1 Ohinọyị 13 - IWE ỌNỊNỊ

Ọza Ohomorihi ọnya ana hụrẹ Ijuda vẹ

¹ Ẹkụhị ọnya di Ijerobowami hịrẹ nọ aha ịsọvọ ka ọnị ọ̀ na rị eturare ịra mẹ̀ ịsọvọ nị. Ọ mẹ̀ vavọọ yà ịzọọ, di o vene re ka ọza Ohomorihi ọnya aanị ộ hụrẹ Ijuda vẹ nị. Â nyị ịrẹyị ẹnị Ẹnẹyịmavara sị tụ́ ọza ọnọọ ka ọnị ọ̀ kà yị aza ene hi Ịbẹtẹrị.

² Dị ọza Ohomorihi ọnọọ nowu hi aha ịsọvọ ọnọọ ó màa kà ịrẹyị ẹnị Ẹnẹyịmavara sị tụ́ ọ vẹ, dị ọ ka, “Ẹwụ aha ịsọvọ ọnọnị, ẹwụ aha ịsọvọ ọnọnị, Ẹnẹyịmavara kà ma kà a wụ ka ẹwa yẹ, o ka â nyị ozi ọnọrụ ọnya aanị ana a vaa ma tụ́ ini ovwoovu Idevidi. Ọ kà ịrẹha ozi ọnọọ ọ vaa rị Ijosaya nị. Ọ kà ohi ịrẹsụ irehi Ohomorihi ene hi aha ọnẹba ana aa rị eturare ịra ịrẹsụ awụ aanị vị ọnị ọ vaa sị mẹ̀ ịsọvọ ịrẹsụ awụ. Ọ rẹ ka ẹnịnị vaa rị ẹchụkụ ọza ịra ịrẹsụ awụ.”

³ Ịhị ọnọọ, dị ọza Ohomorihi ọnọọ sị apọtẹrẹwa yị Ijerobowami nị. Dị ọ ka, “Ịrẹyị ẹnẹ Ẹnẹyịmavara kà aanị, apọtẹrẹwa anị yị. Si eyi pè ẹtẹ, wu vee re ka aha ịsọvọ ộ há, dị atịtọ ene hi ịnị anị và ha.”

⁴ Ijerobowami ohinọyị ọ wụ́ ọ́za Ohomorihi mè nowu kà ịrẹyị hi aha ịsọvọ Ịbẹtẹrị. Ọ́ mẹ̀ vavọọ wụ́, dị ọ tana ụvọ va jịnẹ aha ịsọvọ dị ọ ka, “À za a nịnị!” Dị ụvọ oni ohinọyị vavọọ tana avọọ vavọọ wụ jẹẹ, dị ọ̀ yị kụkụ zụ và a vẹ nị.

⁵ Di aha ịsọvọ há, dị atịtọ ene hi ịnị anị và ha nị. Ọnọọ ọ vi apọtẹrẹwa ẹnị Ẹnẹyịmavara kà yị ọza Ohomorihi nị.

⁶ Di ohinọyị aa dá ịpẹẹ yị ọza Ohomorihi dị ọ ka, “Aarịhịnị da ịpẹ yị Ẹnẹyịmavara Ohomorihi awụ dị wa mẹ̀ aduwa yọ agụvị amị dị ọ̀ và ụvọ amị vẹ mị.” Ịzẹyịza dị ọza Ohomorihi ọnọọ dá ịpẹ yị Ẹnẹyịmavara, dị ọ và ụvọ ohinọyị vavẹ yọ, dị ụvọ ana rẹ yà anka ọ́ mẹ̀ vịdị yà nị.

⁷ Di ohinọyị kà a yị ọza Ohomorihi ọnọọ dị ọ ka, “Navọ wa saasa mị nọ ini eehi, dị wa rị ịsa, di me si ịsa mẹ wụ ẹyịza.”

⁸ Dị ọza Ohomorihi ọnọọ tụ́ ohinọyị ohi dị ọ ka, “Wàa daka vaa sị achẹva irehi awụ yị mị, mẹ yị zụ saasa wụ na. Mẹ yị vaa rị ịsa, me yi vee hú enyi ịzẹnị.

