1 Ohinọyị 11 - IWE ỌNỊNỊ

Isoromọnị ộ nyị ọnẹẹ gigirigi

¹ Isoromọnị ohinọyị ô sì ịrẹyị anyẹnẹẹ ọrụrụ-ọrụrụ ana vị anẹkụra ọsa. Ộ nyị ozi ohinọyị Ijipiti, anẹẹ Animowabi ọnịrị Anamọnị ne beri Anedomi ọnịrị Anisodọmị ne chire Anihiti.

² Ẹnẹyịmavara ộ vịdị kà Anisirẹrị nịnị ọ̀nọ̀ ka asị ẹnịrị anẹẹ anẹkụra ẹsa nyị ẹngụ agụvị asị ẹ jesi wa ayị naa hẹkẹ ori ẹnịnị. Aza ẹnẹẹ gẹdẹ-gẹdẹ Isoromọnị sị ẹngụ na vaka, di o sì ịrẹyị ẹnịnị nị.

³ Ẹnị ezi ohinọyị ana vị ese Isoromọnị ịnị anẹẹ ẹnẹẹ vị ẹnị akatarẹchẹhị (700), di onyeehi anị ẹnị vi ịrẹkẹẹchẹhị (300) nị. Di ese Isoromọnị ẹnẹẹ za a di e jesi ọ ayị nị.

⁴ Ịjị Isoromọnị si bo, dị ese anị ẹnẹẹ jesi ọ ayị, dị ọ kụkụ aa dụ orii zi nị. Ayị anị ọ yị kụkụ vị ọnya tụ́ ịda Ẹnẹyịmavara anka ayị Idevidi ada anị mẹ̀ vị ọnya.

⁵ Isoromọnị kụkụ aa dụ ori Anisirẹrị ana aā hị́ Asịtọrẹtị ọnịrị ori ana aā nyị ọza ịhyẹrẹ ana vị ori Anamọnị zị. Aā hị́ ori ọnọọ Imirikomi.

⁶ Isoromọnị ộ mẹ̀ ebira odivi ini eyi Ẹnẹyịmavara. O yị sị avaba ayị anị saasa Ẹnẹyịmavara anka Idevidi ada anị mẹ̀ mẹ.

⁷ Isoromọnị ọ na dà ịzị ẹ nẹba yi ori Animowabi ana aā nyị ọza ịhyẹrẹ. Ori ọnọọ aā hị́ Ikemosi nị. Ịrẹsụ ataba ana yà eyi ọnị ọyịị̄ zịị̄ hụrẹ Ijerusarẹmị ọ dà aha ọnọọ tụ́ nị. Avọọ ọ mẹ̀ rẹ dà ịzị nẹba tụ́ ịzọọ yị ori Anamọnị nị. Ọnị rẹ vi ori ana aā nyị ọza ịhyẹrẹ, ana a rẹẹ̄ hị́ Imorẹkị.

⁸ Avọọ Isoromọnị mẹ̀ mị mẹ yị avaba ese anị ana vị anẹkụra ọsa nị. Dị ẹnịnị ẹnị aa rị eturare ịra, dị ẹ yaa mẹ̀ ịsọvọ yị ori ẹnẹẹ nị.

⁹ Dị Ẹnẹyịmavara va kụ́ ayị hi Isoromọnị nị, agụvị ka ọ raà sị ayị hụụ ịda ọnị Ẹnẹyịmavara ana vị Ohomorihi Anisirẹrị ana sị ẹngụ zụ̀ ọ ụpẹ ẹẹva.

¹⁰ Ọ mẹ̀ vavọọ sị ẹngụ zụ̀ ọ, dị ọ mẹ ọda ịsa ẹnẹnị yọ ka asị ọ na dụ ori zị nị. Ama Isoromọnị ọ yị va sị eyi pè ịrẹyị ẹnị Ẹnẹyịmavara vavọọ mẹ ọda anịị yọ.

¹¹ Dị Ẹnẹyịmavara va kà a yi Isoromọnị dị ọ ka, “Wéé re ẹngụ ebira ọnị ụ vaa mẹ aanị, wẹ̀ yị jẹẹ pè ịrẹyị ọnị ị kà, wẹ yị rẹ saasa ịrẹyị ọnị mị mẹ ọda anị wụ. Agụvị avọọ, yẹ o, ka ohinọyị ọnị ụ rị aanị vị ọnị maa dọ hụrẹ wụ ụvọ. Ozi ahụ awụ mị kụkụ aa sịị yị nị.

