1 Ohinọyị 16 - IWE ỌNỊNỊ

¹ Ẹkụhị ọnya Ẹnẹyịmavara ộ tụ́ Ijehu ozi Ihanani hi Ibaasa. Ọ kà ọ̀ na kà a yọ ka

² “Ibaasa, ẹ yị nyị ịsị ụ vị dị mị sị ụ kwẹẹtẹ dị mị sị ụ mẹ ọdọvịdị Anisirẹrị aza amị nị. Ama dị ahịka ebira odivi oni Ijerobowami mẹ ụ waa mẹ nị Wâ mẹ ka Anisirẹrị aza amị ẹ̀ẹ mẹ̀ ebira odivi. Ẹnịnị vavọọ aa mẹ̀ ebira odivi ka ẹnị ẹ̀ sị mẹ ayị kụ́ mị.

³ Yẹ o! Ibaasa, ka ẹwụrị aneehi awụ vị ọnị maa kụ́ hụrẹ oze. Ịsị mị mẹ aneehi Ijerobowami ozi Inebati avọọ, avọọ m mẹ̀ vaa mẹ aneehi awụ nị.

⁴ Aza awụ ene èe sú tụ́ ịnị ẹkụra, vi oni irezi vaa rị, ene èe ne sú tụ́ ịnị avị vị ọnị ụba ene eē hira ẹbẹẹba vaa rị.”

⁵ Ịrẹyị Ibaasa ana vọ, ọ mẹmẹ nyị ụkata, avaba anị vị ana a chẹrẹ tụ́ ini iwe ịsị ẹ mẹ ẹkụhị-ẹkụhị ini oze ohinọyị Anisirẹrị.

⁶ Ibaasa ô sú di e ne e pè ohiku anị ịnị ẹkụra Itiriza nị. Dị ahịka ozi anị Era ọ rị ohinọyị dọ ọ ịrẹsụ nị.

⁷ Ẹnẹyịmavara ộ hyakụ rẹ zi ini ụvọ Ijeehu ana vị ọnịsẹ kà ịrẹyị Ibaasa ọnịrị aneehi anị. Ijeehu vị ozi Ihanani. Ộ kà a yọ ini oze ebira odivi ana aa mẹ ini eyi Ẹnẹyịmavara. Aneehi Ibaasa ệ mẹ̀ ebira ka ẹnị ẹ̀ sị mẹ ayị kụ́ Ẹnẹyịmavara, vị ọnọọ kẹnẹ, Ibaasa ộ za avaba aneehi Ijerobowami dị ọ wụ̀ wa nị.

Era ộ rị ohinọyị Anisirẹrị

⁸ Ịnị ịrayị ana tụ́ ọ ịrayị oohu tụra ịhịnọnyị ana Asa sị rị ohinọyị tụ́ Ijuda, ịnị ịrayị ọnọọ Era ana vị ozi Ibaasa ọnị rẹ sị rị ohinọyị tụ́ Isirẹrị nị. Ọ mẹ̀ vavọọ rị ohinọyị ộ yà Itiriza mẹ ịrayị ẹẹva.

⁹ Â nyị ọga isoja anị ọnya ana aā hị́ Izimiri. Ọnị ọ sị eyi pè achẹva isoja ohinọyị anaā sịị umaata kụ̀ ịrẹkụ nị. Di Izimiri ọnọọ na mẹ eto ka ọnị ọ̀ wụ Ibaasa nị. Ibaasa vị ana yà ini eehi Ariza di ee hú eche, di eche aa mẹrị ọ. Ariza ọnọọ ọ si eyi pè irehi ohinọyị ana yà Itiriza nị.

¹⁰ Di Izimiri na, dị ọ và ịsa hị́ ọ ẹngụ, dị ọ wụ̀ ọ nị. Ịnị ana tụ́ ọ ịrayị ohurịhịmba ọnị Asa sị rị ohinọyị Ijuda Izimiri maanị sị wụ Ibaasa nị. Ịjị ọ sị ọ wụ, dị ọ rị ohinọyị dọ ọ ịrẹsụ nị.

¹¹ Izimiri mẹ̀ sị ohinọyị rị dị ọ sị yaayịtẹ kẹnẹ, dị ọ za avaba aneehi Ibaasa dị ọ wụ̀ wa nị. Ọ yị hyakụ vọ ozi ọnọrụ ikonya, àa vị anda anị ọnọrụ ikonya tịtẹ. Avaba ọta anị bẹẹ vị ọnị ọ wụ.

