1 Ịtọpa 9 - IWE ỌNỊNỊ

Aza ana ra hi Ijerusarẹmị

¹ Â nyị ụmẹ ọnya, dị a chẹrẹ avaba Anisirẹrị nịnị Ovwoovu-ovwoovu nị. Â chẹrẹ wa tụ ịnị iwe ohinọyị Anisirẹrị nịnị. Â vịdị za Anijuda nịnị ọrịhị ne hi Ịbabịrọnị ka ẹ̀ na rị ụya ebira odivi ẹnịnị.

² Anisirẹrị nịnị, ohirẹsụ irehi Ohomorihi nịnị, Anireevi nịnị, ẹnịrị aza ana aa mẹ̀ ụkọrọ ịnị irehi Ohomorihi ẹ vị ọnịpaapa ana vavẹ va ra ịnị ẹtẹ ẹnịnị, ẹkụra ẹnịnị nị.

³ Anijuda nịnị, Anịbẹnjamịnị nịnị, Anehwireemi nịnị, ẹnịrị Anịmanasẹ nịnị vị ana na ra hi Ijerusarẹmị.

⁴ Â nyị ọnọrụ ana aā hị́ Utayi ana vị ozi Amihudi, ohiku ana vọ ẹ vị Omiri, ọnịrị Imiri ozi Ibani nị. Utayi ọnọnị ọ vị ọdọvịdị ezi Ịpẹrẹzị ana vị ozi Ijuda nị.

⁵ Ọnọrụ ana aā hị́ Asaya ọ vị ọdọvịdị ẹnị ezi Isera nị. Asaya ọnọnị ọ vị ọzọkụ ịnị ovwoovu ẹnịnị nị.

⁶ Ijewuwẹrị ọ vị ọdọvịdị ezi Ịzẹra nị. Ịzẹra ọnị rẹ vị ozi Ijuda. Ẹnị ovwoovu akatarẹchẹhị ộ jị ẹẹwụ ha (690) hụụ ịrẹsụ Ijuda ẹ na ra Ijerusarẹmị nị.

⁷ Aza ẹnẹnị ẹ vị Anịbẹnjamịnị ana na ra Ijerusarẹmị nị. Isaaru ana vị ozi Imesurami, dị ọ vị aazị Ihodaviya. Ẹmaazị Ịhasenuwa ọ vị nị.

⁸ Ibineya ana vị ozi Ijerohami. Era ozi Uzi, dị ọ vị aazị Imikiri, ọnịrị Imesurami ana vị ozi Isehwatiya. Aazị Irewuwẹrị ọ vị nị, dị ọ vị ẹmaazị Ibinija. Ọzọza vị ọnịrị aza anị.

⁹ Ovwoovu akana rị ẹchẹhị tụra ọ̀ jị ẹẹna ha ịnị ẹbẹẹta nị. Avaba ẹnẹnị vị ohirẹsụ ovwoovu-ovwoovu anka ohiku ọzọza. Ịbẹnjamịnị na ra hi Ijerusarẹmị nị.

Ohirẹsụ Irehi Ohomorihi ana ra hi Ijerusarẹmị.

¹⁰ Ẹnị ohirẹsụ Irehi Ohomorihi ẹnẹnị ẹ ra hi Ijerusarẹmị nị: Ịjẹdaya, Ijehoyaribi, ọnịrị Ịjachịnị.

¹¹ Azarịya ana vị ozi Ihirikaya (ohirẹsụ ọbanyị ọ vị tụ ịnị irehi Ohomorihi nị) Ohiku-ohiku anị ana vọ ẹ vị, Imesurami, Ịzadọkị, Imerayoti, ọnịrị Ahitubi nị.

¹² Adaya, ozi Ijerohami ohiku-ohiku anị ana vọ ẹ vị Ipasihuri, ọnịrị Imarikija nị. Imaasayi ozi Adiyẹrị. Ohiku-ohiku anị ana vọ ẹ vị Ịjazẹra, Imesurami, Imesiremiti, ọnịrị Imeri, beri aza ẹnịnị.

¹³ Ẹnị ohirẹsụ Irehi Ohomorihi ana vị ọdọvịdị abara-abara ệ gụ akahị tụra akana ộ jị ẹbẹẹva ha (1.760).

Anireevi nịnị ana ra hi Ijerusarẹmị

¹⁴ Anireevi ẹnẹnị ẹ ra hi Ijerusarẹmị nị: Isemaya, ozi Ihasuvi ohiku-ohiku anị ana vọ ẹ vị Azirikami ọnịrị Ihasabiya hụụ ịrẹsụ Imerari.

