1 Ohinọyị 1 - IWE ỌNỊNỊ

Ụmẹ unobo Idevidi

¹ Ịnị ụmẹ ọnya ohinọyị ana aā hị́ Idevidi ọ sị vịra ẹtẹẹtẹrẹ, ộ ta bo. Ahị aa za a, ịta kẹnẹ ẹ yị kú ọ ahị.

² Ẹkụhị ọnya di ezi ahụ anị va kà a yọ dị ẹ kà, “Taarụ Ohinọyị, wẹ rẹ kà a ka è ne sì ozwoorihi ọnya ana ahịka ộ yị nyị ọnọrụ va wụ, ọ̀ọ vẹ dị ọ̀ va yà ịda awụ. Taarụ, ọọ hụtụ pè wụ, dị ọọ ku wụ ahị.”

³ Ịzẹyịza di e ne sì ozwoorihi ene zoza ịnị avaba ẹtẹ Isirẹrị nị. Ê re ọnya ana aā hị́ Abisagi ana vị Anisunami, dị ẹ sị ọ va yị ohinọyị nị.

⁴ Ozwoorihi ọnọọ ô zoza ẹnẹmẹhị. Ọ mẹ̀ vẹ dị ọ va yà ịda ohinọyị, dị aa zị ọ ụtụ nị. Ama ẹ yị nyị ụmẹ oni ohinọyị sị kanyị ọ.

Adonija ộ sị vụrị ka ọnị ọ vị ohinọyị

⁵ A va nyị ọza ịnya aanị ana aā hị́ Adonija ana vi ozi Ihagiti. Dị ọ kwẹẹtẹ di ee wo otoo zi dị ọ ka ọnị ọ vaa rị ohinọyị nị. Di o tenyi ịkẹkẹ umaata, ọnịrị umaata nịnị, dị aza ẹnị ẹvarẹwụ tụra wa, ene ee zwe dọ ọvịdị anị nị.

⁶ Ada Adonija ộ yị maanị tụ́ ọ ohuvọ ẹkụhị ọnya da a mẹ̀ hụrẹ ma a, ka sị ẹ vẹ dị ọ maanị mẹ Adonija vị ana nyayịnẹ zoza, dị ahịka ọnị a ma tụra Isoromọnị nị.

⁷ Adonija o ne pè Ijowabi ozi Izeruya ọnịrị Abiyata ohirẹsụ irehi Ohomorihi gẹ eyi Dị ẹnịnị sị ọtụ kà a ịrẹma nị.

⁸ Ama Adonija ọ yị sị ịrẹyị ọnọọ pè aza ẹnẹnị gẹ eyi: Ịzadọkị ana vị ohirẹsụ irehi Ohomorihi, Ịbẹnaya ozi Ijehoyada, Inatanị ana vi ọnịsẹ ne beri Isimeyi ọnịrị Ireyi. Ẹnị ẹnẹnị vi isoja ana yà pè Idevidi.

⁹ Di Adonija kụ́ atẹmẹ ọnịrị ụnọ ne beri ịsụpa ana a pá dị ẹ banyị, dị ọ kụ́ na mẹ̀ ịsọvọ ịnị ịrẹta Izohẹrẹtị ana yà ịnị aha enyi ịzị aā hị́ Ẹnị-Irogeri. Dị ọ hị́ avaba ezi ohinọyị ana vị ẹyịnyara anị nị ne beri avaba Anijuda ana vị, ezi ahụ ohinọyị.

¹⁰ Ama Inatanị ana vị ọnịsẹ ọnịrị Ịbẹnaya neberi isoja nịnị ọnịrị Isoromọnị ana vị adẹnyara anị, ọ yị hị́ wa.

¹¹ Di Inatanị va hị́ Ịbatịsẹba ọnyị Isoromọnị dị ọ ka, “Wáá wụ́ ọ ka Adonija ozi Ihagiti ọ sị ohinọyị rị ama ada ayị Idevidi ọ yị yẹ?

¹² Aarịhịnị jẹẹ me pè wu jị uwe booro aanị agụvị dị asị ẹwụrị Isoromọnị ozi ewu sú.”

¹³ Wụsẹ ne tù Idevidi ohinọyị. Wèe tù ịzọọ dị ụ kà a kà, “Taarụ Ohinọyị, áa vị ẹwụ a hị́ eku dị ụ kà a mị ka Isoromọnị ozi ewu ọ vaa vị ohinọyị dọ wụ ịrẹsụ nị. Wâ kà a ka ọnị ọ vaa yaayịtẹ ịrẹsụ ode awụ nị. Sị ẹ vavẹ dị ahịka Adonija ọ va vi ohinọyị nị?