¹² Avọọ Izimiri mẹ̀ za avaba aneehi Ibaasa di o vú wa ẹtẹ nị. Avọọ Ẹnẹyịmavara mẹ̀ vịdị tụ́ Ijeehu ọnịsẹ ka ọ̀ na kà a yị Ibaasa ka ịsị e vee tù ọ ọ vị ọnọọ nị.

¹³ Ịrẹyị ẹnẹẹ ệ vavọọ tù Ibaasa agụvị avaba ebira odivi ọnị ọ mẹ, ọnịrị ebira odivi oni Era ozi anị mẹ. Ệ vavọọ mẹ̀ ebira odivi, dị ẹ rẹ hẹkẹ ori nị Ẹnẹẹ vị ẹnị ẹ sị mẹ ayị kụ́ Ẹnẹyịmavara ana vị Ohomorihi Anisirẹrị.

¹⁴ Ịrẹyị Era ana vọ, avaba ịsa ọnị ọ mẹ, avaba anị vị ana a chẹrẹ tụ́ ini iwe ịsị ẹ mẹ ẹkụhị-ẹkụhị ini oze ohinọyị Anisirẹrị.

Izimiri ộ rị ohinọyị Anisirẹrị

¹⁵ Ịnị ịrayị ana tụ́ ọ ịrayị ohurịhịmba ọnị Asa sị rị ohinọyị Ijuda, ịnị ịrayị ọnọọ Izimiri sị rị ohinọyị tụ́ Itiriza nị. Ộ rị ohinọyị ọnọọ tụ́ ịzọọ mẹ ẹkụhị ịhịmba. Ịnị ụmẹ ọnọọ isoja Anisirẹrị vi ene hi Igibitoni ana yà ịnị ẹtẹ Anihwirisiti.

¹⁶ Ẹ mẹ̀ vavọọ hi ịzọọ, dị ẹ wụ́ ka Izimiri ộ mẹ̀ eto, ọ si ohinọyị wụ nị. Ịnị ịhị ọnọọ gẹdẹ-gẹdẹ, di isoja Anisirẹrị ẹnẹẹ ana gụ hị́ ịzọọ sị Omiri ana vị ọga ẹnịnị, dị ẹ sị ọ rị ohinọyị nị.

¹⁷ Di Omiri ọnịrị avaba isoja ana yà pè e hụrẹ Igibitoni, dị ẹ hịrẹ nọ Itiriza, di e ne gù ịrẹkụ kara a nị.

¹⁸ Ịjị Izimiri si re ka aa vaa rị ẹkụra ọnọọ, di o hu dị ọ nọ ini ohweje ini eehi ohinọyị nị. O mè tù ịzọọ, dị ọ jị ịra tụ́ irehi ohinọyị dị ọ rị ọ ịra kú ẹngụ anị, di o sú nị.

¹⁹ Ẹngụ ịrẹyị ẹnẹnị ê tù Izimiri agụvị ebira odivi ọnị ọ mẹ, dị ọ mẹ̀ ịsa ene divi ini eyi Ẹnẹyịmavara. Ebira oni Ijerobowami mẹ gẹdẹ-gẹdẹ ọnị rẹ mẹ nị. Ijerobowami ộ mẹ̀ ebira odivi dị ọ mẹ ka Anisirẹrị ẹnị ẹ̀ rẹ mẹ̀ ebira odivi nị.

²⁰ Ịrẹyị Izimiri ana vọ, ọ mẹmẹ gẹ eyi tù ohinọyị, avaba anị vị ana a chẹrẹ tụ́ ini iwe ịsị ẹ mẹ eyinị-eyinị ini oze ohinọyị Anisirẹrị.

Omiri ộ rị ohinọyị Anisirẹrị

²¹ Ịjị ịrẹyị ẹnẹẹ maanị sị mẹ, dị Anisirẹrị sị gà hi ẹẹva nị. Ogu ọnya ẹ na sị yà vaka Itibini ana vi ozi Iginati, ka ẹnị ẹ̀ sị Itibini rị ohinọyị. Di ogu ọsa ẹnị rẹ na yà vaka Omiri nị.

²² Aza ana na vaka Omiri ẹ kata huna aza ana na vaka Itibini ana vị ozi Iginati nị. Itibini mè sú, dị ahịka Omiri ọ rị ohinọyị dọ ọ ịrẹsụ nị.

²³ Ịnị ịrayị ana tụ́ ọ ịrayị ohurẹẹwụ tụra ọnya ọnị Asa sị rị ohinọyị Ijuda, ịnị ịrayị ọnọọ Era ozi Ibaasa sị rị ohinọyị tụ́ Isirẹrị ịrayị ẹwụrẹva nị. Dị ọ rẹ rị ohinọyị tụ́ Itiriza mẹ ịrayị ịhịnọnyị nị.

