1 Ohinọyị 12 - IWE ỌNỊNỊ

Ịrẹsụ ene hi eyi ẹbẹẹba ẹ sị dà kwooze

¹ Ẹkụhị ọnya, Irehobowami ộ nọ Ịsẹkẹmị ịzị avaba Anisirẹrị kụ ẹngụ gụ ka ẹnị ẹ̀ na sị ọ rị ohinọyị.

² Ijerobowami ozi Inebati vị ana vịdị zwe na tẹ̀ Ijipiti agụvị Isoromọnị. Ịjị ọ wụ́ enube ọnọnị, dị ọ varẹma vẹ nị.

³ Dị aza ẹnẹẹ tụ́ na hị́ Irehobowami, dị ọnịrị avaba ịragụ Anisirẹrị zị vẹ nị. Dị aza ẹnẹẹ kà yị Irehobowami dị ẹ ka

⁴ “Ada awụ vị ana nyayịnẹ kụ́ ọ kata yị ẹngụ ẹtẹẹtẹrẹ. Booro aanị ẹwa navọ wa hẹrẹ ẹnya ọrata ana ada awụ kune tụra yị. Wàa vavọọ hẹrẹ, ị vaa dọ ka ya hẹkẹ wụ”.

⁵ Di Irehobowami tụ́ wa òhi dị ọ ka, “wa na nịnị, uhurenyi dị wa vavẹ nịnị”. Ịzẹyịza dị aza ẹnẹẹ si hu nị.

⁶ Â nyị azọkụ ẹnyị ana vịdị jẹẹ pè Isoromọnị ada Irehobowami ịnị ụmẹ ọnị ọ sị yà ẹhẹ. Di Irehobowami ohinọyị sị ịrẹyị ọnọnị ne wa gẹ eyi nị. Dị ọ ka, “m màa mẹmẹ tụ́ aza ẹnịnị ohi kà a mị nịnị!”

⁷ Dị azọkụ ẹnẹẹ tụ́ ohi dị ẹ ka, “Wàa zẹẹ ka wa vị ọnụtụ aza ẹnẹnị dị waa hẹkẹ wa nị, dị ụ kà ịrẹyị ozoza yị wa ajịnị nị, ẹnịnị vị ana vaa hẹkẹ wụ pooro dị wa hụrẹ ẹhẹ.”

⁸ A rẹ nyị ọpa ezweyi ẹnị ẹnịrị Irehobowami dudu vịra vabẹ. Ezi ẹnẹẹ vị ana rẹ jẹẹ pè ọnị. Di Irehobowami sị ayị hụụnị iwọjị ana azọkụ sị yọ, dị ọ rẹ sị ịrẹyị ọnọọ ne pè ezi ẹnẹẹ gẹ eyi nị.

⁹ Dị ọ họ̀ ezi ẹnẹẹ ka, “Aza ẹ́nịnị ka ọnị ọ̀ hẹrẹ ẹnya ana ada anị kune tụra ẹnị. Sị ẹnịnị ro tụ́ ọ? A mẹ̀ vọrọ ka ọnị ọ tụ́ aza ẹnẹẹ òhi?”

¹⁰ Di ezi ẹnẹẹ ẹnị ẹnịrịị vịra tụ́ ohi dị ẹ ka, “Kà ẹ yị aza ẹnẹẹ ana ka wa hẹrẹ ẹnya ọrata ana ada awụ kune tụra ẹnị aanị ka ịsa ana ada awụ mẹ wa dị ẹ ka ẹnị ẹ sị ịrẹyị re avọọ vị ịrẹyị kiiki.

¹¹ Kà ẹ yị wa ka ịzẹyịza ada awụ ô kune ẹnya ọrata tụra wa, ama ẹwụ vị ana vaa dà tụ́ ịnị ẹnya ọnọọ. Dị ụ rẹ kà a tụ́ ọ yị wa ka ada awụ vị ana sị ịjapa tụ́ wa, ama iku ẹwụ ve sii che wa nị.”

¹² Ịzẹyịza uhurenyi oni Irehobowami ohinọyị jị ka aza ẹnẹẹ ẹ̀ vavẹ ve tù ọnị o si tù. Di Ijerobowami ọnịrị avaba aza ẹnẹẹ ve tù Irehobowami ohinọyị nị.

¹³ Ohinọyị ọ yị dọ iwọjị ọnị azọkụ pè e jị, dị ahịka ịrẹyị ọkatẹngụ ọ kà yị aza ẹnẹẹ nị,

¹⁴ anka ọpa ezweyi mè pè e juwe. Dị ọ ka, “Ada amị ộ sị ẹnya ọrata tụra wụ nịnị, ẹmị vị ana vaa dà tụ́ ịnị ẹnya ọnọọ. Ada amị ộ rẹ ịjapa tụ́ wụ nịnị, ama ẹmị vị ana vaa si iku che wu nịnị.”