¹⁴ Wàa vavọọ sị ngụ ịzọọ di wee pè ohinọyị kà ịrẹyị kẹnẹ nị, dị ẹmị wụsẹ re ve tù wu dị mị sị ịrẹyị gụ ịrẹyị ọnị waa kà.”

¹⁵ Ịzẹyịza di Ịbatịsẹba si hu aa nọ ịda ohinọyị, dị ọ na sị ngụ ịnị ịkatamba anị nị. Ịnị ụmẹ ọnọọ ohinọyị ộ ta bo, Abisagi ana vị Anisunami yà ịzọọ aa zị ụtụụ yị ohinọyị.

¹⁶ Ịbatịsẹba mè tù ịdị ohinọyị, dị ọ ká ịrẹsụ hị́ dị ọ tana tụra ẹtẹ kụ́ ohinọyị nị. Di ohinọyị ka, “U mè re?”

¹⁷ Di Ịbatịsẹba tụ́ o ohi dị ọ ka, “Taarụ, wâ vịdị raà sị Ẹnẹyịmavara ana vi Ohomorihi awụ hị́ eku mị ka Isoromọnị ozi emi ọ vaa rị ohinọyị dọ wụ ịrẹsụ nị. Ụ ka ọnị ọ vaa yà ịrẹsụ ode awụ nị.

¹⁸ Ama wáá yẹ ka Adonija ọ sị ohinọyị rị? Taarụ Ohinọyị, ama mâ yẹ ka wẹ yị yẹ.

¹⁹ Adonija ộ kụ́ ụnọ ọnịrị atẹmẹ ana a pa dị ẹ banyị ana rụrụ dị ọ sị mẹ̀ ịsọvọ nị. Ộ hị́ avaba ezi ohinọyị ọnịrị Abiyata ana vi ohirẹsụ irehi Ohomorihi ne beri Ijowabi ọga isoja. Ama ọ yị hí Isoromọnị ozi ịda awụ.

²⁰ Taarụ Ohinọyị, wâ yẹ ka avaba Anisirẹrị vi ene ee zi ka wa kà a yị ẹnị, aza ana vaa yaayịtẹ ịrẹsụ ode awụ ịrẹma awụ.

²¹ Taarụ, wàa raà sị ẹhẹ tịtẹ dị wụ zị ká ohiku awụ nịnị na nị, ẹmịrị Isoromọnị ozi ewu vi ene e vee re anka ọza odivi.”

²² Ịbatịsẹba mẹ̀ maanị aa kịị kà ịrẹyị yị ohinọyị kẹnẹ, dị Inatanị vana ngụ eehi ve tù ọ nị.

²³ Dị avaba ẹnịnị va kà a yị ohinọyị dị a ka, “Inatanị ọnịsẹ yọ!” Di Inatanị ne tù ohinọyị dị ọ tana, tụra ẹtẹ dị ọ kụ́ ọ nị.

²⁴ Di Inatanị ka, “Taarụ Ohinọyị, Ụ wáá sị ọ kà ka Adonija ọ vaa dọ wụ ịrẹsụ ini ohinọyị nị? Ọnị ọ́ọ́ kụkụ vaa yaayịtẹ ịrẹsụ ode awụ nị?

²⁵ Ajịnị ọnya ọnọnị ọ na raà kụ́ ụnọ ọnịrị atẹmẹ ana a pa dị ẹ banyị ana rụrụ aa sịị mẹ̀ ịsọvọ. Ộ hị́ avaba ezi ohinọyị ọnịrị ọga isoja nịnị ne beri Abiyata ohirẹsụ irehi Ohomorihi dị ẹnịnị ne hi ịda anị dị ẹ yaa rị di eyee hú nị. Dị ẹnịnị aa hị́ ‘Taarụ Ohinọyị, orubo ọcha orubo ẹya.’

²⁶ Ama taarụ, ọ yị hị́ mị ne beri Ịzadọkị ana vị ohirẹsụ irehi Ohomorihi ọnịrị Ịbẹnaya ozi Ijehoyada ne chire Isoromọnị ozi ịda awụ.

²⁷ Taarụ Ohinọyị, waa maanị sị eto mẹ dị wẹ̀ yị́ daba kà a yị ezi ịdị awụ ọza ana vaa yà ịrẹsụ ode awụ ịrẹma awụ nị?”

Idevidi ộ sị Isoromọnị rị ohinọyị

²⁸ Di Idevidi ohinọyị tụ́ ohi dị ọ ka à hi Ịbatịsẹba vẹ nị. Ịbatịsẹba mè ne si tù ohinọyị dị ọ jẹẹ pè e nị.