¹² Ama mê ro ịrẹyị Idevidi ada awụ, agụvị avọọ mẹ yị vaa dọ wụ ohinọyị ọnọnị wàa yị yàra. Ama m maa dọ ọ hụụnị ụvọ ozi ewu nị.

¹³ Mẹ yị rẹ vaa dọ wụ̀ avaba ohinọyị ọnọọ, Mị vaa sị ịrẹsụ Anisirẹrị ọnya yọ dị ọ̀ọ rị ohinọyị ẹnịnị. Mị vavọọ vaa mẹ̀ ẹ agụvị Idevidi ozi ahụ amị ọnịrị agụvị Ijerusarẹmị ọnị mị sị nyị.”

Ihadadi ộ vana vara ọnịvị Isoromọnị

¹⁴ Ẹnẹyịmavara ọ kụ́ ọbarọza nịnị kwẹẹtẹ tù Isoromọnị. Â nyị ọnọrụ ọnya aanị ana aā hị́ Ihadadi. Anedomi ọ vị nị, di ahịka ozi ini ovwoovu ohinọyị Edomi ọ vị nị.

¹⁵ Â nyị ụmẹ ọnya oni Idevidi sị na yà Edomi. Ịnị ụmẹ ọnọọ Ijowabi ana vị ọga isoja ộ nọ Edomi ka ọnị ò ne ne aza ana a wụ̀. Di Ijowabi za avaba anọrụ Anedomi dị ọ wụ̀ wa nị.

¹⁶ Ijowabi mẹ̀ vavọọ nọ Edomi, ụhwẹ ịhịnọnyị ọnịrị avaba Anisirẹrị hi ịzọọ vị nị. Ẹnịnị ẹ yị hụụ ịzọọ pooro dị ẹ wụ̀ avaba anọrụ Anedomi.

¹⁷ A mẹ̀ vavọọ a wụ̀ aza, di Ihadadi ọnịrị Anedomi ẹnyị si zwe hụụ ịda ozi ahụ ada Ihadadi na ngụ Ijipiti nị. Ụmẹ ọnọọ Ihadadi vi ozweyi kiiki aanị.

¹⁸ Ẹnịnị mẹ̀ kwẹẹtẹ hụrẹ Imidiyani, dị ẹ va ngụ Ịparanị nị. Dị ẹ sị aza ẹnyị hụụ ịzọọ saasa ẹngụ, dị ẹ na ngụ Ijipiti nị. Ẹnịnị ệ nọ ịda Ihwarawo ana vị ohinọyị Anijipiti. E mè tù ịzọọ di Ihwarawo si irehi yị Ihadadi, dị ọ rẹ sị ịsọyịrị yọ, dị ọ rẹ sị ẹtẹ yọ nị.

¹⁹ Ịrẹyị Ihadadi ô zee Ihwarawo eyi ẹtẹẹtẹrẹ dị ọ sị ọyịnyara ose anị ọnẹẹ, dị ọ sị gà Ihadadi nị. Ozi ọnẹẹ ọnọọ vị ọyịnyara ose ohinọyị ana aā hị́ Ịtapẹnẹsị.

²⁰ Ọyịnyara Ịtapẹnẹsị ộ ma ozi ọnọrụ ọnya yi Ihadadi Ịrẹha ozi ọnọọ ọ rị Igenubati nị. Di Ịtapẹnẹsị pá ozi ọnọọ ini eehi Ihwarawo nị. Dị ahịka vị Igenubati yà ini eehi Ihwarawo beri ezi Ihwarawo nị.

²¹ Ịnị ụmẹ ọnya Ihadadi mẹ̀ yị́ yà Ijipiti, dị ọ wụ́ ka Idevidi ọ raà sị ẹhẹ tịtẹ, ọ zị nọ ịda ohiku anị nịnị nị. Ọ rẹ wụ́ ka Ijowabi ana vịdị vị ọga isoja ọnị o re wusu. Di Ihadadi va kà a yi Ihwarawo ka ọ̀ sị oze yị ọnị ka ọnị aa nọ eehi ịnị ẹkụra nị

²² Di Ihwarawo va họ̀ ọ dị ọ ka, “sị wẹ̀ yị nyị ịda amị, dị ụ ka wee sì ka wa nọ eehhi awụ nị?” Di Ihadadi ka, “Ẹ yị nyị. Navọ wa zẹẹ ka ma na kẹnẹ!”