¹⁵ Ẹnẹyịmavara ọ mẹ ka ohinọyị ọ̀ maanị tụ́ ohi ịrẹyị ẹnẹnị nị agụvị dị ọ zụ mẹ ịsị ọ ka ọnị vaa mẹ ohinọyị. Ịsị ọ ka ọnị vaa mẹ aanị vị ọnị ọ vịdị mẹ ka Ahija Anisiro ọ̀ kà yi Irehobowami ozi Inebati. Ịsị ẹ mẹ ka asị ohinọyị wụ́ ịrẹyị aza ẹnẹẹ ọ vị ọnọọ nị.

¹⁶ Ịjị ọ maanị sị yà, Anisirẹrị nịnị ê re ka ohinọyị ọ yị wụ́ ịrẹyị ọnị ẹnị kà. Dị aza ẹnẹẹ ve tụ́ ohinọyị ohi dị ẹ ka, “Ẹ yi va nyị aayị rị tụ́ ini ozi Ijeese, o! Ẹwụ nịnị Anisirẹrị, ọzọza ọ̀ọ nọ ini eehi o! Idevidi, ẹwa rẹ na sị eyi pè irehi ẹwụ!” Ịzẹyịza di Anisirẹrị si hu aa nọ ini eehi ẹnịnị nị.

¹⁷ Ama di Irehobowami rị ohinọyị tụra Anisirẹrị ene hi ẹkụra Ijuda nị.

¹⁸ Â nyị ọnọrụ ọnya aanị ana aā hị́ Adorami. Ọnị ọ vị ọga anaā kụ́ azaa mẹ̀ ụkọrọ nị. Ẹkụhị ọnya di Irehobowami ohinọyị tụ́ na hị́ ọ nị. Ọ mẹ̀ vẹ, dị avaba Anisirẹrị ne e ịrẹta, di o sú nị. Irehobowami ohinọyị mè re ka ô wusu, dị ọ wụsẹ zwe hịrẹ ịkẹkẹ umaata anị, di o si zwe nọ Ijerusarẹmị nị.

¹⁹ Hụrẹ ụmẹ ọnọọ Anisirẹrị vana hụrẹ aa kụ̀ hịrẹ anovwoovu Idevidi pooro ve tù ajịnị nị.

 sị Ijerobowami rị ohinọyị Anisirẹrị

²⁰ Ẹkụhị ọnya avaba Anisirẹrị ẹ sị wụ́, dị ẹ tụ́ na hị́ ọ ka ọ̀ vẹ ve tù aza ana gụ nị. Ọ mẹ̀ vẹ, dị ẹ sị ọ rị ohinọyị avaba Anisirẹrị nị. Ẹ yị nyị aza ana jẹẹ pè aneehi Idevidi à yị vị ovwoovu Ijuda ọnị ịnya kẹnẹ.

Ịsẹ ọnị Isemaya kà

²¹ Di Irehobowami vẹ Ijerusarẹmị dị ọ hị́ avaba aneehi Ijuda ọnịrị ovwoovu Ịbẹnjamịnị gụ nị. Avaba ẹnị ọnị ọ hị́ gụ vị ẹnị akahị-akahị oze ẹnarẹwụ. Ẹnị ẹnẹẹ vị ọmụha ana zụ nọ ịrẹkụ. Irehobowami ộ kụ́ wa gụ ka è ne pè aneehi Anisirẹrị kụ̀ ịrẹkụ, dị ẹ̀ na dọ ohinọyị varẹma va yị ọnị Irehobowami ozi Isoromọnị.

²² Ẹkụhị ọnya dị Ohomorihi va kà ịrẹyị yị Isemaya ana vị ọza Ohomorihi nị. Dị ọ ka

²³ “Kà ẹ yị Irehobowami ozi Isoromọnị ana vi ohinọyị Ijuda ọnịrị avaba aneehi Idevidi ọnịrị Ịbẹnjamịnị ne beri avaba aza ana vọ ka

²⁴ ẹmị Ẹnẹyịmavara kà asị ẹ sị ụvọ kanyị ọyịnyara ẹnịnị Anisirẹrị. Kà a ka mị ka asị e pè wa kụ̀ ịrẹkụ. Kà a ka mị ka ọzọza ọ̀ va nọ ini eehi anị, ka avaba ịsị ẹ mẹ avọọ, ẹma mẹ ka ọ vavọọ mẹ nị.” Ịzẹyịza aza ẹnẹẹ ệ wụ́ ịrẹyị Ẹnẹyịmavara, dị ọzọza varẹma nọ ini eehi anị anka Ẹnẹyịmavara mẹ̀ kà a nị.