¹⁵ Ibakibakari, Iheresi, ọnịrị Ịgararị. Imataniya ozi Imika. Ohiku-ohiku anị ana vọ ẹ vị Izikiri ọnịrị Asahwi.

¹⁶ Ọbadaya, ozi Isemaya, ohiku-ohiku anị ana vọ ẹ vị Igarari ọnịrị Ijedutuni. Ịbẹrẹkiya, ana vị ozi Asahwi, dị ọ vị aazị Ẹrịkana. Ịnị ẹtẹ Inetohwa ọ ra nị.

Aza enee sere irehi Ohomorihi ana ra hi Ijerusarẹmị

¹⁷ Aza eneē sere irehi Ohomorihi ana ra hi Ijerusarẹmị yị: Ịsarọmị, Akubi, Ịtarịmọnị, ọnịrị Ahimanị. Ịsarọmị ọ vị ọdọvịdị ẹnịnị nị.

¹⁸ Va ngụ ụmẹ ọnọọ, ịpa ịrẹsụ ẹnịnị vị ana á ku hi eyi ịzị ọyịị̄ zịị hụrẹẹ vẹ enoze oze ọbanyị ana na ngụ udi Anireevi nịnị nị.

¹⁹ Â nyị ọnọrụ ana aā hị́ Ịsarọmị ozi Ikora; aazị Ebiyasahwi ọ vị nị, ọnịrị anda ẹnịnị eē sere ẹtẹ oze ọbanyị ana na ngụ ịnị Ajẹngụ ịzị Ẹnẹyịmavara yà nị. Avọọ gẹdẹ-gẹdẹ ohiku-ohiku ẹnịnị me vidiī sere ẹtẹ udi Ẹnẹyịmavara ịyẹẹyẹ nị.

²⁰ Â nyị ụmẹ ọnị Ihwinihasi ozi Eriyaza vịdị sị sị́ eyi pe wa. Ẹnẹyịmavara ọ̀ navọ ọ̀ yà pe e.

²¹ Â nyị ọnọrụ ana aā hị́ Ịzakaraya ozi Imeseremiya. Ọnị ô re vịdị sere ẹtẹ enoze Ajẹngụ ịzị Ẹnẹyịmavara yà da.

²² Aza ịrẹka tụra ẹwụrẹva á nyị ka ee sere ẹtẹ enoze ọnịrị ózee ọbanyị nịnị nị. Ẹnịnị vị ana a chẹrẹ hi ẹtẹ ẹkụra eweyi-eweyi ẹnẹ ẹ ra. Ohinọyị Idevidi ọnịrị Ịsamụwẹrị ọnịsẹ ẹ vịdị sị ụkọrọ ọnọnị chire ohiku-ohiku aza ẹnẹnịị ụvọ nị.

²³ Ẹnịrị ezi ẹnịnị e veneè yii sere ẹtẹ oze ọbanyị ana na ngụ ịnị irehi Ohomorihi nị.

²⁴ Â nyị oze ọbanyị ana va eyi ka eyi ẹbẹẹba ọnịrị eyi-ụvẹtẹ, dị a nyị ana rẹ va eyi ka eyi ọnị ọyịị̄ hụrẹẹ vẹ ọnịrị eyi ọnị ọyịị̄ zịị na ngụ ẹtẹ nị, ọzọza ộ nyị ohirẹsụ ene ee sere ẹtẹ ịzọọ.

²⁵ Anda oserẹtẹ ẹnẹnị aà gụ wa ụvọọ sere ẹtẹ nị. Ẹnịnị vị ana ra hi ịnị ẹkụra eweyi-eweyi ẹnịnị. Ọza ọnị ụkọrọ òo tu, dị ọ va mẹẹ. Ẹkụhị ịhịmba ọzọzaa vee sere ẹtẹ nị ụkọrọ òo tụ ọ nị.

²⁶ Ẹnị ẹyịna ana vị ohi-ohi oserẹtẹ aanị avaba ọda ụkọrọ ọnọnị yà ụvọ nị. Ẹnị ee sere aku-aku ene hi ini irehi Ohomorihi ọnịrị avaba ịsa á kụ́ hi ịzọọ nị.

²⁷ Ẹnịnị vị ana ra gụrị Irehi Ohomorihi agụvị ka ẹnị ee sere e nị. Ẹnị e reē na oze ọbanyị nịnị ẹnẹnẹ-ẹnẹnẹ nị.