⁹ Ẹnẹyịmavara ộ vavọọ sị ọ mẹ ọda mị ka asị mị rị ịsa, asị mi re hú enyi ịzẹnị. Ọ kà asị mị rẹ zi oze ọnị mị zị na vavẹ.”

¹⁰ Ịzẹyịza dị ọza Ohomorihi ọnọọ zi oze ọsa varẹma aa nọ eehi, dị ọ̀ yị zi oze ọnị ọ vịdị zị vẹ Ịbẹtẹrị nị.

Ọnịsẹ ọzọkụ ana hụrẹ Ịbẹtẹrị vẹ

¹¹ A va nyị ọnịsẹ ọzọkụ ọnya aanị ana ra Ịbẹtẹrị. Di ezi anị vẹ dị ẹ va kà a yọ avaba ịsa ana mẹ nị. Ệ kà avaba ịsị ọza Ohomorihi mẹ ịhị ọnọọ Ị́bẹtẹrị ọnịrị ịrẹyị ọnị ọ kà yị ohinọyị. Dị ẹnịnị vavọọ kà avaba anị yị ada ẹnịnị nị.

¹² Dị ada ẹnịnị họ̀ wa ka ye re oze ọnị zị? Di ezi ẹnị sị oze ọnị ọza Ohomorihi ana hụrẹ Ijuda vẹ zị zụ̀ ọ nị.

¹³ Dị ọ ka è tenyi ịkẹrịkẹtẹ yị ọnị nị. Dị ẹnịnị tenyi ịkẹrịkẹtẹ yọ, dị ọ tụra nị.

¹⁴ Ọ mẹ̀ sị tụra ịkẹrịkẹtẹ, dị aa dụ ọza Ohomorihi ọnọọ na nị. O me tù ọ ka ọ yaayịtẹ iruvo ọchị ana aā hí ooki. Dị ọnịsẹ ọzọkụ ọnọọ họ̀ ọ ka, “Ẹwaa vị ọza Ohomorihi ana hụrẹ Ijuda vẹ nị?” Dị ọ ka, “Hịịn, ẹmị yọ nị.”

¹⁵ Dị ọnịsẹ ọzọkụ ọnọọ ka, “Saasa mị nọ ini eehi dị wa na rị ịsa.”

¹⁶ Di ọza Ohomorihi ọnọọ ka, “Mẹ yị zụ varẹma saasa wụ. Mẹ yị zụ dị ụ na. Me yi zụ pè wu hú enyi ịzẹnị.

¹⁷ Ẹnẹyịmavara ộ vịdị sị ọ kà mị ka asị mị rị ịsa, asị mi re hú enyi ịzọọ. Ọ kà asị mị re zi oze ọnị mị zị na vavẹ.”

¹⁸ Dị ọnịsẹ ọzọkụ ọnọọ cheeche yọ dị ọ ka, “Ẹmị rẹ vị ọnịsẹ ộ anka ẹwụ. Ẹnẹyịmavara ộ tụ́ anggẹẹrị ka ọ̀ va kà a mị ka ẹmịrị wụ ọ̀ zị và nọ ini eehi amị, dị wa rị ịsa, di we re hú enyi.”

¹⁹ Ịzẹyịza dị ọ saasa a nọ ịnị eehi anị, dị ọ rị ịsa ini eehi anị, di o re hú enyi nị.

²⁰ Dị ahịka ẹnị ẹyịva e dudu yaayịtẹ pè itevuru nị. Ẹ mẹ̀ vavọọ yaayịtẹ, dị Ẹnẹyịmavara kà ịrẹyị yị ọnịsẹ ọzọkụ ana za ọza Ohomorihi ọnọọ vavẹ nị.

²¹ Dị ọnịsẹ ọzọkụ ọnọọ nowu hi ọza Ohomorihi ana hụrẹ Ijuda vẹ dị ọ ka, “Ẹnẹyịmavara kà ma kà ịrẹyị. Ọ kà ọda ọnị ọnị Ẹnẹyịmavara mẹ yị ẹwụ, wẹ yi si eyi pè e.

²² Ọ kà ịzị ọnị ka asị ẹwụ nọ na rị ịsa dị asị u re hú enyi, wa zi nọ ịzọọ wa sị́ ịsa rị, we re si enyi hú. Ọ kà agụvị avọọ ọza o yi vee ne oku awụ tụ́ ini ikuta ohiku awụ nịnị.”