Irezoni ộ vana vara ọnịvị Isoromọnị

²³ Ọbarọza ọsa oni Ohomorihi hị́ ka ọ̀ kwẹẹtẹ tù Isoromọnị a rẹẹ̄ hi Irezoni nị. Irezoni vi ozi Eriyada ene zwe hụụ ịda ọga anị ana vị ohinọyị Anizoba. Ịrẹha ọga anị ọnọọ ọ rị Ihadadeza nị.

²⁴ Ịnị ụmẹ oni Idevidi sị huna Ihadadeza ohinọyị Izoba, dị ọ wụ̀ isoja Anisiriya ana va gụ ọ ụvọ, Irezoni ọnịrị aza anị sị na ra Ịdamasịkọsị ịzị ẹ ya sị ọ rị ohinọyị Isiriya.

²⁵ Irezoni vị ana kwẹẹtẹ tù Anisirẹrị pooro di Isoromọnị va hụrẹ ẹhẹ. Vị ọ nyayịnẹ kụ́ ọ kata Anisirẹrị ẹngụ anka Ihadadi ọnị mẹ̀ rẹ mẹ nị. Anisirẹrị vị oni o si eyi wụ, dị ọ rị ohinọyị tụ́ Aramị nị.

Ẹnẹyịmavara ô wo oto yị Ijerobowami

²⁶ Ọnọrụ ọsa ana kụ hịrẹ Isoromọnị ohinọyị ọ vị ọnya ịnị ozi ahụ anị aā hị́ Ijerobowami ozi Inebati ana ya ẹkụra Izereda ịnị ẹtẹ Anehwireemi. Ịrẹha ọnyị anị ọ rị Izeruwa ana vị osoku nị.

²⁷ Ịrẹyị oni Ijerobowami sị kwẹẹtẹ tù Isoromọnị yị. Ịnị ụmẹ ọnya Isoromọnị ô dà ẹkụra ana aā hị́ Imiro, di o tenyi ẹkụra Idevidi ada anị ene du nị.

²⁸ Isoromọnị ô re e ka Ijerobowami ọ zụ mẹ̀ ụkọrọ, dị ọ sị ọ ka ò si eyi pe aneehi Ijosẹẹhụ ana aa kụ́ naa mẹ̀ ụkọrọ nị.

²⁹ Ịnị ụmẹ ọnya di Ijerobowami sị jịnẹ hụrẹ Ijerusarẹmị nị. Ọ mẹ̀ vavọọ jịnẹ, dị ọnịsẹ ana aā hị́ Ahija ana vị Anisirẹrị na gẹrị ọ ózee nị. Ahija vi ene chire awuru ọwọọwa. Ẹnị ẹẹva kẹnẹ ẹ yẹ ịnị avị ịzọọ nị.

³⁰ Dị Ahija za awuru ọwọọwa anị ọnọọ oni o chire, dị ọ na a hi oze ẹwụrẹva nị.

³¹ Dị ọ ka Ijerobowami ọ̀ dọ ẹẹwụ ịnị ịta ọnọọ nị. Ọ kà, “Ẹnẹyịmavara Ohomorihi Anisirẹrị ka ọ̀ yẹ o, ka ọnị aa dọ ohinọyị hụụnị ụvọ Isoromọnị dị ọnị ọ̀ mẹ wụ ohinọyị tụ ịrẹsụ ovwoovu ẹẹwụ.

³² Ọ kà ọnị vaa sị ovwoovu ọnya yi Isoromọnị agụvị ka oni ô ro ịrẹyị Idevidi ozi ahụ anị ọnịrị ịrẹyị Ijerusarẹmị. Ọ kà Ijerusarẹmị ọ vị ẹkụra ọnị ọ nyị ịnị avaba ovwoovu Anisirẹrị nị.

