2Ipita 2 - IWE ỌNỊNỊ

Ọzwọzịsa Onireche nịnị

¹ Ịnị ịyẹẹyẹ, ọnịsẹ ireche nịnị hi ini Aniju nịnị. Ọnịsẹ ireche nịnị ẹnị rẹ vaa jịnẹ ịnị akakana awụ nịnị. Di e were vẹ, dị ẹyaa sị irechee zụ̀ aza, ana vaa mẹ azaa nyeeyi. Ẹ vaa kà a ka ẹnị ẹ́ yị yẹ Ijeesu Ikirisiti Ananyị yị, ọza ana hị́ wa varẹma. Agụvị avọọ, ẹ́ yị vaa jẹẹ, dị ẹ̀ wụ ẹngụ ẹnịnị và ha.

² Aza ọrụrụ-ọrụrụ vaa saasa ebira kẹnẹ-kẹnẹ ẹnịnị, dị ẹ mẹ ka aza ẹ̀ẹ kà ịrẹyị odivi oze ịzẹyịza Ohomorihi.

³ Ọnịsẹ ireche ẹnẹẹ vị eneyọhụrẹ, agụvị avọọ dị ẹyaa sị ịtọpa irechee vene wu nịnị, agụvị dị ẹ̀ zụ sị wụ nịnị sẹ ohu. O si kù ọnị ọmọkarẹyị ẹnịnị tenyi ẹngụ tịtẹ. Ụmẹ ana vọ aa chee aanị, dị à wụ̀ wa vá ha.

⁴ Anggẹẹrị nịnị mẹ̀ mẹ ịvị, Ohomorihi ẹ́ yị sị vayị ẹnịnị. Vị ọ sị wa, dị ọ kụ wa va hi ini ẹkụra ịra nị. Â sị ẹba sụ́ wa tụ́ ịnị ịrahụ ruma-ruma ịzọọ. Ịzọọ ẹ vaa yà pooro nee tù ẹkụhị ọkarẹyị nị.

⁵ Anịyẹẹyẹ nịnị ẹnẹ ẹ̀ yị yẹ Ohomorihi, ẹ́ yị sị vayị ẹnịnị. Dị ọ sị ọhaara enyi kụ́ wa kwooze nị. Inowa ọnịrị aza ẹnị ịhịmba kẹnẹ ọ dọ há nị. Inowa vị anaā kà a yị aza ka ẹ̀ẹ mẹ̀ ịsa ana vọrọ eyi Ohomorihi.

⁶ Ohomorihi ọ rẹ jị ịvị yị anẹkụra Isodọmị ọnịrị Igomora, dị ọ sị ịra wụ̀ wa vá ha nị. Ộ vavọọ mẹẹ, agụvị aza ana ka ẹnị ẹ mā wụ́ ịrẹyị Ohomorihi ẹ̀ kọ ịrẹyọyẹ hụụnị anị.

⁷ Ama ộ dọ Ịrọọtị ana vị ọnịzẹyịza há. Ayị Ịrọọtị vị ana vazi tụ́ ịnị ebira odivi ana aza edivi ẹnẹẹ aa mẹ.

⁸ Ịrọọtị ọnịzẹyịza vị ana ra ịnị akakana ẹnịnị, dị ee ree, dị ọ raa wụ́ eyinị-eyinị ebira odivi ẹnẹ ẹyaa mẹ nị. Ebira odivi ẹnịnị ọnọọ aa zàmà ayị Ịrọọtị ẹtẹẹtẹrẹ, agụvị ka Ịrọọtị vị ọza ọyịza.

⁹ Ịsa ẹnẹnị ệ sị zụ ka Ohomorihi ọ́ọ yẹ, ọ mẹmẹẹ̄ dọ aza anịị há hụụnị ẹzamare ẹnịnị. Ọ rẹ yẹ, o memeē tenyi aza edivi tịtẹ, pooro nee tù ẹkụhị ọkarẹyị, dị ọ sị ụya rị wa.

¹⁰ Aza oni Ohomorihi vaa sị ụyaa rịị hu yị: Aza ana aa mẹ̀ ịsa edivi ọnị ọchẹngụ ẹnịnịị̄ sì kẹnẹ, dị ẹyaa sị eyii wụ̀ aza ana nyị ọda, dị ẹ rẹ yaa sị ẹngụụ tụ́ ẹba, ẹngụ ẹnịnị kẹnẹ e sì ịrẹyị anị nị, ẹnịnị ẹ́ yị nyị angwahi anggẹẹrị nịnị, dị ẹyaa kà ịrẹyị odivii hi wa.

¹¹ Anggẹẹrị nịnị ana hyakụ nyị ụkata huni onireche ẹnẹnị, ẹ́ yị hyakụ kà ịrẹyị odivi hi aza ẹnẹẹ ọ́vịdị Ohomorihi.