Anireevi nịnị ana vọ

²⁸ Ẹnị Anireevi ana vọ e si eyi pe ẹnya ana a sịị̄ mẹ ahẹkẹ nị. Ẹnịnị ẹẹ̄ kụ waa hi ẹhẹ, dị ẹ rẹ kụ wa hi ini eehi ụmẹ tụra ụmẹ ene èee sii rò wa nị.

²⁹ Aza ẹnyị ịnị ẹnịnị vị ana sị eyi pe ẹnya ana vọ ana a sị tụ irenyi yị Ohomorihi, dị aza ẹnyị sị eyi pe ayị ọyịkwọ, eche, angwẹ orivi, eturare, ọnịrị avị agụ nịnị nị.

³⁰ Ama ohirẹsụ Irehi Ohomorihi nịnị eē po avị agụ ẹnẹnị nị.

³¹ Â nyị Anireevi ọnya ana aā hị́ Imatitiya. Ọnị ọ vị ozi ọzọkụ Ịsarọmị nị. Anịrẹsụ Ikora ọ vị nị. Ọnị ọọ̄ jị ịsa a sịị̄ mẹ̀ ịsọvọ nị.

³² Ẹnyị ịnị ezi Ikohati ẹẹ̄ mẹ ịbụrẹdị ụnarenyi ana a sịị̄ tụ ini Irehi Ohomorihi avaba ẹkụhị ụhwọtụ nị.

³³ Â nyị ovwoovu Anireevi nịnị ana ahịka ẹnị ẹẹ̄ mẹ aahẹ nị. Ọdọvịdị ovwoovu ẹnẹnị vị ana ra hi ịnị irehi ana da kara Irehi Ohomorihi. Ẹnịnị ẹ ma mẹ̀ ụkọrọ ọsa, agụvị ka ọọdụ ọnịrị ịrahụ vị ẹnẹ ẹẹ mẹ̀ ụkọrọ pooro.

³⁴ Aza ana á hị́ hi ẹbẹẹba aanị ẹ vị ohirẹsụ Ovwoovu-ovwoovu Anireevi nịnị nị hụrị ụnanka ẹnịnị nị. Ẹnị ẹ vị ọdọvịdị ana ra hi Ijerusarẹmị nị.

Ohiku-ohiku ohinọyị Ịsọọrụ ọnịrị Ezi anị

³⁵ Â nyị ọnọrụ ana aā hị́ Ijeyẹrị. Ọnị ọ vị ọnịpaapa na ra ẹkụra ana aā hị́ Igibiyọnị nị. Ịrẹha ose anị ọ rị Imaaka nị.

³⁶ Ozi anị ana vị ọzọkụ ọ rị Avidoni nị. Ezi anị ana vọ ẹ rị Izuri, Ikisi, Ịbaarị, Ineeri, Inadavu,

³⁷ Ịgẹdọ, Ahiyo, Ịzakaraya, ọnịrị Imikiroti nị.

³⁸ Imikiroti ọ vị ada Isimeya nị. Ezi ẹnịnị vị ana ra gụrị anda ẹnịnị ana vọ hi Ijerusarẹmị.

³⁹ Ineeri ọ vị ada Ikisi nị, dị Ikisi vị ada Ịsọọrụ nị. Ịsọọrụ ộ ma ezi ọnọrụ ẹẹna ana aā hị́ Ijonatani, Imarichisuwa, Abinadabi, ọnịrị Ẹsibaari.

⁴⁰ Ijonatani ọ vị ada Ịmẹribi-Ịbaarị, ana vị ada Imika nị.

⁴¹ Imika ộ ma ezi anọrụ ẹẹna. Ịrẹha ẹnịnị ẹ rị Ipitoni, Ịmẹrẹkị, Itareya, ọnịrị Ahazi nị.

⁴² Ahazi ọ vị ada Ịjaara nị. Ịjaara ọ́ ma ezi ọnọrụ ẹẹta. Ịrẹha ẹnịnị ẹ rị Aremeti, Azimaveti, ọnịrị Izimiri. Izimiri ọ vị ada Imoza nị.

⁴³ Imoza ọ vị ada Eriisa, dị Eriisa vị ada Azeeri nị.

⁴⁴ Azeeri ộ ma ezi ọnọrụ ịhịnọnyị. Ẹnị aā hị́ Azirikami, Ibokeru, Isimẹrị, Iseriya, Ọbadaya, ọnịrị Ịhananị nị.