²⁹ Di ohinọyị ka, “Ẹnẹyịmavara ọ dọ mị tụ́ hụụnị avaba ịsa odivi nị. Mâ sị Ẹnẹyịmavara ọnọọ tẹ ivenu.

³⁰ Ma raà sị Ẹnẹyịmavara ana vị Ohomorihi Anisirẹrị hị́ eku wụ ka Isoromọnị ozi ewu ọ vaa rị ohinọyị ịrẹma amị nị. Ọnị ọ vaa dọ mị ịrẹsụ dị ọ yaayịtẹ ịrẹsụ ode amị nị. Avọ gẹdẹ-gẹdẹ m maa mẹ̀ ẹ ajịnị ọnya ọnọnị nị.”

³¹ Di Ịbatịsẹba tana tụra ẹtẹ dị ọ kụ́ ohinọyị, dị ọ kà, “Taarụ, Idevidi ohinọyị orubo ọcha orubo ẹya, ẹ yị nyị ịsị ẹ vaa mẹ wụ pooro.”

³² Di Idevidi ohinọyị va tụ́ ka à na hị́ Ịzadọkị ana vị ohirẹsụ irehi Ohomorihi ọnịrị Inatanị ọnịsẹ ne beri Ịbẹnaya ozi Ijehoyada va yị ọnị nị. Ịzẹyịza dị ẹnịnị ve si tù ohinọyị nị.

³³ Ẹ mẹ̀ vẹ, dị ohinọyị ka, “kụ́ ezi ahụ amị dị ẹwụrị wa ẹ̀ sị Isoromọnị ozi emi tụra ịkẹrịkẹtẹ ohinọyị ọnị mịị̄ tụra. Wàa raà sị ọ tụra a, dị ẹwụrị ọ ò dudu zị chi na Igihoni.

³⁴ Weè tù ịzọọ nịnị, dị ẹwụ Ịzadọkị ana vị ohirẹsụ irehi Ohomorihi beri Inatanị ana vị ọnịsẹ ọ̀ sị angwẹ nyị Isoromọnị dị ọ̀ rị ohinọyị tụra ịrẹsụ Anisirẹrị. Wàa vavọọ sị ọ mẹ, di u hú ọpanyị nịnị dị ụ ka, ‘Taarụ, Isoromọnị ohinọyị, orubo ọcha, orubo ẹya.’

³⁵ Di ụ saasa a hịrẹ vẹ, dị ọ̀ va yaayịtẹ ịrẹsụ ode amị dị ọ̀ vị ohinọyị ana vaa dọ mị ịrẹsụ. Ọnị mị ka a ka ọ vaa rị ohinọyị Anisirẹrị ọnịrị Anijuda nị”.

³⁶ Di Ịbẹnaya ozi Ijehoyada tụ́ ohinọyị dị ọ ka, “Ụ mẹ̀ yị kà a avọọ ọ vị nị. Taarụ, avọọ Ẹnẹyịmavara Ohomorihi awụ mẹ̀ kị kà a nị.

³⁷ Taarụ Ohinọyị, anka Ẹnẹyịmavara mẹ̀ yà pè, wụ avọọ ọ mẹ̀ rẹ vaa yaà pè Isoromọnị nị. Ẹnẹyịmavara vaa mẹ ka udi anị ọ̀ banyị huna udi awụ.”

³⁸ Dị Ịzadọkị ana vị ohirẹsụ irehi Ohomorihi ọnịrị Inatanị ọnịsẹ ne beri Ịbẹnaya ozi Ijehoyada ne chire Anikereti ọnịrị Anipereti chi na, dị ẹ na sị Isoromọnị tụra ịkẹrịkẹtẹ Idevidi ohinọyị, dị ọnịrị wa zị nọ Igihoni nị.

³⁹ E mè tù ịzọọ, di Ịzadọkị ohirẹsụ irehi Ohomorihi sị ọpanyị angwẹ hụụnị ajẹngụ dị ọ và a hi Isoromọnị ẹngụ nị. Di e hú ọpanyị dị avaba aza ẹnẹẹ ka, “Taarụ ohinọyị! U vee ku orubo ọcha, orubo ẹya.”

⁴⁰ Dị avaba ọza hịrẹ saasa a aa na, di eyee hú ịkakanchịị gono o, dị ẹ yaa jẹ ịrajẹ kẹnẹ nị. E mèe nowu owu ẹnịnị aa vaa chaka ẹtẹ.

