ ka, “Ẹwụ gẹdẹ-gẹdẹ ọ vị opisa ọnọọ nọ! Wụ́ ịrẹyị ẹnẹ Ẹnẹyịmavara ana vị Ohomorihi ana Anisirẹrị aa hẹkẹ kà oo! Ọ kà ọnị ộ nyị wụ ka wa rị ohinọyị Anisirẹrị. Dị ọnị dọ wụ tụ́ hụụnị ụvọ Ịsọọrụ nị.

⁸ Dị ọnị rẹ sị irehi Ịsọọrụ ọga awụ dị ọnị sị yị wụ dị ọnị rẹ kú ese anị tụ́ ọ yị wụ nị. Ọ kà ọnị ọ rẹ sị Anisirẹrị ọnị Anijuda yị wụ. Ẹnẹyịmavara kà àa vị ụ ka ẹnẹẹ e si weyi nị, ọnị yaanị nyị tụ́ ọ yị wụ.

⁹ Ọ kà sị ẹ vavẹ dị ẹwụ sị eyi wụ ọnị Ẹnẹyịmavara dị ẹwụ maanị na mẹ̀ ebira odivi ọnọnị aanị. Wâ mẹ ka à wụ Uriya Anihiti éyi ịrẹkụ. Wa rẹ sị ọ ose anị dọ wa sị ọ nyị. Ẹwa mẹ ka Anamọnị nịnị ẹ̀ wụ ọ ịnị ịrẹkụ nị.

¹⁰ Yẹ oo, ka ịrẹkụ ọ mā vana ta hụụnị eehi awụ pooro. Ẹnẹyịmavara kà wâ sị eyi wụ ọnị dị ụ na dọ Uriya Anihiti ose anị dị ụ nyị ọ nị.

¹¹ Ẹnẹyịmavara kà ini eehi awụ ọnị vaa sị azaa hụrẹ ana vaa kụ́ ẹngụkataa tù wu nị. Ọ kà ini eyi awụ ọnị maanị vaa kụ́ ese ewu dị ọnị kụ́ wa yị aza ana gụrị ẹwụ dị ọnịrị wa aa sụ́ ụmẹ ọọdụ gaaga nị.

¹² Ọ kà ẹwụ vi ana mẹ awụ ini ewere, ama ọnị vị ana vaa mẹ aanị ịnị ụmẹ ọọdụ dị avaba Anisirẹrị ee re e.”

Idevidi ộ dọ irenu ịvị anị

¹³ Di Idevidi kà a yị Inatanị dị ọ ka, “Ma sị ebira odivi mẹ hi Ẹnẹyịmavara.” Di Inatanị tụ́ Idevidi ohi dị ọ ka, “Ẹnẹyịmavara ọ raà jị eyi vee hụụnị ebira odivi ọnị ụ mẹ. We yi kuku vee sú.

¹⁴ Ama agụvị ka wa raà sị eyi wụ Ẹnẹyịmavara ini ịrẹyị ọnị ụ mẹ aanị, ozi ọnọrụ ọnọọ ọnị ọ vaa maa wụ avọọ, wèe sì, wèe yi si, vi ee sú nị.”

¹⁵ Dị Inatanị si hu aa nọ eehi anị nị. Ose Uriya ọ va sị ozi ọnọrụ ọnọọ ma yi Idevidi. Dị Ẹnẹyịmavara tana ụvọ za ozi ọnọọ, dị ẹngụ nyima aa zị ọ nị.

¹⁶ Di Idevidi hụ agụvị ozi ọnọọ dị aa dá ịpẹẹ yi Ohomorihi nị. Idevidi ọ yị rị ịsa, dị ọ ngụ ịnị eehi dị ọ na hụtụ ini eteesu nị.

¹⁷ Dị azọkụ ini ezi ahụ anị kwẹẹtẹ ka ẹnị ẹ̀ na sị ọ kwẹẹtẹ hụụnị eteesu nị, ama ô yi. Ọ yị zẹẹ ka ọnịrị wa ẹ̀ rị ịsa.

¹⁸ Ịjị ọ sị mẹ ẹkụhị ịhịmba, ozi ọnọọ ô wusu. Angwa ee hi ezi ahụ Idevidi, ẹ yị nyayịnẹ na kà a yọ ka ozi ọnọọ ô wusu. Eyee ro o ka ozi ọnọọ mẹ̀ yị yàra, ẹnị ệ dá ịpẹ yị Idevidi, ọ yị wụ́. Ẹ ka ẹnị ẹ̀ẹ kụkụ va na kà a yọ ka ozi ọnọọ ô wusu ọ nyayịnẹ mẹ ẹngụ anị ọnya.