²⁴ Ọ mẹ̀ vavọọ rị ohinọyị, dị ọ hị́ ataba Isamara hụụnị ụvọ Isimẹrị nị. Ataba ọnọọ vị ọnị ọ hì ẹkẹhị enyusẹ akawụ-akawụ oze ẹẹta. Ọ mẹ sị ọ hị́, dị ọ dà ẹkụra tụ́ ịzọọ nị. Dị ọ ka ịrẹha ẹkụra ọnị ọnị dà tụ́ ịzọọ avọọ ọ rị Ịsamarịya nị. Ịrẹha ọnọọ vị ịrẹha Isimẹrị ana vịdị nyị ẹtẹ Ịsamarịya dị ọ va hị́ ọ hụụnị ụvọ anị.

²⁵ Omiri ộ mẹ̀ ebira odivi ini eyi Ẹnẹyịmavara. Ọnị ọ mẹ̀ ebira odivi huna ohinọyị ana vịdị rị tụ́ ọ nị.

²⁶ Avaba ebira odivi oni Ijerobowami ozi Inebati mẹ gẹdẹ-gẹdẹ Omiri ọnị rẹ mẹ nị. Ijerobowami ộ mẹ̀ ebira odivi dị ọ rẹ mẹ ka Anisirẹrị ẹ̀ mẹ̀ ebira odivi nị, ệ hẹkẹ ori ẹnị ẹ̀ sị mẹ ayị kụ́ Ẹnẹyịmavara ana vị Ohomorihi Anisirẹrị.

²⁷ Ịrẹyị Omiri ana vọ, ịsa ọnị ọ mẹ ọnịrị ọ mẹmẹ nyị ụkata, avaba anị vị ana a chẹrẹ tụ́ ini iwe ịsị ẹ mẹ ẹkụhị-ẹkụhị ini oze ohinọyị Anisirẹrị.

²⁸ Omiri ô sú di e ne e tụ́ ịzị e ne ohiku anị tụ́ Ịsamarịya nị. Dị ahịka Ahabị ozi anị ọ rị ohinọyị dọ ọ ịrẹsụ nị.

Ahabị ộ rị ohinọyị Isirẹrị

²⁹ Ịnị ana tụ́ ọ ịrayị ohurẹẹwụ tụra ịhịnta ọnị Asa sị rị ohinọyị Ijuda, ịnị ịrayị ọnọọ Ahabị mẹ̀ vavọọ rị ohinọyị tụ́ Isirẹrị, dị ahịka Ịsamarịya ọ yà nị. Ộ vavọọ yà ịzọọ mẹ ịrayị ohurẹẹva.

³⁰ Ahabị ozi Omiri ọ mẹ̀ ebira odivi ini eyi Ẹnẹyịmavara huna avaba ohinọyị ana vịdị rị di o ve tú ọ.

³¹ Ebira odivi oni Ijerobowami ozi Inebati mẹ̀ hyakụ vi ikiiki ini eyi Ahabị. Ọnị vị ana dà ngụ udivi hụ avọọ, dị ọ na nyị Ijezebẹrị ozi Atibaari ana vi ohinọyị Ịsayịdọnị. Dị ọ kụkụ aa hẹkẹ ori ẹnịnị ana aā hị́ Ịbaarị, di ee kú ẹtẹẹ kụ́ ọ nị.

³² Di Ahabị dà irehi, dị o hì ụta ịsọvọ yị Ịbaarị tụ́ Ịsamarịya nị.

³³ Ahabị ô hì ọchị jẹẹ yị ori ana aā hị́ Asẹra. Ebira odivi ana Ahabị mẹ ka ọnị ọ̀ sị mẹ ayị kụ́ Ẹnẹyịmavara ana vị Ohomorihi Anisirẹrị o huna ebira odivi ana avaba ohinọyị Anisirẹrị ana vịdị rị tụ́ ọ mẹ̀ nị.

³⁴ Ịnị ụmẹ Ahabị, Ihiyeri ana vị Anịbẹtẹrị si tenyi ẹkụra Ijeriko dà nị. Abiramị ozi ọzọkụ Ihiyeri vị ene sú Ihiyeri mè nyima aa dà ẹkụra ọnọọ, Di ozi anị ana vị ozweyi ana aā hị́ Isegubi oni re sú ịhị ọnị ọ sị ukere chire oze ọbanyị ẹkụra ọnọọ nị. Ẹnẹyịmavara ộ vịdị ra à mẹ ka Ijosuwa ozi Inuni ọ kà a tịtẹ ịnị ụmẹ ọnya ka avọọ ọ mẹ̀ yà nị.