¹² Aza ẹnẹnị vị ana ya anka ịsụpa obooro avọọ ana a mẹ ka àa wụ. Ịsị ẹnịnị ẹ yị yẹ ini oze anị, dị ẹyaa kà odivii hi ọ. Vị ẹnịnị vee vú ẹtẹ kẹnẹẹ tụ́ ini ebira odivi ẹnịnị nị.

¹³ Ụya ẹnẹ yaa sịị yị aza avọọ, Ohomorihi rẹ vaa sị ụyaa rị waa si atọ. Óo zé wa eyi ka ẹnị ẹ̀ẹ rị ịsa chavaa, dị ẹ̀ rẹẹ mẹ̀ ebira kẹnẹ-kẹnẹ, ọ̀ọ daka vị ọọdụ gaaga. Wàa kụ́ gụ aa rị ịsa, dị ẹ yà ịnị akakana awụ nịnị nị; ịdọtị ẹ vị tụ́ ịnị ịragụ awụ nịnị nị, dị eyee vene wu nịnị, dị ẹyaa rị ịsa chavaa kẹnẹ.

¹⁴ Ịrẹkọyịsẹ kẹnẹ ẹ sị eyi pe nị, ẹnịnị ẹ́ yị zụ hụụnị ịvị ọyị mẹ. Di eyee vene aza ana ayị anị ẹ̀ yị jẹẹ. Ayị ẹnịnị ọọ ta vị tụ́ ini eyọhụrẹ, Ohomorihi o ree chì hi wa da.

¹⁵ Ẹ sị há hụrị oze Ohomorihi, e si nyeeyi. Ẹyaa zị ụsẹ ọnị Ịbaraamị ozi Ịbọsọ zị. Ịbaraamị ô sì ka ọnị ọ̀ mẹ̀ ịsa odivi dị ọnị ọ̀ yị zụ nyị ẹkẹhị kẹnẹ.

¹⁶ Ịbaraamị ộ dọ ohuvọ ẹkụhị ọnya agụvị ịvị anị. Ịhị ọnọọ, ịkẹrịkẹtẹ ẹnẹ ẹ̀ yị ma kà ịrẹyị, ộ kà ịrẹyị anka ọza avọọ, ana mẹ ka ọnịsẹ ọnọọ ọ̀ hụụnị ụra anị.

¹⁷ Onireche ẹnẹẹ vị ana sị mẹẹ anka ịkangga ẹnẹ ẹ̀ yị nyị enyi avọọ. Vị ẹ rẹ yà anka eguhi ọnị ahị aa kụ́ụ zịịzị nị. Ịnị ịrahụ ruma-ruma Ohomorihi sị eehi ẹnịnị tụ́ pooro zịna-zịna nị.

¹⁸ Ẹnịnị vị anaā sịị ẹngụụ tụ́ ẹba, dị ẹyaa kà ịrẹyị ụra kẹnẹ, dị ẹ rẹ yaa sị oyisì odivi ọchẹngụ ẹnịnịị vene aza, ana ahịka oò yi kù ẹnẹ ẹ tụ̀ hụụnị ụvọ aza ene si nyeeyi hụrị oze Ohomorihi.

¹⁹ Ẹyaa kà a yị aza ka ẹ vaa nyị ẹngụ ẹnịnị, ama ẹnị ana aa kà a, yị vị ọrịhị ịvị ana vaa wụ̀ wa. Ịsa tụra ịsa ana àa sị ẹbẹẹba ọza nyị, ọ sị vara ọrịhị ịsa ọnọọ.

²⁰ Aza ọ̀ọ sị Ijeesu Ikirisiti Ananyị yị ọnịrị Ọdọzaha ayị yẹ, dị ẹ sị hụụnị ịsa edivi ịnị ẹhẹ ọnọnị eneē du ọzaa ha nị, aza ẹnẹẹ ẹ̀ẹ kụkụ zẹẹ ka ịsa ẹnẹẹ ẹ̀ za ẹnị, dị ịsa ẹnẹẹ ẹ̀ rẹ nyị ẹbẹẹba ẹnịnị, ọdịrẹma ẹhẹ aza ẹnẹẹ o kuku vee divii hu ịyẹẹyẹ ẹnịnị nị.

²¹ Ọ́ọ vana dahi ka asị ẹ́ yẹ oze ịzẹyịza, hu ka ẹ̀ sị ọ yẹ, dị ẹ̀ và ị́rẹma ọda ọnịnị ana kà yị wa.

²² Ịsị e tù ẹngụ aza ẹnẹẹ, ọ́ọ sị zụ̀ ka ụhịrẹyị ọnya ene eē che, vị ịzẹyịza. Ụhịrẹyị ọnọọ ka: Irezi ọ sị varẹma aa nọ ịnị ịhyẹrẹ anị. Ụra ana á sị hụ enyi, ọ zị varẹma rẹ na ngụ ịnị ụdọ.