2 Ịsamụwẹrị 10 - IWE ỌNỊNỊ

Idevidi ô hú Anamọnị nịnị ẹtẹ éyi ịrẹkụ

¹ Ịjị ọ dà kù oni Idevidi vavọọ na raà sị Imehwibọsẹtị, di ohinọyị Anamọnị nịnị wusu nị. Di ozi ohinọyị ọnọọ ana aā hị́ Ihanuni rị ohinọyị dọ ada anị ịrẹsụ nị.

² Di Idevidi ve ro o ka ọnị aa naa mẹ ayamvaa yị Ihanuni ọnọọ nị. Ihanuni vi ozi Inahasi. Idevidi kà Inahasi ada Ihanuni ọ rẹẹ̀ vịdị mẹ ayamva yị ọnị da. Di Idevidi va tụ́ aza ka ẹ̀ na kụ́ Ihanuni nyaarị ọ agụvị ada anị ene sú nị. Ịjị aza ọnị Idevidi vavọọ tụ́ na sị ngụ ẹtẹ Anamọnị,

³ dị ọdọvịdị Anamọnị ne si tù Ihanuni ọga ẹnịnị dị ọ ka, “Taarụ, wáá yẹ ka aza oni Idevidi tụ́ ka ẹ̀ va kụ́ wụ aanị, ẹ yị vị ọ sị sị ụbanyị yị wụ? Wáá yẹ ka vị ọ tụ́ wa vẹ ka ẹ̀ va ngụ ịnị ẹtẹ ọnọnị di è re ẹtẹ mẹmẹ yà nị? Wáá yẹ ka vi eyee sì ka ẹnị ẹ̀ kụ́ ịrẹkụ va hụ́ yị nị?”

⁴ Ihanuni mẹ̀ vavọọ wụ́, dị ọ za aza oni Idevidi tụ́ na, dị ọ kụ̀ achẹva ịrẹwa ẹnịnị nị. Dị ẹ rẹ za wa awuru dị ẹ yẹrẹ ẹ hụụnị akakana na ngụ iruvo nị. Ịjị ẹ vavọọ sị wa mẹ, dị ẹ dụ wa varẹma nị.

⁵ Ịjị a va kà a yi Idevidi, dị ọ tụ́ ka à na gẹrị aza ẹnẹẹ nị. Aza ẹnẹẹ vị ana a mẹ̀ ụhị nyị ẹtẹẹtẹrẹ. Dị Idevidi ohinọyị tụ́ hi wa ka ẹ̀ jẹẹ Ijeriko pooro dị ịrẹwa ẹnịnị ò nyị, dị ẹ̀ vavẹ.

⁶ Anamọnị e si re ka ẹnị ẹ sị ayị mẹ kụ́ Idevidi ẹnẹmẹhị, dị ẹ wụsẹ sị ẹkẹhị na hị́ isoja Anarami ẹnị akawụ-akawụ oze ẹẹwụ hụrẹ Ịbẹtị-Ịrẹhọbị ọnịrị Izoba nị. Ẹ rẹ na hị́ ohinọyị Imaaka isoja anị akahị. Dị ẹ rẹ na hị́ isoja ẹnị akawụ-akawụ oze ịhịnọnyị hụrẹ Itobi nị.

⁷ Idevidi mẹ̀ vavọọ sị wụ́, dị ọnị rẹ tụ́ Ijowabi ọnịrị avaba isoja anị ka è ne tù aza Anamọnị nị.

⁸ Anamọnị ê tenyi ẹngụ ịrẹkụ tụ́ oze ana a zị naa ngụ ẹkụra ẹnịnị, dị Anarami ana hụrẹ Izoba ọnịrị Ịrẹhọbị vẹ ne beri Anịtọbị ọnịrị Animaaka ẹnị tenyi ẹngụ ịrẹkụ tụ́ ịnị avị chapaa nị.

⁹ Ijowabi mè re ka a sị ịrẹkụ gu tụ́ ọvịdị ọnịrị ịrẹma anị, dị ọ tọ̀ọ́ isoja ana nyị ẹngụ ẹnịnị ini isoja Anisirẹrị dị ọ ka ẹnịrị Anarami ẹ̀ na gẹ ịrẹkụ nị.

¹⁰ Dị ọ ka Abisayi ọyịnyara anị ò sị eyi pè isoja ana vọ dị ọ̀ kụ́ wa dị ẹnịrị isoja Anamọnị ẹ̀ na gẹ ịrẹkụ nị.

¹¹ Di Ijowabi ka, “Anarami ẹ̀ẹ sị kata huna mị, dị ụ va dọ mị ha. Àa vị Anamọnị sị kata huna wụ nị, dị ẹmị rẹ va dọ wụ̀ ha.”

¹² Dị ọ rẹ ka, “Asị u hí angwa, vẹ ya sị ọtụtụrụma kụ̀ ịrẹkụ agụvị ẹkụra ayị ọnịrị agụvị ẹkụra Ohomorihi ayị. Ẹnẹyịmavara vaa mẹ̀ ịsa ene zee e eyi.”

¹³ Di Ijowabi ọnịrị isoja anị tere pè Anarami ịnị ịrẹkụ nị. Anarami mè re wa, e kú zwe.

¹⁴ Anamọnị mè re ka Anarami e zi zwe, dị ẹnị re si zwe hụụ ịda Abisayi na ngụ ịnị ẹkụra nị. Di Ijowabi varẹma hụrẹ ịrẹkụ Anamọnị dị o si hu aa vẹ Ijerusarẹmị nị.

¹⁵ Anarami mè re ka Anisirẹrị ẹ sị ẹnị dụ, dị ẹ rẹ varẹma kụ́ ẹngụ gụ nị.

¹⁶ Ọnọrụ ọnya ana aā hị́ Ihadadeza ộ tụ́ na hị́ Anarami hụrẹ akẹnẹ okuha Eyihureti vẹ. Ọnọrụ ana aā hị́ Isobaki ana vị ọga isoja Ihadadeza ọ kụ́ aza ẹnẹẹ aa vẹ nị.

¹⁷ Á mẹ̀ vavọọ va kà a yi Idevidi, dị ọnị rẹ kụ́ avaba Anisirẹrị gụ dị ẹ jịnẹ nọ akẹnẹ Okuha Ịjọdanị dị ẹ na ngụ Iheramị nị. Dị Anarami gù ịrẹkụ ẹnịnị di e si hu aa naa gẹrị Idevidi ka ẹnịrị ọ ọ̀ na kụ̀ ịrẹkụ nị.

¹⁸ Ẹ mẹ̀ gẹ, Anisirẹrị ẹ sị wa dụ, di Idevidi wụ̀ isoja ẹnịnị ana aā sị umaata kụ̀ ịrẹkụ ẹnị akatarẹchẹhị, dị ọ rẹ wụ̀ isoja anahụ ẹnị akawụ-akawụ oze oohu nị. Ọ rẹ za Isobaki ọga isoja Anarami, dị ọ và ịsa hị́ ọ ẹngụ, dị ọ wụ̀ ọ tụ́ ịzọọ nị.

¹⁹ Ịjị ohinọyị ana vọ ana vịdị vị ozi ahụ Ihadadeza re ka Anisirẹrị ẹ sị wa huna, dị ẹ ka ẹmịrị Anisirẹrị ọ yị kụkụ zyaazị nị. Dị ẹ kụkụ va vara ọrịhị Anisirẹrị nị. Angwa kuku ee hi Anamọnị nịnị, dị ẹ yị kụkụ nyayịnẹ na gụ Anamọnị nịnị ụvọ nị.