1 Ịtọpa 5 - IWE ỌNỊNỊ

Evere Irubẹnị

¹ Irubẹnị ọ vị ozi ịpaapa Isirẹrị nị. (Ka ộ sị onyeehi ada anị ọnya, a sị dọ ọ udi ọzọkụ anị dị asị yị Ijosẹẹhụ nị. Irubẹnị ọnọọ ọ ma ezi ẹnẹnị nị.

² Ama ịrẹsụ ezi Ijuda ẹ vana nyị ụkata hu nị. Dị ahịka ẹnị ẹ vanaa mẹ ohinọyị yị avaba ịrẹsụ ana vọ nị).

³ Irubẹnị, ozi ọzọkụ Ijekọvụ ộ ma ezi ọnọrụ ẹẹna. Ịrẹha ẹnịnị ọ rị Ịhanọkị Iparu, Ihezironi, ọnịrị Ikarimi nị.

⁴ Â nyị ọnọrụ ọnya ana aā hị́ Ijowẹrị. Ịpa ezi Ijowẹrị ọnọnị ẹ vị: Ịgọọgị, Isimeyi.

⁵ Imika, Ireyaya, Ịbaarị

⁶ Ibeera, oni ohinọyị Asiriya ana aā hị́ Itigilatị-Ipiresa za ọrịhị hụrị ẹkụra anị, ohirẹsụ ọ vị ịnị aza Irubẹnị nịnị nị.

⁷ Á mẹ̀ chẹrẹ aza Ovwoovu-ovwoovu, aza ẹnẹnị á ka ệ vị ọdọvịdị ịrẹsụ-ịrẹsụ aza Irubẹnị nị: Ịjẹyẹrị, Ịzakaraya,

⁸ ọnịrị Ibera, ozi Azazi, dị ọ vị aazị Ịsẹma. Ịrẹsụ ezi Ijowẹrị ọ vị nị. Anịrẹsụ ọnọnị vị ana ra hi ẹkụra ana aā hị́ Aroyeri ịnị ẹtẹ ana ya eyi ẹbẹẹba Inebo ọnịrị Ịbaarị Imewoni.

⁹ Ẹnịnị ệ nyị ịsụpa tuturutu hi ẹtẹ Anigiriyadi, agụvị avọọ dị ẹnịnị ra hi ịzọọ nị. Ẹnịnị ệ ra hụrị eyi ọnị ọyị zịị hụrẹẹ vẹ huuu na ngụ oze ana a zịị̄ nọ irehu Iyuhwuretisi.

¹⁰ Ụmẹ ọnị sị vị ohinọyị, ezi Irubẹnị ẹnịrị Anihaga ệ hụ̀ ịrẹkụ. Ẹnịnị ẹ wụ Anịhagiri nịnị ha dị ẹ kụkụ ra hi eyi ịzị ọyịị̄ zịị hụrẹ ẹtẹ Anigiriyadi nị.

Evere Igadi

¹¹ Ezi Igadi nịnị vị ana ra akẹbẹẹba ezi Irubẹnị nịnị ịnị ẹtẹ Ịbasanị, huuu na ngụ eyi ọnị ọyịị̄ zịị hụrẹẹ vẹ ịzị aā hị́ Ịsarẹka.

¹² Ọnọrụ ana aā hị́ Ijowẹrị ọ vị ohiku ịrẹsụ ene hu keekere ịzọọ nị, dị Isahwani ọnị vị ohiku ịrẹsụ ana va tụra ịrẹsụ Ijowẹrị nị. Anọrụ ana aā hị́ Ijanyị ọnịrị Isahwati ẹ vị ohiku ịrẹsụ-ịrẹsụ ana vọ hi Ịbasanị nị.

¹³ Ẹnị ezi Igadi ana vọ vị ịrẹsụ Ịmayịkẹẹrị, Imesurami, Ịsẹba, Ijorayi, Ijakanị, Ịzịya, ọnịrị Ẹba.

¹⁴ Ẹnịnị vị ezi Abiheri, ana vị ozi ọnọrụ ọnya ana aā hị́ Ihuuri. Aza ẹnẹnị ẹ vị ohiku ẹnịnị nị: Abiheri, Ihuuri, Ijarowa, Igiriyadi, Ịmayịkẹẹrị, Ịjẹsịsayi, Ijado, Ibuzi.

¹⁵ Ahị, ozi Abidiyeri, dị ọ vị aazị Iguni, ọ vị ohirẹsụ ịrẹsụ ẹnẹnị nị.

¹⁶ Ẹnịnị vị ana ra hi ẹkụra ene hi ẹtẹ Ịbasanị ọnịrị Anigiriyadi; dị ẹ́ rẹ ra hi avaba ịzị aā kụ ịsụpa rị ịnị ẹtẹ Ịsarọnị nị.

