1 Ohinọyị 5 - IWE ỌNỊNỊ

Isoromọnị ô tenyi ẹngụ ka ọnị ọ̀ da irehi Ohomorihi

¹ Ihirami ohinọyị Ịtaya ộ wụ́ ka a sị Isoromọnị nyị ka ọ̀ rị ohinọyị tụ́ udi ada anị. Ẹkụhị ọnya di Ihirami tụ́ ozi ịda anị nọ ịda Isoromọnị nị. Ihirami vi ene sì ịrẹyị Idevidi vịdị vẹ.

² Di Isoromọnị tụ́ hi Ihirami dị ọ ka

³ “Wâ yẹ Idevidi ada amị ka ọ rẹ vaa zụụ dà irehi yị Ẹnẹyịmavara Ohomorihi anị, agụvị ịrẹkụ ana gụ kara a. Wâ yị ka avọọ ọ́ mẹ kụ̀ ịrẹkụ pooro dị Ẹnẹyịmavara va si ehuna yọ nị.

⁴ Booro aanị, Ẹnẹyịmavara Ohomorihi amị ọ raà sị ẹngwọọrọ yị mị eyi ụvọnị-ụvọnị; kụkụ nyị ọbarọza, à yi nyị ka mee hí angwa ka ịrẹyị aa vẹ.

⁵ Avọọ mê ro o ka maa dà irehi yị Ẹnẹyịmavara Ohomorihi amị. Ohomorihi ộ vịdị vavọọ kà a yi Idevidi ada amị ka ọ̀ yà ịrẹsụ ode ohinọyị anị ọ vaa dà irehi yị ọnị nị.

⁶ Avọọ kà a ka à da ọchị Isida hụrị Ịrẹbanọnị va mị. Ezi ahụ amị vaa vẹ ve tù ezi awụ. Mi vaa sị ẹkẹhị ụkọrọ ezi ahụ awụ yị wa anka irihi ọnị waa jị. Wâ yẹ ka ẹ yị nyị ọdarehi ana yara dà ọchị anka Anisidoni nịnị.”

⁷ Ihirami mẹ̀ maanị wụ́ ụtụ Isoromọnị, ịnẹ anị ô hine ẹtẹẹtẹrẹ. Dị ọ kà, “Ma kụ́ Ẹnẹyịmavara avọ ajịnị. Ọnị ọ sị ozi ana yẹ ịrẹyị yị Idevidi ka ọ vị ohinọyị tụra aza anị ana maanị rụrụ aanị.”

⁸ Di Ihirami tụ́ hi Isoromọnị dị ọ ka, “Mâ wụ́ ụtụ ọnị ụ tụ́ hi mi. Ịnị ịrẹyị ọchị Isida ọnịrị ọchị isipirẹsị ọnị ụ kà, ịsị u wèe sì kẹnẹ mị vaa mẹ nị.

⁹ Ezi ịda amị vaa kụ́ ọchị ẹnẹẹ chii nọ Ịrẹbanọnị dị ahịka mị kụkụ mẹ wa di enyi ọ̀ zụ kụ́ wa ve hi aha ọnị wàa tụ́ hi mị ka ma kụ́ wa nọ nị. Mị vaa kà a ka à há ọchị ẹnẹẹ hi ịzọọ, dị wa tụ́ na kụ́ wa. Wàa na raà kụ́, dị ụ sị ịsọyịrị yị aneehi amị anka ụ mẹ̀ kà a.”

¹⁰ Ịzẹyịza di Ihirami kụ́ ọchị Isida ọnịrị ọchị isipirẹsị na yị Isoromọnị nị. Ọpa ọnị Isoromọnị si kẹnẹ, ọ kụ́ na yọ nị.

¹¹ Di Isoromọnị kụ́ ihwiti ịgarụwa akawụ-akawụ oze ẹchẹhị tụra ohurẹẹwụ tụra ịhịmba rị ẹjịjị na yi Ihirami nị. Dị ọ rẹ kụ́ angwẹ ịgarụwa ozoza ịrẹka tụra ẹtarẹwụ achị ẹẹhị na yọ nị. Avọọ Isoromọnị mẹ̀ẹ kụ́ ịsa na yi Ihirami ịrayị-ịrayị nị.

¹² Ẹnẹyịmavara ộ mẹ̀ ka Isoromọnị ọ̀ yẹ ịrẹyị ẹtẹẹtẹrẹ anka ọ mẹ kà a yi Isoromọnị ka ọnị vaa mẹ. Ẹ yị nyị ịrazị ịnị akakana Isoromọnị ọnịrị Ihirami. Ẹnị ẹyịva vị ana hị́ eku yị ẹngụ.

Anụkọrọ Isoromọnị

¹³ Isoromọnị ộ kụ́ aza hụrị avaba Isirẹrị ana aa mẹ̀ ụkọrọ yọ. Aza ẹnẹẹ ana aa mẹ̀ ụkọrọ yọ vị ẹnị akawụ-akawụ oze ẹwụrẹhị.

¹⁴ Ẹnị akawụ-akawụ oze ẹẹhị ọọ̄ tụ́ nọ Ịrẹbanọnị ịnị ụhwẹ nị. Ẹ̀ẹ mẹ ụhwẹ Ịrẹbanọnị dị ẹ rẹ va mẹ ụhwẹ ẹẹva ini eehi ẹnịnị. Ọnọrụ ana aā hí Adorami ọ vị ọga ọnụkọrọ ẹnẹẹ nị.

¹⁵ Aza oni Isoromọnị nyị ana aa za ẹnya vị ẹnị akawụ-akawụ oze ohurẹẹwụ tụra ẹẹhị, dị ẹnị akawụ-akawụ oze ẹbẹẹva aa há ịrẹta ịnị ataba nị.

¹⁶ Ịrẹma ẹsẹnị ọ rẹ nyị ẹnị akawụrakahị tụra ịrẹkẹẹchẹhị oze ẹwụrẹhị ana áa kụ́ azaa mẹ̀ ụkọrọ.

¹⁷ Isoromọnị ộ mẹ̀ ọda dị ẹ kụ́ ịrẹta ẹbanyị-ẹbanyị ana katarihi ana a há ka à sị ka irehi ọnọọ ẹtẹ nị.

¹⁸ Aza Isoromọnị ọnịrị aza Ihirami ne chire Anigebari ẹ bẹ ịrẹta ẹnẹẹ nị. Avọọ a mẹ̀ mẹ tenyi ọchị ọnịrị ịrẹta ana a vaa sị dà irehi ọnọọ tịtẹ nị.