Ori oni Ijerobowami mẹ ka aza ẹẹ hẹkẹ ẹ

²⁵ Ịnị ụmẹ ọnya di Ijerobowami tenyi ẹkụra Ịsẹkẹmị dà tụ́ ịrẹsụ ataba Ehwireemi nị. Ọ mẹ̀ sị ọ da, dị ọ yà ịzọọ nị. Dị ọ hụrẹ ịzọọ dị ọ na dà ẹkụra Ipanaweri nị.

²⁶ Di Ijerobowami ee ro o ịnị ayị anị, dị ọ ka, “Ẹyịyara ohinọyị ọnọnị ọ zụ varẹma nọ ini ovwoovu Idevidi.

²⁷ Aza ẹnẹnị àa hịrẹ nọ Ijerusarẹmị naa mẹ̀ ịsọvọ ini irehi Ẹnẹyịmavara ini Ijerusarẹmị, ayị ẹnịnị ẹ zụ vara ká ọga ẹnịnị na. Ọga ẹnịnị ọnọọ ọ vị Irehobowami ohinọyị Anijuda nị. Ọ̀ọ vavọọ yà, ẹ zụ wụ̀ mị, dị ẹ varẹma zị ká Irehobowami ohinọyị Anijuda na.”

²⁸ Ịjị ohinọyị maanị sị ọ ro, dị ọ va sị igooru dị ẹ sị mẹ imaaru ẹẹva nị. Ịjị ọ sị wa mẹ, dị ọ kà a yị Anisirẹrị dị ọ ka, “O si ku ọnị ụ hụrẹ aa nọ Ijerusarẹmị nịnị, ô zee ọgọnị. Re ẹẹmẹ ana jẹẹ aanị, Ohomorihi awụ nịnị ọ vị ọnọọ nị, ẹwụ nịnị Anisirẹrị. Ẹnị ẹ kụ́ wụ nịnị jịnẹ hụrẹ Ijipiti vẹ nị.”

²⁹ Di Ijerobowami sị ọnya ịnị imaaru ẹnẹẹ dị ọ sị tụ́ Ịbẹtẹrị nị, dị ọ sị ọsa dị ọ rẹ sị tụ̀ Ịdaanị nị.

³⁰ Ịrẹyị ọnọnị ọ vana sị vara ebira odivi. Aza ẹnẹẹ kụkụ aa naa hẹkẹ ori ẹnẹẹ. Aza ẹnyị aa nọ ịda ori ana Ịbẹtẹrị dị aza ẹnyị ẹnị aa nọ ịda ori ana yà Ịdaanị nị.

³¹ Ijerobowami ọ rẹ dà irehi hi aha ọnẹba. Dị ọ nyị ịnị aza ẹnẹẹ dị ọ sị wa mẹ ohirẹsụ irehi Ohomorihi, ama ộ yẹ ka aza ẹnẹẹ ẹ yị vị Anireevi.

Ahẹkẹ ori Ị́bẹtẹrị

³² Ịnị ana tụ́ ọ ẹkụhị ẹwụrẹhị ịnị ụhwẹ ịhịnta ịrayị, di Ijerobowami rị eche ahẹkẹ nị. Ịnị ụhwẹ ọnọọ ọ sị rị eche ọnọọ nị anka ịnị ụhwẹ ana aā sịị rị eche Ijuda. Dị ọnị rẹ mẹ̀ ịsọvọ ana aā rị ịra aha ịsọvọ nị. Avọọ ọ mẹ̀ rẹ mẹ Ịbẹtẹrị nị, Ọ mẹ̀ ịsọvọ yi imaaru ẹnẹẹ ọnị ọ mẹ. Ọ kụ́ ohirẹsụ irehi Ohomorihi hi Ịbẹtẹrị ịzị ọ dà aha ọnẹba tụ́.

³³ Ịnị ẹkụhị ẹwụrẹhị ịnị ụhwẹ ịhịnta, ọ mẹ̀ ịsọvọ ana aā rị ịra aha ịsọvọ Ịbẹtẹrị. Ọnị ụvọta kẹnẹ ọ nyị ụhwẹ ọnọọ yị ẹngụ anị, dị o nyima eche ahẹkẹ yi Anisirẹrị nị. Dị ọ hịrẹ nọ aha ịsọvọ dị ọ naa rị eturare ịra nị.