2 Anịtẹsaronika 3 - IWE ỌNỊNỊ

Mẹ aduwaa yị nịnị!

¹ Ẹwụ nịnị ẹyịnyara amị, dị ma va za ịrẹyị amị ẹtẹ, waa mẹ̀ aduwaa yị nịnị ka ịrẹyị Ohomorihi ọ̀ wụsẹẹ garaa hi ẹtẹ, dị ọ̀ọ nyị ụbanyị, anka ọ mẹ̀ yà ịdị awụ nịnị!

² Rẹ mẹ̀ aduwa ka Ohomorihi ọ̀ dọ yị tụ́ ịnị ụvọ aza edivi ẹnẹ ẹ̀ yị mẹ ịzẹyịza! Ẹ yị vị avaba aza e sì ka ẹnị ẹ̀ sị ayị tụra Ijeesu.

³ A zụ sị ayị tụra Ananyị yị. Ọ vaa sị ụkataa wụ nịnị, dị ọ dọ wụ nịnị tụ́ ịnị ụvọ Echu.

⁴ Ananyị yị ộ mẹ̀ ka ya yẹ kaakara ini oze awụ nịnị ka waa mẹ̀ ịsa ọnị ị kà wụ nịnị. Yáa yẹ ka avọọ ụ mẹ̀ vaa yịị mẹ nịnị nị.

⁵ Ananyị yị ọ̀ mẹ ayị awụ nịnị ka wa yẹ, Óhomorihi meme sì ịrẹyị ọza, dụ wa rẹẹ sị ẹngụụ dọ ịrẹyị nịnị, anka Íkirisiti mẹ̀ẹ mẹ ka ọza ọ̀ sị ẹngụ dọ ịrẹyị.

Áa vọrọ ka avaba aza ẹ̀ẹ mẹ̀ ụkọrọ

⁶ Ẹwụ nịnị ẹyịnyara amị, yáa sị ịrẹha Ijeesu Ikirisiti Ananyị yị mẹ ọdaa wụ nịnị ka: ọdọwụ ana àa nyị uworo dị ọ̀ yị dọ ịrẹyị ọnị ị kà yọ nị, asị ẹwụrị ọọ rẹ̀ zị ògù nịnị!

⁷ Ẹwụ nịnị ụvọta ọ́ọ yẹ, a mẹ̀ vọrọ ka waa hama yị nịnị. Yẹ yị nyị uworo, ị mẹ̀ yà ịdị awụ nịnị.

⁸ Yẹ yị dọ ọza ịsa rị kẹnẹ, dị asị i sí ọọ ụta. Ama yáa mẹ̀ ụkọrọ ẹtẹẹtẹrẹ ọọdụ ọnịrị ịrahụ ka asị ị na vị ẹnya yị ọzọnyị-ọzọnyị awụ nịnị.

⁹ Ayị vị agụvị ka ye yi re oze họ̀ use ka waa sị ịsaa yị nịnị, ị́ vavọọ aa sịị mẹ. Ama yâ vavọọ mẹ ka wa zụ ree, dị waa hama yị nịnị.

¹⁰ Ị mẹ̀ yà ịdị awụ nịnị, yáa vịdị mẹ ọda ọnọnịị wụ nịnị ka ọza ẹnẹ ẹ̀ yị mẹ̀ ụkọrọ, asị ọ rẹ rị ịsa.

¹¹ Yáa wụ́ ọọ ka aza ẹnyị ịnị awụ nịnị ẹyị mẹ̀ ụkọrọ vụrụ-vụrụ. Ẹyaa nyị uworo, dị ẹ rẹ yaa jị eyii ngụ ịrẹyị ọnịrẹyị.

¹² Yáa sị ịrẹha Ijeesu Ikirisiti Ananyị yị mẹ ọda yị ẹngụ aza ana vavọọ aa mẹ, ya rẹ hú wa ụvọ ka ẹ̀ẹ mẹ̀ ụkọrọ ẹnịnị hẹẹ, dị ẹ̀ rẹẹ mẹ̀ ụkọrọ ẹnẹ ẹ vaa rị ịnị anị.

¹³ Ama anda ayị nịnị, asị ọyịza ọyịmẹ̀ du wu nịnị eyi!

¹⁴ Àa nyị aza ẹnẹ ẹ̀yị dọ ịrẹyị ọnị yaa chẹrẹ ẹ tụ́ụ hi wu nịnị aanị, sị eyi pe ẹngụ aza ẹnẹẹ, di u we re ka ẹ yị nyị ịsị ẹ kụ́ ẹwụrị ọọ gẹ nịnị, agụvị dị ụhị ọ̀ zụ nyị ọọ.

¹⁵ Ama asị ụ na zaa ọnịvị nịnị, oo! Kàa ọnọ nịnị anka ọyịnyara awụ nịnị!

Ịrẹyị ọdịrẹma

¹⁶ Ananyị yị ụvọta anaā sịị ẹngwọọrọọ yị, ọ̀ sị ẹngwọọrọ wụ nịnị ịnị avaba ụmẹ ọnịrị ini oze tụra oze! Ananyị yị ọ̀ yà pe avaba awụ nịnị!

¹⁷ Ẹmị Ịpọọrụ ụvọta ọ sị ụvọ amị chẹrẹ ẹ ka mị kụ́ wụ nịnị nị. Aanị m mẹ̀ yị sị ụvọọ tụ́ ịnị avaba iwe ọnị màa chẹrẹ nị. Wàa maanị ree kẹnẹ, yẹ nịnị ka ẹma chẹrẹ iwe ọnọọ nị!

¹⁸ Ẹyịza ọọhẹ Ananyị yị Ijeesu Ikirisiti ọ̀ ya pè avaba awụ nịnị.