²³ Ịjị ẹ sị ịsa rị, di e si enyi hú, di e tenyi ịkẹrịkẹtẹ yị ọnịsẹ ẹnị ẹ za vavẹ ini eehi aanị nị.

²⁴ Ọnịsẹ ọnọọ màa na, dị ọ na gẹrị idu oze nị. Di idu ọnọọ wụ ọ, di o tura oku anị tụ́ oze nị. Di ịkẹrịkẹtẹ jẹẹ pè e, di idu ọnọọ ọnị rẹ jẹẹ pè oku anị nị.

²⁵ A va nyị aza ẹnyị aanị ana aa parahu, di e re oku ene e tura tụ́ oze ọnịrị idu ana jẹẹ pè oku ọnọọ nị. Dị aza ẹnẹẹ nọ ịnị ẹkụra ịzị ọnịsẹ ọzọkụ ọnọọ ra, dị ẹ na kà a nị.

²⁶ Dị ọnịsẹ ọzọkụ ọnọnị ana za ọza Ohomorihi ọnọọ hụrẹ oze vẹ wụ́ ọ nị. Dị ọ ka, “Ọza Ohomorihi ẹnị Ẹnẹyịmavara kà yọ nọ. Ẹnẹyịmavara ọ ra a sị ọ yị idu ka ọ̀ na a va ha dị ọ̀ wụ ọ. Ịrẹyị ẹnị Ẹnẹyịmavara kà yọ ka ọ vaa mẹ ọ sẹ tụ́ ọ ịrẹsụ avọọ nị.”

²⁷ Dị ọnịsẹ ọkụkụ ọnọọ ka ezi anị è tenyi ịkẹrịkẹtẹ yị ọnị, ịzẹyịza di e tenyi ọ yọ nị.

²⁸ Dị ọnịsẹ ọkụkụ ọnọọ si hu aa na, di o ne tù oku ọza Ohomorihi ọnọọ ene e tura tụ́ oze nị. Di o re ka ịkẹrịkẹtẹ ọnịrị idu jẹẹ pè oku ọnọọ nị. Idu ọ yị rị oku ọnọọ, ọ yị rẹ wụ ịkẹrịkẹtẹ ọnọọ.

²⁹ Dị ọnịsẹ ọkụkụ ọnọọ sị oku ọza Ohomorihi ọnọọ, dị ọ sị ọ tụra ịkẹrịkẹtẹ aa vaa vẹ ini eehi nị. Ọ mẹ̀ ra a sị ọ vavẹ ịnị ẹkụra, dị ọ jị òrèrè anị, di e ne ne e nị.

³⁰ Ọnịsẹ ọkụkụ ọnọọ ô ne e tụ́ ini ikuta anị ụvọta, di aa jị òrèrè anị dị ọ ka, “Ma sị dà, oo, ọyịnyara amị!”

³¹ Ịjị ọ sị ọ ne, dị ọnịsẹ ọkụkụ ọnọọ kà a yị ezi anị dị ọ kà, “Mèe sú di u ne mi tụ́ ini ikuta ene e ne ọza Ohomorihi ọnọnị tụ́ aanị. Kụ́ ẹchụkụ amị gụrị ẹchụkụ anị.

³² Mâ yẹ ka ịrẹyị ẹnị Ẹnẹyịmavara kà ò nowu anị hi aha ịsọvọ Ị́bẹtẹrị ọnịrị avaba irehi aha ọnẹba ene hi ịnị ẹkụra Ịsamarịya nị.”

Ebira odivi Ijerobowami

³³ Ịrẹma ana avaba ịsa ẹnẹnị sị mẹ, Ijerobowami ọ yị vị và hụ vị ịrẹma ini ebira odivi ana aa mẹ. Aa kịị kụ́ aza oni òo re kẹnẹ hụụnị aza ẹnẹẹ, dị ọ kụ wa mẹ ohirẹsụ irehi Ohomorihi. Dị ọ kụ́ wa hi aha ọnẹba ịda ori anị nị.

³⁴ Ịrẹyị ọnọnị ọ vana sị vara ebira odivi tù ini eehi Ijerobowami. Ọnị ọ mẹ ka è vu avaba ẹnịnị ẹtẹ saka-saka hụụnị ẹtẹ ọnọọ nị.