⁴¹ Adonija ọnịrị aza ana hi ẹtẹ pè e ẹ sị ịsa rị ta, dị ẹ wụ́ ẹtẹ ịrẹyị nị. Ịjị Ijowabi wụ́ ịkakanchị ịrẹyị, dị ọ ka, “Sị ẹ maanị aa sụ́ ịrẹyị dị ẹkụra kụ́ vazi aanị?”

⁴² Ọ maa yịị kà ịrẹyị, kẹnẹ di Ijonatani ohirẹsụ irehi Ohomorihi ana vị ozi Abiyata vẹ nị. Di Adonija ka, “Vẹ, ka mâ yẹ ka ọza obooro wụ vị nị. A vị enube ọyịza wụ za aa vẹẹ?”

⁴³ Di Ijonatani tụ́ Adonija ohi dị ọ ka, “Eyiye o! Ada ayị Idevidi ohinọyị ọ raà sị Isoromọnị rị ohinọyị.

⁴⁴ Ohinọyị vị ana hyakụ tụ́ Ịzadọkị ohirẹsụ irehi Ohomorihi ọnịrị Inatanị ọnịsẹ ne beri Ịbẹnaya ozi Ijehoyada saasa a. Avọọ ọ mẹ̀ rẹ tụ́ Anikereti ọnịrị Aniperizi saasa a nị. Dị ẹnịnị sị Isoromọnị tụra ịkẹrịkẹtẹ ohinọyị nị.

⁴⁵ Di Ịzadọkị ohirẹsụ irehi Ohomorihi ọnịrị Inatanị ọnịsẹ sị angwẹ nyị Isoromọnị dị ẹ sị ọ rị ohinọyị Igihoni nị. Dị ẹ hịrẹ saasa a hụụ ịzọọ dị ẹ yaa jẹ, dị ẹkụra ee zizi nị. Ọnị ọ vị ẹtẹ ana aa sụ́ ịrẹyị ọnị waa wụ nịnị aanị nị.

⁴⁶ Isoromọnị ộ hyakụ sị yaayịtẹ ịrẹsụ ode ohinọyị.

⁴⁷ Ezi ahụ ohinọyị vị ana hyakụ vẹ dị ẹ va kụ́ ada ayị Idevidi ohinọyị ka ọ̀ nyarị ịrẹsụ ọyịza. Ẹ ka Ohomorihi anị vị ana vaa mẹ ka ịrẹha Isoromọnị ọ̀ nẹba huna ịrẹha Idevidi. Ẹ rẹ ka Udi Isoromọnị ọ vaa kà a hịrẹ huna udi Idevidi nị. Di ohinọyị hyakụ tana tụra aha ọyịsụ anị, dị ọ kụ́ Isoromọnị nị.

⁴⁸ Di ohinọyị rẹ kà a bẹẹ ka, ‘Mâ kụ́ Ẹnẹyịmavara Ohomorihi Anisirẹrị avọ. Ọnị ọ sị ọza yị mị ajịnị nị ka ọ̀ rị ohinọyị dọ mị ịrẹsụ. Ma raà si eyi amị re e.’ ”

⁴⁹ Ịjị aza ana wara gụ pè Adonija maanị wụ́, ẹngụ ẹnịnị ẹ kụ́ sụ́ ẹgahị, dị ẹ kwẹẹtẹ, dị ọzọza sị oze anị nị.

⁵⁰ Angwa Isoromọnị ee hí Adonija, dị ọ kwẹẹtẹ dị ọ na ta ụvọ kú ọpanyị ụta ịzị a yàa mẹ̀ ịsọvọ nị.

⁵¹ Dị a na kà a yi Isoromọnị dị a ka, “Taarụ Ohinọyị, wáá yẹ ka Adonija ee hí angwa awụ? Wéē re, vị ọ na ta ụvọ kú ọpanyị atakuji ịzị a yàa mẹ̀ ịsọvọ dị ọ ka ọnị ee sì ka wa hị́ eku yi ọnị ka ẹwụ ẹ yị vaa sị ụhwọọ wụ̀ ọnị ana vi ozi ahụ awụ.”

⁵² Di Isoromọnị tụ́ ohi dị ọ ka àa vị ọza ana nyị ebira obooro ọ vị nị, ẹyị ịrẹsụ anị ọ yị yaa hụrẹ tịtẹ. Ama aa nyị ebira odivi ene e re ịnị ụvọ anị, vi ee sú nị.

⁵³ Di Isoromọnị ohinọyị tụ́, dị a na sị ọ chi hụụnị aha ịsọvọ ọnọọ nị. Di Adonija vẹ, dị ọ va tana tụra ẹtẹ kụ́ Isoromọnị ohinọyị nị: Di Isoromọnị ka ọ̀ọ na eehi anị nị.