¹⁹ Idevidi ô re ezi ahụ anị màa kà ịrẹyịị chire ẹngụ ụtọ, dị ọ sị yẹ ka ozi ọnọọ ô wusu nị. Di Idevidi va họ̀ ezi ahụ anị use ka vi ozi ọnọọ wéé wusu nị? Dị ẹnịnị ka ô wusu ộ.

²⁰ Idevidi mẹ̀ vavọọ wụ́, dị ọ hụ̄ enyi, dị ọ dá ịsa sisi ẹngụ anị nị. Di o chire awuru ọsa, dị ọ ngụ ini irehi Ẹnẹyịmavara di o kú ẹtẹ kụ́ ọ nị. Dị ọ varẹma nọ ini eehi anị dị ọ ka à sị ịsa yị ọnị, dị a sị ịsa yọ, dị ọ rị ọ nị.

²¹ Dị ezi ahụ anị ka, “Sị waa mẹ aanị? Ozi ọnọọ mẹ̀ yà ịzọọ, wẹ yị rị ịsa, wee sụ́ ùnè. O ve wusu dị ụ kwẹẹtẹ dị waa rị ịsaa?”

²² Di Idevidi kà, “Ịjị ozi ọnọọ yà ịzọọ, mẹ yị rị ịsa, mee sụ́ ùnè ka ọza ọ mā yẹ Ẹnẹyịmavara ọ zụ vayị amị, dị ọ naavọ.

²³ Ama booro aanị o wusu; sị ẹ vẹ dị mẹ̀ yị rị ịsa? Ị máá kụkụ zụ ha a vavẹ nị? Eme vee ne tù ọ nị, ọ yị kụkụ zụ vavẹ ve tù mị.”

²⁴ Di Idevidi ee mi Ịbatịsẹba ose anị isuuru nị. Idevidi ọ rẹ nọ ịda anị, dị ọ ma ozi ọnọrụ ọnya nị. Di Idevidi ka ịrẹha ozi ọnọọ ọ rị Isoromọnị nị. Ẹnẹ ẹ̀ yị mā vị ana nyayịnẹ sì ịrẹyị anị.

²⁵ Dị Ẹnẹyịmavara tụ́ Inatanị ọnịsẹ anị ka ọ̀ kà a ka ịrẹha ozi ọnọọ ọ rị Ijedida nị.

Idevidi ộ sị ịrẹkụ dọ ẹtẹ Ịraba

²⁶ Ịnị ụmẹ ọnọọ, Ijowabi ọnịrị isoja Anisirẹrị nịnị ẹ raà rị Ịraba ana vi ohyẹtẹ ẹkụra Anamọnị nịnị ịzị ohinọyị ẹnịnị ra.

²⁷ Dị Ijowabi tụ́ ọnụtụ nịnị ka ọ kà yị Idevidi ka ọnị ọ raà gẹ ịrẹkụ tu anẹkụra Ịraba. Ọnị ọ raà rị ịzị enyiī hụrẹẹ na ngụ ẹkụra ọbanyị ọnọọ.

²⁸ Ọ kà à kà a yi Idevidi ka ọ̀ kụ́ isoja anị ana vọ dị ọnịrị anẹkụra ọnọọ ẹ̀ na kụ̀ ịrẹkụ di Idevidi ọ̀ rị wa. Ọ kà ọ̀ọ yẹ ka àa vị ọnị ọ na rị ọ nị, ịrẹha anị a vaa sịị hị́ ẹkụra ọnọọ nị.

²⁹ Ịzẹyịza di Idevidi kụ́ avaba aza anị, di e si hu aa nọ Ịraba, dị ẹ na rị wa nị.

³⁰ Dị ẹ dọ wa amu ohinọyị ẹnịnị dị ẹ sị kú Idevidi ịrẹsụ nị. Amu ọnọọ ộ rata, Igooru a sị mẹ̀ ẹ, dị a kụ́ ịrẹta ọkatarihi hi ọ nị. Idevidi ô kụ́ avaba ogu ọkatarihi hụụ ịzọọ.

³¹ Di Idevidi za anẹkụra ọnọọ nị. Dị a kụ́ ẹnya ụkọrọ enyusẹ-enyusẹ ọnịrị ịraga yi wa ka ẹ̀ sịị mẹ̀ ụkọrọ nị. Dị ẹnịnị aa jị ịbụrọọkụ nị. Avọọ Idevidi mẹ̀ mẹ avaba anẹkụra Anamọnị nị. Di Idevidi ọnịrị avaba isoja anị varẹma aa nọ Ijerusarẹmị nị.