¹⁷ Ụmẹ ọnị Ijotami sị vị ohinọyị Ijuda, dị Ijerobowami ọhụva vị ohinọyị Isirẹrị a sị chẹrẹ avaba ịsa ẹnẹnị nị.

Ẹnị ịrẹsụ ana vọ ene hi eyi ịzị ọyịị̄ zịị vẹ

¹⁸ Ẹnị ezi Irubẹnị, ezi Igadi, ọnịrị achẹva ezi Ịmanasẹ ệ nyị isoja akawụ-akawụ oze ohurẹẹva tụra akatarẹchẹhị tụra ẹbẹẹta, ana zụ a mẹẹ sị ogonto ọnịrị ụhwọ ọnyị eyi ẹẹva beri ọpa kụ̀ ịrẹkụ ẹtẹẹtẹrẹ.

¹⁹ Ẹnịnị ệ nọ ịrẹkụ Anihaga ọnịrị Ijeturi beri Inahwisi ọnịrị Inodabi.

²⁰ Ẹnịnị ệ sị ayị tụra Ohomorihi, dị ẹ mẹ̀ aduwa ka ọ̀ gụ ẹnị ụvọ nị. Ohomorihi ộ wụ́ aduwa ẹnịnị, dị ọ́ mẹ ka ẹnịnị ẹ̀ nyị ẹbẹẹba Anihaga nịnị ẹnịrị avaba aza ana saasa wa nị.

²¹ Ẹnịnị ệ kú wa ịnyaakụmị akawụ-akawụ tụra ẹvarẹwụ oze ẹchẹhị (250,000), atẹmẹ akawụ-akawụ oze ohurẹẹhị (50,000), ọnịrị ịkẹrịkẹtẹ akawụ (2,000), dị ẹ́ za aza ẹnị akawụ-akawụ oze ẹvarẹwụ (100,000) ọrịhị ịnị Anihaga nịnị nị.

²² Aza otomiroku vị ẹnẹ wụ̀ ha, agụvị ka Ohomorihi ộ sị ụvọ tụ́ ịnị ịrẹkụ ọnọọ yị wa. Ịzọọ ẹnịnị vana ra pooro ne tu ụmẹ ana a sị va za wa ọrịhị ne hi ẹkụra ọsa a mẹ̀ kụ̀ ịrẹkụ nị.

Aza Ịmanasẹ ene hi eyi ịzị ọyịị̄ zịị hụrẹẹ vẹ

²³ Achẹva aza Ịmanasẹ ene hi eyi ịzị ọyịị̄ zịị hụrẹẹ vẹ ệ rụrụ ẹtẹẹtẹrẹ. Ẹnịnị vị ana ra hi ẹtẹ Ịbasanị huuu na ngụ eyi ẹbẹẹba ịzị aā hị́ Ịbaarị-Ịhamọnị, Ịsẹnịya, ọnịrị ịnị Ataba Ihamọnị.

²⁴ Aza ẹnẹnị ẹ vị ọdọvịdị ịrẹsụ-ịrẹsụ ene hi ịzọọ nị: Ehwẹrị, Iisi, Eriyẹrị, Aziriyẹrị, Ijeremaya, Ihodaviya, ọnịrị Ijadiyẹrị. Avaba aza ẹnẹnị isoja ọkọọka, dị ẹ vị ọdọvịdị ene eyi yẹ ịnị ịrẹsụ-ịrẹsụ ẹnịnị nị.

 dụ aza ene hi eyi ịzị ọyịị̄ zịị hụrẹẹ vẹ.

²⁵ Ama aza ẹnẹnị ẹ yị mẹ ịzẹyịza hi Ohomorihi óhiku ẹnịnị. Ẹnịnị ệ và hụụ ịrẹma Ohomorihi, ẹ naa mẹ ori anẹkụra ọnị Ohomorihi dụ kwooze hụụnị ẹtẹ ọnọọ.

²⁶ Avọọ, Ohomorihi ộ mẹ̀ ka ohinọyị Ásiriya ana aā hị́ Ipuuri, (ịrẹha anị ọsa â hị́ Itigilatị-Ipiresa nị) ọ̀ kụ ịrẹkụ tu wa. Ộ dụ aza Irubẹnị nịnị, aza Ịgaadị ọnịrị achẹva aza Ịmanasẹ ene hi eyi ịzị ọyịị̄ zịị hụrẹẹ vẹ, dị ọ kụ wa ịzị aā hị́ Ịhaara, Ịhabọ, ọnịrị ịzị aā hị́ Ịhara, ne beri ụtọ irehu ana aā hị́ Igozanị nị.