³³ Ọ kà ọnị ộ vavọọ mẹ agụvị ka ẹnịnị ẹ sị và ị́rẹma anị, e kuku ee kú ẹtẹ yị Asẹra ori Anisidoni ọnịrị Ikimosi ori Animowabi. E re yee kú ẹtẹ yị Imirikomi ori Anamọnị. Ọ kà ẹnịnị ẹ yị zị ụsẹ ini oze anị, ẹnịnị ẹ yị mẹ̀ ebira ana vọrọ ini eyi anị. Ẹnịnị ẹ yị rẹ sị eyi pè ọda ọnị ọnị mẹ anka Idevidi ada anị.

³⁴ Ẹnẹyịmavara kà ọnị ọ yị vaa dọ avaba ohinọyị ọnọọ hụrẹ ẹ ụvọ, ọnị ọ vị vaa vị ohinọyị pooro dị ọ̀ hụrẹ ẹhẹ nị, agụvị ịrẹyị Idevidi ozi ahụ anị. Ọ kà Idevidi ọnị nyị, di o si eyi pè ịrẹyị anị ọnịrị ọda anị nị.

³⁵ Ọ kà ama ọnị vaa dọ ohinọyị ọnọọ hụụnị ụvọ ozi Isoromọnị. Ọ kà ọnị ọ̀ọ vavọọ dọ ọ, dị ọnị sị ovwoovu ẹẹwụ yị ẹwụ Ijerobowami.

³⁶ Ọ kà ọnị vaa sị ovwoovu ọnya yị ozi Isoromọnị agụvị di Idevidi ozi ahụ anị dị ọ daba zụ nyị ozi ọnya oni vee re ana vaa zụ̀ aza anị oze Ijerusarẹmị. Ọ kà ịzọọ ọ vị ẹkụra ọnị ọnị nyị ka ọnị, ọ̀ yà nị.

³⁷ Ọ kà ọnị ọ sị wụ nyị ka wa vị ohinọyị. Ọ kà ịzị èe zee wu eyi wa rị ohinọyị tụ́ ọ. Ọ kà ẹwa vaa vị ohinọyị Anisirẹrị nị.

³⁸ Ọ kà ama ẹwàa wụ́ avaba ịrẹyị ọnị ọnị mẹ ọda anị wụ, di ewu ee hu ahụ ọnị ọnị sì nị, dị waa mẹ̀ ebira ana vọrọ ini eyi anị nị, dị ụ raa mẹ avaba ịrẹyị ọnị ọnị kà anka Idevidi ozi ahụ anị mẹ̀ mẹ nị, ọ ka ọnị vaa yàa pè wu. Ọ kà ọnị vaa mẹ ka ịpa awụ ọ̀ rị ohinọyị gọdọ anka ọnị mẹ mẹ̀ ẹ yị Idevidi. Ọ rẹ ka ẹwụ ọnị vaa sị Anisirẹrị yị nị.

³⁹ Ẹnẹyịmavara rẹ ka ọnị vaa sị ụyaa rị ozi Idevidi agụvị ebira ẹnị ẹ mẹ aanị. Ọ kà ama ẹ yị vị ka vị ọ vaa rị ụya ọnọọ pooro nị.”

⁴⁰ Ịrẹyị ẹnẹnị, di Isoromọnị kuku ee sì ka ọnị ọ̀ wụ Ijerobowami nị. Di Ijerobowami ọnị sị kwẹẹtẹ, di o si zwe nọ Ijipiti nị. Dị ahịka ịda Isisaki ohinọyị Anijipiti o zwe nọ nị. Avọọ Ijerobowami mẹ̀ yà Ijipiti pooro di Isoromọnị sú nị.

Usu Isoromọnị

⁴¹ Avaba ịrẹyị Isoromọnị ana vọ ọnịrị avaba ịsa ọnị ọ mẹ, ne beri ọ mẹmẹ yẹ ịrẹyị, avaba ẹnịnị vị ana a chẹrẹ tụ́ ini iwe ịrẹyị Isoromọnị.

⁴² Avaba ịrayị oni Isoromọnị si rị ohinọyị tụ́ Ijerusarẹmị ọnịrị tụ́ avaba ẹtẹ Isirẹrị vị ịrayị ẹbẹẹva.

⁴³ Isoromọnị ộ sị ẹhẹ tịtẹ ọ zị nọ ịdị ohiku anị nịnị, dị ahịka ịnị ẹkụra Idevidi ada anị e ne e tụ nị. Di Irehobowami ozi anị rị ohinọyị tụ́ udi anị nị.